Read gitonga Yesaya 50 Bible Online

Yesaya 50 - gitonga bible

Yesaya 50

¹Viyo atiti Ambuya, “Wepani karata wa chipata wa anyoko, mweniyo ndinguŵapatiyapo? Pamwenga nkhu wamateu nunju yo ndingukuguliskako? Ehe, unguguliskika chifukwa cha maulakwi ghako, chifukwa cha mautimabanizi ghako reka anyoko angupatika.

²Chifukwa chine, penipo ndinguza, pengavi munthu? Po ndadananga pengavi wakwamuka? Kumbi janja langu likufupiskika, kuti litondeka kuwombo? Pamwenga kumbi ndilivi nthazi za kutaskiya? Ehe, ndi kuchenya kwangu ndimizga nyanja, misinji ndiyisanduska bozwa; somba zawo zinunkha chifukwa chakuwura maji, ndipo zitufwa chiparantha.

³Ndivwarika machanya ndi munkhorwe, chigudulu ndichu chakuvwinkha chawo.”

⁴Ambuya Chiuta andipaska ine lilime laku wo ŵasambizga, alinga kuti ndiziŵenge kumusangaruska ndi mazu yo ngwakuvuka. Mlenji ndi mlenji wayuska gutu langu kuvwa uli ndi wo ŵasambizgika.

⁵Ambuya Chiuta ajura gutu langu, ndipo kuti ndingugaruka cha, kuti ndingung'anamukiya kuvuli cha.

⁶Ndingung'anamukiya msana wangu ku wakupuma, ndi matama ghangu kwaku wo ŵanguguza mwembe, ndengavi kubisa chisku changu ku chilengesku ndi kukufunyika mata.

⁷Pakuti Ambuya Chiuta atindovya; chifukwa chenichi kuti ndatimbanizgika cha; chifukwa cho ndamika chisku changu uli ndi mwa, ndipo ndiziŵa kuti, kuti ndikalengeskekanga cha;

⁸yo watindivikiriya wepafupi. Njani wakalimbananga nane? Tiyeni time pamoza. Njani wakupindikana nane? Wazi pafupi ndi ine.

⁹Ehe, Ambuya Chiuta atindovya ine, njani wangandisaniya ndi mlandu? Ehe, wose ŵakachujukanga ulaka nchivwalo; nyenje zikaŵarghanga.

¹⁰Njani mukati mwinu yo watopa Ambuya ndi wavwiya mazu gha mteŵeti wawo, yo watenda mu mdima, ndi walivi ukweru, kweni wagomezga mu zina la Ambuya ndi kuyegeme paku Chiuta wake?

¹¹Ehe, imwe mose mwakukozga moto, imwe mukozga visindi! Yendani mu ukweru wa moto winu, mu visindi vyo mwakozga! Ichi ndichu mukalondiyanga ku janja langu: mukagonanga pasi mu urwirwi.