Read gitonga Yesaya 51 Bible Online

Yesaya 51 - gitonga bible

Yesaya 51

¹Tegherezgani kwangu, imwe mundondoloska utaski, imwe mupenja Ambuya; lereskani ku jarawe kwaku lo mungubanthukako, kuzenje lenilo mungukumbikako.

²Lereskani kwaku Abrahamu auskemwe ndi kwaku Sara yo wangumupapani; pakuti penipo wenga yumoza pe ndingumudana, ndingumutumbika ndi ndingumuchita kuŵa ŵanandi.

³Pakuti Ambuya akasangaruskanga Zioni; akasangaruskanga malo ghawo ghose gha uyiku, ndipo akasanduskanga mabozwa ghake, kuŵa nge ndi Edeni, lisuwa lake ulaka ndi munda wa Ambuya; likondwa ndi chimwemwe vikasanirikanga mwake, kuŵaonga ndi mazu gha sumu.

⁴“Tegherezgani kwangu mwa ŵanthu ŵangu, paskani gutu kwaku ine, mwa mtundu wangu; pakuti dangu likatuwanga kwangu, ndi cheruzgu changu chirunji kuŵa ukweru ku ŵanthu.

⁵Uwobozi wangu undere ruŵi pafupi, utaski wangu watuwa, ndipo manja ghangu ghakeruzganga ŵanthu; vyaru vya malikumba vitindilindizga, ndi vigomekezgu mu janja langu.

⁶Soskiyani maso ghinu kuchanya, lereskani kusi kwa charu chapasi, pakuti machanya ghakawalanga uli ndi usi, charu chapasi chikachujukanga uli nchivwalo, ndipo ŵeniwo ŵaja mwaku cho ŵakafwanga uli mbuzuzu; kweni utaski wangu ukaŵanga wa muyaya, uwombozi wangu kuti ukamaranga cha.

⁷“Tegherezgani kwangu imwe muziŵa urunji, ŵanthu wo dangu langu le mu mtima wawo; rekani kopa kunyoza kwa ŵanthu mungatenthemanga pa kutuka kwawo cha.

⁸Pakuti nyenje zikaŵarghanga uli ndi raya, fusi zikaŵarghanga nge ndi thonje, kweni uwombozi wangu ukajanga muyaya, ndi utaski wangu ku migonezi ndi migonezi.”

⁹Yukani, Yukani, vwarani nthazi, mwa janja la Ambuya; yukani, nge ndimu mazuŵa ghamwaka, migonezi yakale ukongwa. Kumbi kuti ndimwe cha mungudumuwa Rahabi tumanatumana, mungulasa cha nchalinda?

¹⁰Kuti ndimwe cha mungumizga nyanja, maji gha ndimba yikuru; munguchita ndimba za nyanja kuŵa nthowa, yakukamo wakuwombokwa?

¹¹Ndipo ŵakuwomboleka ŵa Ambuya ŵakawenga, ŵakazanga ku Zioni ndi kumba; likondwa la muyaya likaŵanga pa mitu yawo; ŵakalondenga likondwa ndi chimwemwe, chitima ndi mitamanthu vikathaŵiyanga kutali.

¹²“Ine, ndine ndisangaruska iwe; ndiwe yani iwe po utopa munthu mweniyo watufwa, mwana wa munthu yo wakulengeka uli mbuteka,

¹³ndipo waruwa Ambuya, Mlengi wako, mweniyo wangutambaruwa machanya, ndi wangujarika viŵanja vya charu chapasi, ndipo mantha gharutiriya msana wose chifukwa cha ukari waku yo wasuzga pa wakhumba kuparang'a? Kumbi ukari wa wakusuzga wepani?

¹⁴Yo ngwakujithereska wakafwatulikanga ruŵi; kuti wakafwanga ndi kusikiya ku Zenje cha, chingana nkhurgha kwaki kuti kukamaranga cha.

¹⁵Pakuti ndine Ambuya Chiuta winu, yo wayuska nyanja viyo kuti mayigha ghake ghauruma Ambuya ŵa maŵanja ndilo zina lawo.

¹⁶Ndipo ndaŵika mazu ghangu mu mlomo winu, ndakubisa mu chiduzi cha janja langu, nditambaruwa machanya ndi kutandika viŵanja vya charu chapasi, ndipo ndititi kwaku Zioni, ‘Mwe ŵanthu ŵangu.’ ”

¹⁷Jiyuske, jiyuske, ima, Yerusalemu we, iwe, wamwiya pa janja la Ambuya nkhombo ya ukari wawo, iwe wamwa ndi visika vyake mu chandi chakuzendazendeska.

¹⁸Palivi nanga njumoza wakumurongozga mu kati mu ŵana wose wo wakupapa; palivi nanga jumoza wakumuko pa janja mu ŵana wose wo walera.

¹⁹Ivi vinthu viŵi vyakuwiya iwe njani yo wakatenjenga nawe? Pharghaniku, ndi wanangiku, nja ndi lipanga; njani wakakusangaruskanga?

²⁰Ŵana ŵako ŵadika nthazi; ŵagona pakati pa gurwi we yose uli ndi mphala mu ukonde; ŵazazika ndi ukari wa Ambuya kuchenya kwaku Chiuta wako.

²¹Chifukwa cho vwani ichi, imwe musuzgika, imwe mwaloŵe, kweni ndi vinyo cha:

²²Viyo atiti Ambuya, Ambuya, Chiuta winu yo wavikiriya mrandu wa ŵanthu ŵake: “Ehe, ndatuzgako ku janja linu nkhombo ya kuzendazenda; chandi cha ukari wangu kuti mukamwanga so cha;

²³ndipo ndikachiŵikanga mu janja la ŵakumusuzgani, wo ŵarongoro kwaku imwe, kuti, ‘Gwadani pasi kuti tikeko’, ndipo imwe mwachita msana winu nge mphasi, ndi uli ndi museu wakukamo.”