Read gitonga Yesaya 17 Bible Online

Yesaya 17 - gitonga bible

Yesaya 17

¹Vyakukambika vya paku Damasko. Ehe, Damasko wakamaranga kuŵa msumba, wakaŵanga mulu wa vyakwanangika.

²Misumba yake yikathaŵanga muyaya; yikaŵanga ya viŵetu, vyenivyo vikalanga pasi, ndipo paulengevi wakuvyofya.

³Linga likazirimitiyanga mwaku Efraimu, ndi ufumu mu Damasko, ndipo ŵakujapo ŵaSiriya ŵakaŵanga uli ndi unkhankhu wa ŵana ŵaku Yisraele, atiti Ambuya ŵa maŵanja.

⁴Ndipo mu zuŵa liya unkhankhu waku Yakobe ukasiskikanga ndipo liŵavu lake likawondanga.

⁵Ndipo kukaŵanga nge ndimo wakuvuna waunjikiya mbutu zapawima ndipo janja lake livuna masanja, ndi uli ndi pa munthu wavuluwa masanja ghakujaliya, mu dambo la Refaimu.

⁶Vyakuvuluwa vikasiyikanga mwenumuwa, ulaka ndi pa chimuti cha olive chasukuniskika vipasi viŵi pamwenga vitatu pasongo pa mphanda ya pachanya ukongwa, vinayi pamwenga vinkhonde pa mphanda za muti wa vipasi, atiti Ambuya Chiuta waku Yisraele.

⁷Mu zuŵa liya ŵanthu ŵazamuphwere mlengi wawo ndipo maso ghaŵo ghazamulereska ku Mtuŵa yo Yumoza waku Yisraele,

⁸kuti ŵakaphwerenga viguŵa vya sembe cha, nchitu ya manja ghawo, ndipo kuti ŵakalereskanga kwaku vyo minwe ya ŵeneko yikuchita cha, nanga ndi Ashera[2] pamwenga viguŵa vya sembe ya vyakununkha cha.

⁹Mu zuŵa liya misumba yawo yakulimba yazamukuŵa uli ndi malo gho ŵakuthaŵamo ŵaHivi ndi Amori, ghenigho ŵangughathaŵa chifukwa cha ŵana ŵaku Yisraele, ndipo mukaŵanga mapopa.

¹⁰Mwaruwa Chiuta winuyo watimutaskani, ndipo mwaruwa Jalawi linu lakubisamamo; chifukwa chenichi, chingana mungapanda mbeu zakukondweska ndi kundondomeka tumiti twa ŵachiuta ŵalendo,

¹¹chingana mungavimezga mu zuŵa lenilo mwavipandiya, ndi kuti vipasi mu mlenji weniwo mwapandiya, kweni vuna yimbininikenge mu zuŵa la chitima ndi kuŵaŵa kwambura kuchizgika.

¹²A! Mugundu wa ŵanthu ŵanandi, ŵawuruma uli, nkhuwuruma kwa nyanja! A! Kukoroma kwa mitundu, yikoroma uli nkhukoroma kwa maji ghanandi.

¹³Mitundu yi wuruma uli nkhuwuruma kwa maji ghanandi; kweni wakaŵakaripiyanga, ndipo ŵakathaŵiyanga kutali, kudikiskika nge ndi mwere pa mapiri paurongo pa mphepo, ndi fuvu la kavuruvuru paurongo pa lirondo.

¹⁴Nyengo ya mazulo, ehe, kofya! Kwenga kundache kuti ŵalipo so cha! Ichi ndichu chigaŵa chaku wo ŵatiti kwamphuwa, ndi mphenduzga yaku wo ŵatitifyankhanyuwa.