Read gitonga Yesaya 19 Bible Online

Yesaya 19 - gitonga bible

Yesaya 19

¹Vyakukambika vya pa Egipiti. Ehe, Ambuya akwera pa mtambo wakupusumpha ndipo atuza ku Egipiti; ndipo ŵangoza ŵa Egipiti ŵakanjenjemanga pakuŵapo iwo, ndipo mitima ya ŵaEgipiti yikasongonokanga mukati mwawo.

²Ndikakhuwizganga ŵaEgipiti pa ŵaEgipiti, ndipo ŵakabayananga, mwana ndi mwana munyake munthu yose ndimzengezgani wake, muzi pa muzi unyake, ufumu pa ufumu unyake;

³mzimu wa ŵaEgipiti mukati mwawo yikakhutulikanga, ndikatimbanizganga vyo ŵarongoso; ndipo wakafumbiriyanga ku ŵangoza ndi ŵavyanusi, ndi ŵakuukwa ndi zifwiti,

⁴ndikaperekanga ŵaEgipiti mu janja la mbuya munonono; ndipo karonga wakofya wakaŵausanga, atiti Ambuya, Ambuya ŵa maŵanja.

⁵Maji gha mu Nile ghakaphwanga, msinji ukakamukanga ndi kuphwa;

⁶misisi yake yikanunkhanga, ndipo mphalika za Nile wa Egipiti zikaŵanga zimana ndi zakuphwa, inya matete ndi sali vikawonga.

⁷Ghakaŵangamo malo ghamtetete mu Nile, mu luwo la Nile, ndipo chose chakuseŵeka mu mphepete mwa Nile chikamiranga, chikaputiskikanga, juŵapo so cha.

⁸Ŵarovi ŵasomba ŵakatenjenga, ŵakaŵanga ndi chitima, wose ŵakutgha mbeja mu Nile; ŵakagongowanga wo ŵapong'a mikwau mu maji.

⁹Ŵakutakataka nchitu ya mauzu ŵakaderukanga nthazi, pamoza ndi wose wakutakataka ndi uzu utuŵa.

¹⁰Ŵeniwo ndi mizati ya charu cho ŵaphwanyikenge, ndipo wose akutakatakiya mphoto ŵakachitanga chitima.

¹¹Ŵeruzgi ŵa Zoani mbabereŵeza kwakufikapo, nduna za zeru zaku Farao zipaska fundu zakupusa. Ungakamba uli kwaku Farao, “Nde mwana wa ŵazeru, mwana wa ŵakaronga ŵamwaka”?

¹²Na nunkhu ko mutiti kwe ŵazeru? Ŵakuneniyeni ndi ŵakuziŵiskeni vyo Ambuya ŵa maŵanja arongosole pa Egipiti.

¹³Ŵeruzgi ŵa Zoani ŵasanduka ŵabereŵeza, ndipo ŵeruzgi ŵa Mefisi ŵapusikika, wo ndi mya ya nyondo ya makhamu ghake ŵarandizga Egipiti.

¹⁴Ambuya atimbulinkhang'a mukati mwake mzimu wa chimtimbaheka, Egipiti amuchitiska kuzendazenda mu vyakuchita vyake vyose nge ndi munthu wakuloŵe yo ŵazendazenda mu maukuzi ghake.

¹⁵Ndipo kuti kawengeko kanthu cha kaku Egipiti ko mutu pamwenga muchiya, mphanda ya kanchindu pamwenga dete, vingachita.

¹⁶Mu zuŵa liya ŵaEgipiti ŵakaŵanga uli mbanthukazi, kutenthema ndi mantha paurongo pa janja lo Ambuya ŵa maŵanja akasukuniskiyanga paku iwo.

¹⁷Ndipo charu chaku Yuda chikaŵanga chakofya ku ŵaEgipiti, yose kwaku mweniyo chizumbulikenge wakawopanga chifukwa cha fundu yo Ambuya ŵa maŵanja arongosole kuchita paku wo.

¹⁸Mu zuŵa liya kwazamukuŵa mizi yinkhonde mu charu cha Egipiti yakuŵereŵeta lilime la ŵaKanani ndi ŵakujirapiskiya kuŵa ŵakuvwiya Ambuya ŵa maŵanja; umoza waku iyi ukadanikanga Muzi wa Lumwi.

¹⁹Mu zuŵa liya kwazamukuŵa chiguŵa cha sembe ku Ambuya mukati mu Egipiti ndi mzati waku Ambuya pa mphaka yake.

²⁰Chikaŵanga chiziŵisku ndi kaboni ku Ambuya ŵa maŵanja mu charu cha Egipiti, ŵachiliriya ku Ambuya chifukwa cha ŵakuyuzga aŵatumiyenge mpozomoski, ŵakaŵavikiriyanga ndi kuŵataska.

²¹Ndipo Ambuya akajiziŵiskanga ku ŵaEgipiti, ndipo ŵaEgipiti ŵakaziwanga Ambuya mu zuŵa liya ndi kusopa pamoza ndi mipasku yakocha, ndipo ŵakarapanga ku Ambuya ndi kufiska marapu gho.

²²Ambuya akakosonga Egipiti, kukoso ndi kuchizga, ndipo ŵakaŵeyerenga ku Ambuya, Ambuya akategherezganga ku mapemphu ghawo ndi akaŵachizganga.

²³Zuŵa liya kwazamukuŵa gurwi kutuwa ku Egipiti kuya ku Asiriya, ndipo ŵaAsiriya ŵakazanga mu Egipiti, ndi ŵaEgipiti mu Asiriya, ndipo ŵaEgipiti ŵakasopanga pamoza ndi ŵa Asiriya.

²⁴Mu zuŵa liya Yisraele wazamukuŵa wachitatu ndi Egipiti, ndi Asiriya, chitumbiku mukati mu charu chapasi,

²⁵ŵeniwo Ambuya ŵa maŵanja atumbika, kuti, “Watumbikike Egipiti ŵanthu ŵangu, ndi Asiriya nchitu za manja ghangu, ndi Yisraele mweniyo ndamusankha.”