Read gitonga Yesaya 39 Bible Online

Yesaya 39 - gitonga bible

Yesaya 39

¹Pa nyengo yeniyiya Merodakibaladani, mwana waku Baladani, karonga waku Babiloni, wangutuma mathenga ndi ŵakarata ndi chaulera kwaku Hezekiya, pakuti wanguvwa kuti wangutama ndipo wakuchira.

²Ndipo Hezekiya wanguŵalonde; ndipo wanguŵarongao nyumba ya usambasi wake, siliva, golide, vyachema, mafuta ghakuzirwa, vidya vyake vyose vya nkhondo, vyose vyo vingusanirika mu nyumba yake yakusungiyamo. Pengavi kamoza mu nyumba yake pamwenga mu ufumu wake wose ko Hezekiya wengavi kuŵarongo.

³Sono Yesaya mchimi wanguza ku karonga Hezekiya, wanguti kwaku iyo, “Ŵakambanji yaŵa ŵanthu? Wachiza kwako ŵatuliya pani?” Hezekiya wanguti, “Ŵaza kunu kwangu kutuliya ku charu cha kutali, ku Babiloni.”

⁴Iyo wanguti, “Ŵawonamunji mu nyumba yako?” Hezekiya wangwamuka, “Wawona vyose vyo vye mu nyumba yangu, mulivi kanthu mu nyumba yakusungiyamo ko ndengavi kuŵarongo.”

⁵Sono Yesaya wanguti kwaku Hezekiya, “Ivwa mazu gha Ambuya ŵa maŵanja:

⁶Ehe, mazuŵa ghatuza, penipo vyose vyo vye mu nyumba yako, ndi vyose vyo ausu ŵangusunga kufikiya ku zuŵa lino, vyazamtoleke ku Babiloni, palivivi ko kazamjako, atiti Ambuya.

⁷Ndipo ŵanyake ŵa ŵana ŵaku wamwene, wo ŵapapika ndi iwe, ŵazamtoleka, ndipo ŵamkuŵa ŵamthenu mu nyumba ya ufumu ya karonga wa Babiloni.”

⁸Sono Hezekiya wanguti kwaku Yesaya, “Mazu gha Ambuya gho warongoro ngamampha.” Pakuti wangughanaghana kuti, “Pakaŵanga chimangu ndi kuvikirika mu mazuŵa ghangu.”