Read gitonga Yesaya 15 Bible Online

Yesaya 15 - gitonga bible

Yesaya 15

¹Uchimi wa paku Moabu. Chifukwa Ara wachitika mapopa mu usiku umoza, Moabu wabwanganduka; chifukwa chakuti Kiri wachitika mapopa mu usiku umoza Moabu wabwanganduka.

²Ŵanthu ŵaku Diboni ŵakwere ku malo gha visopo kwachitenje, paku Nebo ndi paku Medeba, Moabu watenje. Pa mutu wose pe phara, mwembe wose wameteka,

³mu miseu ŵamanga vigudulu mu chiwunu, pachanya pa zinyumba ndi mu maluluwa we yose watenje, wadira masozi.

⁴Heshiboni ndi Eleale ŵabongo, mazu ghawo ghavwika mpaka ku Jahazi, chifukwa cho ŵakuko mahomwa ŵaku Moabu ŵabongo ukongwa, mzimu wake unjenjeme.

⁵Mtima wangu uliya chifukwa chaku Moabu, ŵakuthaŵa ŵake ŵachimbiriya ku Zoara, ku Eglatisheshiya. Pakuti pachikwera chaku Luhiti ŵatendachiliya ŵachikwera, mu mseu wakuya ku Horonaimi wasoska chitenje cha pharghaniku.

⁶Maji ghamu Nimrimi ndi phasulu, uteka wamira, chipozwa chitondeka kume, nyata kuti yiripu so cha.

⁷Chifukwa cho vinandi vyo ŵasaniya ndivyo ŵaŵika ŵaruta navyo kwambuka Kamsinji ka Matete.

⁸Pakuti nkhuta yaruta kuzunguliya charu cha Moabu; kutenje kwafika ku Eglaimi, kutenje kwafika ku Berelimi.

⁹Pakuti maji gha Diboni ghazazika ndi ndopa; ndipuuli ndikatolenga paku Diboni vinandi ku, nkharamu pa ŵaku Moabu wo ŵathaŵa, pa ŵakujako ŵa charu cho.