Read gitonga Yesaya 40 Bible Online

Yesaya 40 - gitonga bible

Yesaya 40

¹Sangaruskani, sangaruskani ŵanthu ŵangu; watiti Chiuta winu.

²Kambani ghakuzikiska mtima Yerusalemu, ndi mubongoliyeni kuti nkhondo yake yamara, uheni wake wagowokereka, pakuti waronde ku janja la Ambuya mwakuwerezga kaŵi pa uheni wake wose.

³Mazu ghakukambula: “Mubozwa longosoni nthowa ya Ambuya, Nyoroskani mu bozwa gurwi waku Chiuta widu.

⁴Dambo lose likasoskekanga, ndipo phiri lose ndi mtunthu charu chambura kutambala chikatambalanga, ndi malo ghalijengwa-jenga ghakanyorokanga.

⁵Ndipo unkhankhu wa Ambuya ukavumburikanga, ndipo nyama yose yikawuwoniyanga pamoza, pakuti mlomo wa Ambuya warongoro.”

⁶Mazu ghatiti, “Liya!” Ndipo ine ndinguti, “Ndiliyengenje?” Nyama yose mbuteka, ndipo kutowa kwake kose kwe uli ndi luŵa la mu munda.

⁷Uteka ufota, luŵa lisanduka, penipo mvuchi wa Ambuya uputiyapo; kwakuneneska ŵanthu mbuteka.

⁸Uteka ufota, luŵa lisanduka; kweni mazu ghaku Chiuta widu ghakamanga muyaya.

⁹Kwere ku phiri litali, Zioni we, wakumemeza uthenga wamampha; soska mazu ghako ndi nthazi, Yerusalemu we, wakumemeza uthenga wamampha, uwukwezge, ungopanga cha, nena ku mizi ya ku Yuda, “Ehe Chiuta winu!”

¹⁰Ehe, Ambuya Chiuta watuza ndi kulimba, ndipo janja lake litimuwusiya, ehe, mphoto yake yendi iyo, ndipo lipira, lake le paurongo pake.

¹¹Wakaliskanga muskambu wake nge ndi mliska, wakuwunjikanga twana mberere mu manja ghake wakutunyamuwanga pa chifukwa chake, ndipo wenguwengu wakarongozganga zo zendi ŵana.

¹²Njani yo wapima maji gho ghe mu chisima cha janja lake ndi kwesa machanya ndi chikufi, kuŵika fuvu la charu chapasi mu chakwesiyamo ndi kupima mapiri mu vyakwesiyamo ndi mitunthu mu mweso?

¹³Njani yo wapangizga Mzimu wa Ambuya, pamwenga nge ndi nduna yaku mpangizga fundo iyo?

¹⁴Wangufumbiriya kwakuyani kuti wamungweruske, ndipo njani wangumurunguchizga nthowa ya cheruzgu chirunji, njani wangumusambizga zeru, ndi kumurongo nthowa ya kuwamo?

¹⁵Ehe, mitundu ye uli nkha nthoni ka mu ndowo, ndipo ŵaŵerengeka nge ndi fuvu pa vyakupimiyapo; ehe, wanyamuwa virwa nge ndi fuvu lakung'ibuka.

¹⁶Lebanoni kuti wangakwaniska nkhuni cha, chingana ndi nyama zake kuti zikwana kuchitiya sembe yakocha cha.

¹⁷Mitundu yose kuti ye kanthu cha paurongo pake, iyo watiyiŵerenga kuŵa nge nkhanthu cha njawaka njakumara.

¹⁸Na nkhwakuyani ko mumuyaniskenge Chiuta, pamwenga nchikozgu nichi chakumuyaniskiyapo?

¹⁹Ngoza! yo munthu wanchitu watumwenga, ndipo wakusula golide watimuzganga ndi golide, ndipo watimwenguliya maunyoro gha siliva.

²⁰Yo ngwakusauka wasankha muti wo kuti ungayenda cha kwachichita mpasku; wapenja msuzi wakuziŵa kumika cha ngoza cho kuti chisukunika cha.

²¹Kuti mukuziŵa cha? Kuti mukuvwa cha? Kumbi ŵalivi kukuneniyani kutuliya ku mtendeku? Kumbi mulivi kuwamo kwanda kukujarikika kwa charu chapasi?

²²Ndi mweniyo waja pachanya pa nkhata ya charu chapasi, ndipo ŵakujamo ŵake ŵe nge mba phanana; mweniyo watambaluwa machanya nge nchivwinkhu, ndipo watighatandika uli ndi hema la kujamo;

²³mweniyo wasanduska ŵana ŵa ŵakaronga kuŵa ŵaŵakaŵaka, ndipo wasanduska ŵeruzgi ŵa charu chapasi kuŵa kanthu cha.

²⁴Ŵapandika kwakusoŵa, ŵamijika kwakusoŵa, msisi wawo wusere pa charu chapasi, kwakusoŵa, wachiputiya paku wo, ŵafota, ndipo chimphunga chituŵaputiska uli ndi mbuwa.

²⁵Na sono mundiyaniskenge ndi yani, kuti ndikozgani nayo? watiti Mtuŵa Yumoza yo.

²⁶Yinuskiyani maso ghinu kuchanya mulereske: njani wangulenga ivi? Mweniyo watuzga liŵanja lawo ndi kuliŵerenga, watividana vyose mazina; ndi ukuru wa kulimba kwake; ndipo chifukwa ngwakulimba mu nthazi palivi cho chisoŵapo.

²⁷Chifukwa chine urongoro, Yakobe, ndipo ukamba, Yisraele we, “Nthowa yangu yabisika ku Ambuya, ndipo mwenera wangu walivi kuwuphwere Chiuta wangu”?

²⁸Kuti ukuziŵa cha? Kumbi ulivi kuvwa? Ambuya ndiyo Chiuta wa muyaya, Mlengi wa vigoti vya charu chapasi. Kuti wagongowa chingana nkhuvuka cha, kuwamo kwake nkhwambura mapenjeka.

²⁹Wapaska nthazi ku wakugongowa ndipo kwaku yo walivi likongono wakuzgiyako nthazi.

³⁰Ŵangaŵa ŵahurwa ŵakagongowanga ndi kuvuka, ndipo ŵanyamata ŵakalakatukanga;

³¹kweni wo ŵalindizga Ambuya, ŵakawerezgangamo nthazi zawo, ŵakaphururukanga ndi mapapa uli ndi nombo, ŵakachimbiyanga kwambura kugongowa, ŵakayendanga kwambura kuvuka.