Read gitonga Yesaya 44 Bible Online

Yesaya 44 - gitonga bible

Yesaya 44

¹“Kweni sono ayivwa, Yakobe we muŵanda wangu, Yisraele mweniyo ndasankha!

²Viyo atiti Ambuya wo angukupanga, wo angukuumba kutuwa ku chibali ndipo akakovyanga: Ungopanga cha Yakobe, mteŵeti wangu, Yeshuruni[6] yo ndasankha.

³Pakuti ndikadiranga maji pa charu cha chiparamba, ndi tumisinji pa charu chiyumu; ndikapunguliyanga Mzimu wangu, pa mphapu zinu, ndi chitumbiku changu pa, wakupakika ŵinu.

⁴Ŵakamenga uli mbuteka mukati mu maji, uli ndi sungwi mu timisinji twakwenda.

⁵Uyu wakambanga, ‘Nde wa Ambuya,’ munyake wakajidananga ndi zina laku Yakobe, ndi munyake wakalembanga pa janja lake, ‘Wa Ambuya,’ ndi kujipaska chiwongo cha zina laku Yisraele.”

⁶Viyo atiti Ambuya, Karonga waku Yisraele ndi Muwombozi wake, Ambuya ŵa maŵanja: “Ndine wakudanga ndipo ndine wakumariya; pade paku ine palivi chiuta.

⁷Njani wakukozgana nane? Rekani wamemeze ichi, rekani wataule ndi wachirulike paurongo pangu. Njani yo wataula kutuwa ku mwaka vinthu vyo vikazanga? Rekani watinene vyenivyo vikawangako.

⁸Mungopanga cha, chingana nkhufipa mtima; kumbi ndilivi kumuneniyani kutuwa ku vya mwaka ndi kuvitaula? Imwe mwe ŵakaboni ŵangu! Kumbi pe chiuta munyake pade paku ine? Palivi Jarawe, ine ndindaliziŵe nanga ndimoza.”

⁹Wose wo ŵachita ŵangoza ŵe kanthu cha, ndipo vinthu vyo ŵakondweremo vitanduwa kanthu cha; ŵakaboni ŵawo kuti ŵawona nanga nkhuziŵa cha, kuti ŵangalengeskeka.

¹⁰Mbayani wo ŵatata chiuta pamwenga ŵatenguwa ngoza yo kuti watanduwa kanthu cha?

¹¹Ehe, ŵanyake wose ŵakalengeskekanga, ndipo ŵamisili mbanthu ŵaka, ŵalekeni ŵawungane wose, ŵalekeni ŵazichima pakweru ŵakatenthemeskekanga ŵakalengeskekiyanga pamoza.

¹²Wakusula visulo wavichita mtundu ndipo wativichita pa maka; wativijarika ndi zinyundu ndi janja lake la nthazi; watufwa msala ndipo nthazi yake yigongowa, watumwa maji cha ndi watufwa chiparantha.

¹³Ng'ombwa ya miti yatambaluwa chingwe, yitichilembe; ndi chakulembe, watichilongoso kawidu kake ndi chakupaliya, ndipo watichilongoso mu kaŵidu ka munthu, ndi unozgi wa munthu, kuja mu nyumba.

¹⁴Wateme pasi masidara, pamwenga wasankha muti wa mbawa pamwenga wa nthunthu ndipo watiuleka kuti ukuwe ndi nthazi mukati mu miti ya mu dondo, wapanda muti wa mulanji ndipo vuwa yitiulera.

¹⁵Pavuli utumuŵiya munthu nkhuni, watopo maka ghanyake watotha, wapemba moto ndi watocha chiŵande, ndipo so wapanga chiuta ndi watimusopa, watichichita kuŵa changoza ndi watichilambiya.

¹⁶Chigaŵa chimoza watocha pa moto, chigaŵa chinyake waturgha nyama, watocha nyama ndi waguta; ndipo so watotha ndi watiti, “Oho, ndafunda, ndauwona moto!”

¹⁷Ndipo chakujako watichipanga chiuta, ngoza wake, ndipo watichijikamiya ndi kuchisopa, waromba kwaku cho ndi watiti, “Ndipo zomoske pakuti ndiwe chiuta wangu!”

¹⁸Kuti waziŵa cha, chingana nkhuti wateska cha, pakuti wajara maso ghawo, alinga waleke kuwona, ndi zeru yawo, alinga ŵaleke kuwamo.

¹⁹Palivi yumoza wakughanaghana, chingana nkhuti pe zeru pamwenga kuteska kunena kuti, “Chigaŵa chimoza ndinguwocha pa moto, ndipo ndinguwocha chiŵande pa maka ghake, ndinguwocha nyama ndipo ndargha ndipo kumbi ndichitenge vyakujapo vyake kuŵa ukazuzi? Kumbi ndikajikamiyanga paurongo pa muti?”

²⁰Waturgha chakurgha cha choto mtima wakujipusika wamurongozge kwawaka, ndipo kuti waziŵa kujipozomoska cha pamwenga kunena, “Kumbi kuti mwe utesi cha mu janja langu la marghe?”

²¹Kumbuka ivi vinthu, Yakobe we, ndi Yisraele pakuti we muŵanda wangu; ndingukuumba, we muŵanda wangu; Yisraele we, kuti ndikakuruwanga cha ine!

²²Ndapeya mautimbanizi ghako uli ndi mtambo, ndi uheni wako uli ndi munkhorwe; were kwaku ine, pakuti ndakuwombo.

²³Mbani mwa machanya, pakuti Ambuya achichita, kamburani, mwa ndimba za charu chapasi; sereni mukumba, mwa mapiri mwe, wa lisuwa we, ndi muti wose wa mwake! Pakuti Ambuya awombo Yakobe, ndipo akakakhuskikanga mwaku Yisraele.

²⁴Viyo ndimu atiti Ambuya, Muwombozi winu, yo wangumuumbani kutuwa ku chibali: “Ndine Ambuya, mweniyo wangulenga vinthu vyose, yo yija pe wangutambaruwa machanya, yo wangutandika charu chapasi yo wenga nani pamoza njani?

²⁵Yo wasuska vyakuloska vya ŵatesi, ŵakombezi wati ŵasanduska ŵabeleŵeza; mweniyo wawezge vuli ŵanthu ŵazeru, ndipo zeru yawo yisanduka kupusa;

²⁶mweniyo wakhozga mazu gha ŵateŵeti ŵake, ndipo wafiska fundu za mathenga ghake, mweniyo watiti gha paku Yerusalemu, ‘Wakajangamo ŵanthu,’ ndi gha mizi yaku Yuda, ‘Yikazengekanga; ndipo ndikasoskanga so malo ghawo gha mapopa’;

²⁷mweniyo watiti ku ndimba, ‘Ukamuke, ndikakamuskanga misinji yako’;

²⁸mweniyo watiti gha paku Sirusi. ‘Ndi mliska wangu, ndipo wakafiskanga chose cho ndikhumba’; watiti gha paku Yerusalemu, ‘Wakazengekanga,’ ndi gha nyumba yakupaturika, ‘Chiŵanji chako chikamikikanga.’ ”