Read gitonga Yesaya 47 Bible Online

Yesaya 47 - gitonga bible

Yesaya 47

¹Sikani, muje mu fuvu, mwaŵanthu ŵaku Babiloni; jani pasi pambura chitengo cha ufumu, imwe mwa ŵaKaldiya! Pakuti mukadanikanga so cha kuti mwe ŵakuzika ndi ŵakoloŵa.

²Toni zimphe, perani ufwa, zuwani chivwinkhu chinu, zuwani minjirira yinu, marundi ghinu ghaje nkhuli, muporote mu misinji.

³Nkhuli yinu yikaŵanga pakweru, ndipo chilengesku chinu chikawonekanga. Nkhatayanga thayu, kuti ndikalekangapo munthu cha.

⁴Muwombozi widu Ambuya ŵa maŵanja ndilu zina lake ndiyo Mtuŵa Yumoza waku Yisraele.

⁵Muje chisisi ndipo muruti mu mdima, mwa ŵaKaldiya; kuti mukadanikanga so ŵakuusa cha.

⁶Ndingukaripa ndi ŵanthu ŵangu wo ndinguŵasankha, ndi ndinguŵakazuzga. Ndinguŵapereka mu janja linu, kuti munguŵarongo lisungu cha; pa makhongwe munguŵikapo goŵa lizitu kwakurutiriya.

⁷Munguti, “Tikaŵanga ŵakuusa muyaya,” viyo kuti munguvighanaghana cha vinthu ivi, pamwenga kukumbuka umari waku vyo.

⁸Chifukwa chenichi sono ayivwa ichi, iwe wakwanja vyakukondweska, wakuja waka phe, iwe utiti mu mtima wako, “Ndine, ndipo palivi so munyake pade paku ine; kuti ndikaŵangapo choko cha chingana nkhuziŵa nyifwa za ŵana.”

⁹Ivi vinthu viŵi vikazanga kwako mu kanyengo, pa zuŵa limoza pe; nyifwa za ŵana ndi uchoko vikazanga pako mwa nthazi zikuru, nanga ŵa vyanusi ŵako ŵangaŵa ŵanandi ndi nthazi yikuru ya mayera ghako.

¹⁰Ungughanaghana kuti we wakukho mu mauheni ghako, unguti, “Palivi yumoza yo watindiwona.” Chinjeru chako ndi kuwamo kwako vingukusovya, ndipo mu mtima wako watinge, “Ndine, palivi munyake pade paku ine.”

¹¹Kweni chiheni chikakuziyanga, chenicho kuti ungachiŵeyerere cha; soka likakuwiyanga, lenilo kuti ungaziŵa kuliŵeyerere cha; ndipo phasulu likazanga paku iwe kwa mabuchibuchi, lenilo kuti utiliziŵa cha.

¹²Zikitizga kuma mu matera ghako mu ŵavyanisi ŵako ŵanandi, wo watakataka nawo kwamba ku usungwana wako; kokuli ungaziŵa kupunda pamwenga ukawofyanga.

¹³Wavuka ndi fundu zako zinandi; ŵareke ŵame ndi ŵakutaske ŵeniwo ŵagawa machanya, wo ŵalereska pa nyenyezi, wo pa liŵali la mwezi ŵaloska chenicho chikakuŵiyanga.

¹⁴Ehe, ŵenga ndi mbuwa, moto utiŵargha kuti ŵaziŵa kujipozomoska cha ku nthazi ya mlipu. Kuti ndi maka ghakothako cha, palivi moto wakujapo!

¹⁵Viyo ndimo ŵakaŵiyanga kwaku iwe ŵeniwo iwe watakataka nawo, ŵeniwo ŵachita nawe malonda kwamba ku ŵana ŵako; ŵayingayinga uku ndi uku we yose ko kwe khumbu lake; palivi nanga njumoza yo wangakutaska.