Read gitonga Yesaya 27 Bible Online

Yesaya 27 - gitonga bible

Yesaya 27

¹Mu zuŵa liya Ambuya ndi lipanga lawo likhomi, likuru ndi lakulimba, akalanganga Leviathani chinjoka chakuthaŵathaŵa, Leviathani chinjoka chakunyongoroka-nyongoroka, ndipo akabayanga cha nchalinda cho che mu nyanja.

²“Mu zuŵa liya mbiyani ku munda wakunozga wa mphereska.

³Ine Ambuya nde msungi waku wo, nyengo ndi nyengo ndituyidiliya maji kopa kuti vinu ungamira. Usiku ndi msana nditiusunga.

⁴Kweni kuti ndisaniya vinyo cha. Mphanyi ndinguŵa ndi minga ndi kankhande, ndatinge ndirwenge nawo nkhondo ndi kuwocha wose.

⁵Kweni udange charonde ine nge nchakudingang'amo chake ndi kuchita nane chimango, udange wachita nane chimango.”

⁶Mu mazuŵa gha ghatuza Yakobe wakajinthanga misisi, Yisraele wakachitanga maluŵa ndi kumezga, ndi kuzaza charu chose ndi vipasi.

⁷Kumbi waŵakoso, uli ndimo wangukosole wo wanguŵakoso? Pamwenga kumbi ŵabayika uli ndimo ŵakuŵabaya ŵangubayikiya?

⁸Mweso pa mweso, ndi umkoli mungulimbana nawo; wanguŵanderezga ndi ukari wake wakofya mu zuŵa la mphepo yaku vuma.

⁹Chifukwa cho, paku ichi kulakwa kwaku Yakobe kukapepeskekiyanga, ndipo ichi chikaŵanga chipasi chakufikapo cha kutuzgapo uheni wake: wachichita mya yose ya viguŵa vya sembe nge ndi mya yituŵa yakupereka tumana-tumana, palivi kuti Asherimi[4] pamwenga viguŵa vya vyachema vyo vikajaririyanga kuma.

¹⁰Pakuti muzi wa malinga we pakuwija, malo ghakuthaŵika ndi kupatika, uli ndi bozwa; mwenimuwa ndimo thole liturgha uteka, muwa ndimo ligona pasi, ndi kupanthuwa mphanda zake.

¹¹Zititi zamira mphanda zake, zifyoka, ŵanthukazi ŵatuza kuzachidewa nkhuni za moto. Pakuti yaŵa mbanthu ŵambura kuteska, chifukwa cho wakiŵalenga yo kuti wakaŵanga nawo ndi lisungu cha, mweniyo wanguŵaumba kuti wakaŵarongonga wezi so cha.

¹²Mu zuŵa liya kwamba ku msinji Efrate kwachifika ku kamsinji kaku Egipiti Ambuya akapwanthanga trigu, ndipo mukaunjikikanga yumoza yumoza, mwa ŵanthu mwe waku Yisraele.

¹³Ndipo mu zuŵa liya mbata yikuru yikambikanga, sono wo ŵangusoŵe mu charu cha Asiriya ndi wo wangudikiskikiya ku charu cha Egipiti wakazanga ndi kusopa Ambuya pa phiri lakupaturika mu Yerusalemu.