Read gitonga Yesaya 52 Bible Online

Yesaya 52 - gitonga bible

Yesaya 52

¹Yuka, yuka, vwara nthazi yako, Zioni we; vwara vivwalo vyako vyakunozga, Yerusalemu we, muzi wakupaturika; pakuti wambura mchinju ndi ŵakazuzi kuti ŵakazanga so mwaku imwe cha.

²Jikunguntheni fuvu, yukani, Yerusalemu wakukoreka we; fwatuwani magoŵa mu masingu ghinu, mwakukoreka ŵaku Zioni.

³Pakuti viyo atiti Ambuya: “Mungusaskika kwambura mtengo ndipo mukawombolekanga kwambura ndrama.

⁴Pakuti atiti Ambuya Chiuta: Ŵanthu ŵangu pakudanga ŵanguruta mu Egipiti kuyingayinga muwa, ndipo ŵaAsiriya ŵanguŵasuzga kwambura kanthu.

⁵Chifukwa chenichi sono ndendi chine pano, atiti Ambuya, pakuwona kuti ŵanthu ŵangu ŵaruta nawo kwambura kanthu? Weruzgi ŵawo ŵatenjerwa, atiti Ambuya, ndipo kwakukiyakiya zuŵa lose zina langu litozeka.

⁶Chifukwa ichi ŵanthu ŵangu ŵakaziŵanga zina langu: mu zuŵa liya ŵakaziŵanga kuti ndine ndikamba; ndine nde pano.”

⁷Ama kunozga pa mapiri marundi ghaku yo watuza ndi uthenga wamampha, yo wataula chimangu, yo watuza ndi uthenga wamampha wa vyakunozga, yo wataula utaski, yo watitikwaku Zioni, “Chiuta wako wawusa.”

⁸Avwani, ŵalonda ŵinu ŵasamphuska mazu ghawo, ŵambiya pamoza mulikondwa; pakuti ŵawona jiso ku jiso chiwere cha Ambuya ku Zioni.

⁹Tuliyani pamoza ndi kumba, mwa malo gha uyiku gha Yerusalemu; pakuti Ambuya asangaruska ŵanthu ŵawo, ŵawombo Yerusalemu.

¹⁰Ambuya arongo pakweru janja lawo pa maso gha mitundu yose; ndipo vigoti vyose vya charu chapasi vikawonanga utaski waku Chiuta widu.

¹¹Tuwanimo, tuwanimo, tuwanimo mu Babiloni, mungakonga kanthu kaukazuzi cha; tuwanimo mukati mwake, jitozgeni mwaŵeni, imwe mwaŵakunyamuwa viyaŵi vya Ambuya.

¹²Pakuti, kuti mukarutanga ndi fulumira cha, ndipo kuti mukathaŵanga cha pakuruta, chifukwa Ambuya akakudanjiliyaninga, ndipo Chiuta waku Yisraele wakaŵanga wakumuvikiriyani kuvuli.

¹³Ehe, mteŵeti wangu wakasakatanga, wakakwezgekanga ndi kunyamulikiya pachanya, wakaŵanga pachanya ukongwa.

¹⁴Nge ndimo ŵanandi ŵanguzizwiya iyo chisku chake chingunangikadi, kwakuruska kawonekedu ka munthu, ndi kaŵiru kake kwakuruska ka ŵana ŵa ŵanthu

¹⁵viyo ndimu wachuruskiyenge mitundu yinandi; ŵakaronga ŵakasunamanga milomo yawo chifukwa chaku iyo, pakuti cho chengavi kutaulikiya iwo ŵakachiwonanga, ndipo chenicho ŵengavi kuchivwa ŵakawangamo.