Read gitonga Yesaya 42 Bible Online

Yesaya 42 - gitonga bible

Yesaya 42

¹Ehe, muŵanda wangu mweniyo ndisoska, wakusankhika wangu, mwaku yo mzimu wangu ukondwere; ndaŵika Mzimu wangu paku iyo, wakarongonga cheruzgu chirunji ku mitundu.

²Kuti wakaliyanga cha chingana nkhusoska mazu ghake; pamwenga kughavwikiska mu museu wo;

³dete lakusweka kuti wakafyonga cha, ndi chisunda chakukole kazimuzimu kuti wakazimwanga cha; mwaku gomekezgeka wakarongonga cheruzgu chirunji.

⁴Kuti wakatondekanga chingana nkhudondeskeka cha mpaka penipo wawandiska cheruzgu chirunji mu charu chapasi; ndi vyaru vya mu malikumba vikalindizganga dangu lake.

⁵Viyo ndimu wakambiya Chiuta, Ambuya, mweniyo wangulenga machanya ndi kughatambaruwa, mweniyo wangutandika charu chapasi ndi vyo vituwa mwenimo, yo wapaska mvuchi ku ŵanthu wo ŵaja penipo ndi mzimu kwaku wo ŵatenda mwenimo:

⁶“Ndine Ambuya, ndakudaniya mu urunji, ndakuto ndi janja, ndakusunga,” ndakupaska uli ndi phanganu ku ŵanthu, lumbuni ku mitundu,

⁷kujura maso gha ŵachiburumutiya, kutuzga ŵamagoŵa mu chizenje, mu nyumba ya magoŵa wo ŵaja mu mdima.

⁸Ndine Ambuya, lo ndilo zina langu; unkhankhu wangu kuti ndipaska ku munyake cha, pamwenga chisopo changu ku ŵangoza ŵakusongono.

⁹Ehe, vinthu vya kale vyafiskika, sono ndiziŵiska vinthu vifya; vyenga vindawoneke nditivitaula kwinu.” Sumu yifya ku Ambuya

¹⁰Mbiyani Ambuya sumu yifya, marumbu ghawo kutuwa ku chigoti cha charu chapasi! Nyanja yiwurume ndi vyose vyakuyizaza, vyaru vyamu malikumba ndi ŵakujamo ŵake

¹¹Bozwa ndi mizi yake visoske mazu ghawo, mizi yo wajamo Kedara; ŵakuja mu Sela ŵambe ndi likondwa, ŵadanirizga pachanya pa mapiri.

¹²Ŵapaske unkhankhu ku Ambuya, ndipo ŵaziŵiske marumbu ghake mu vyaru vya mumalikumba,

¹³Ambuya aruta uli ndi munthu chilimbi, uli ndi munthu wa nkhondo wasosomo ukali wake; waliya pachanya, wadanirizga ukongwa, watijirongo yija kuŵa wa nthazi pa ŵakupindikana ŵake.

¹⁴Kwa nyengo yitali ndataka cheti, ndaja chisisi ndi ndajikanizga; sono ndikabongonga uli ndi munthukazi wakupapa, ndikachitanga mwau ndi kutamantha.

¹⁵Ndikachitanga mapiri ndi mitunthu kuŵa mapopa, ndi kumizga vyakume vyawo vyose. Ndikasanduskanga misinji kuŵa virwa, ndi kukamuska mathaŵali.

¹⁶Ndipo ndikarongozganga ŵachiburumutiya mu nthowa yo ŵalivi kuyiziŵa, mu tunthowa to ŵalivi kutuziŵa kale ndikaŵarongozganga. Ndikasanduskanga mdima wa paurongo pa wo kuŵa ukweru, malo ghavibokuboku kuŵa ghakunyoroka. Ivi vinthu ndi vyo nkhachitanga, kuti nkhavirekanga cha.

¹⁷Wakawezgekiyanga kuvuli ndi kulengeskeka kwakufikapo, ŵeniwo ŵagomekezga mu ŵangoza ŵakusemeka, ŵeniwo ŵatiti ku ŵangoza ŵakwenguwa, “Mwe ŵachiuta ŵidu.”

¹⁸Avwani, imwe mwamugota; lereskani, imwe mwachiburumutiya, kuti muwone!

¹⁹Njani yo ngwachiburumutiya kweni ndi mteŵeti wangu pamwenga mugota uli ndi muthenga wangu yo ndituma? Njani wachiburumutiya uli ngwakupaturika wangu, pamwenga wachiburumutiya uli ndi mteŵeti wa Ambuya?

²⁰Wawona vinthu vinandi, kweni kuti wativiziŵa cha; makutu ghake ghakubanuka, kweni kuti watuvwa cha.

²¹Ambuya angukondwa, chifukwa cha urunji wawo, kutumbika dangu lawo ndi kulikankhuska.

²²Kweni yaŵa mbanthu wo ŵakuŵabiya ndi kuŵapoka, wose wakuthyika viŵana mu mazenje ndi kubisika mu nyumba za magoŵa; ŵaŵa iwo nyama yakukoreka yambura wakuyitaska, vyakupokeka vyambura wakukamba kuti, “Wezgani!”

²³Njani mukati mwinu yo wakaŵikangako gutu kwaku ichi, wakaŵangapo ndi kutegherezga kwa nyengo yo yikazanga?

²⁴Njani wangumupereka Yakobe ku wakuparghang'a, ndi Yisraele ku ŵakupoka? Kuti ŵenga Ambuya cha ŵeniwo ifwe talakwiya, mu nthowa zaku mweniyo kuti ŵangukhumba kwendamo cha, ndi dangu laku mweniyo kuti ŵangukhumba kuvwiya cha?

²⁵Viyo wangudira pake kufunda kwa ukari wake ndi kulimba kwa homwa; kungumupong'a pa moto kwakuzunguliya kweti, kweni kuti wanguwamo cha; ungumocha kweni kuti wanguphwereko cha.