Read gitonga Yesaya 54 Bible Online

Yesaya 54 - gitonga bible

Yesaya 54

¹“Mbanga, wa chumba we, iwe wengavi kupapa; bangulanga pakumba ndipo bongonga ukongwa, imwe mulivi kuvwa urwirwi wakupapa! Pakuti ŵana ŵa chumba mbanandi kuruska ŵana ŵaku yo ngwakuŵirwa, atiti Ambuya.

²Kuzga malo gha hema lako, ndipo zitambaruskike saru za kuchinga za mwakujamo mwako; ungarekanga cha, tambaluwa vingwe vyako ndi limbiska mphandu zako.

³Pakuti ukatambalukiyanga kose ku marghe ndi ku maze, ndipo mphapu yako yikaharanga mitundu ndipo ŵakaŵikangamo ŵanthu mu mizi ya uyiku.

⁴“Ungopanga cha, pakuti kuti ukalengeskekanga cha; ungaghanaghananga cha, pakuti kuti ukatolekiyanga chilengesku cha; pakuti ukaruwanga chilengesku cha unyamata wako, kusekeka kwa uvyokoro wako kuti ukakumbukanga so cha.

⁵Pakuti Mlengi wako ndi murumi wako, Ambuya ŵa maŵanja ndilo zina lawo; ndipo Mtuŵa Yumoza waku Yisraele ndiyo Muwombozi wako, Chiuta wa charu chose chapasi ndimu wadanikiya.

⁶Pakuti Ambuya akudana iwe nge ndi muwoli wakujoworeka ndi wakukara mu mtima, uli ndi muwoli wa munyamata asani wajoworeka, watiti Chiuta winu.

⁷Kwa nyengo yimanavi ndingukujowo, kweni ndi chitima chikuru ndikakuwunjikanga.

⁸Mu ukari wakurutiliya kwa kanyengo ndingubisa chisku changu kwako, kweni ndi chanju cha muyaya ndikaŵanga ndi chitima paku iwe, atiti Ambuya, Muwombozi wako.

⁹“Pakuti ichi chiyana ndi mazuwa ghaku Nowa kwa ine: uli ndimo ndingrapiya kuti maji ghaku Nowa ghareke kuza so pa charu chapasi, viyo so ndimu ndarapiya kuti ndikakukwiyiyanga cha ndipo kuti ndikuchenyenge cha.

¹⁰Pakuti mapiri ghangaruta mitunthu yinganderezgeka, kweni chanju changu chakufikapo kuti chikatuwangako kwako cha, phanganu langu la chimangu kuti likanderezgekanga cha, atiti Ambuya, wo ŵe ndi chitima paku iwe.

¹¹“Iwe wakuyuzgika, wakuyungwiskika ndi lirondo, wambura kusangaruskika, ehe, ndikamikanga mya yako mu maŵanga ghamanimani ndi kujalika viŵanja vyako ndi mya ya sangarawe.

¹²Ndikachitanga ŵasonjo ŵako ŵamya yakung'azima, vipata vyako vya mya yakuti je, ndi malinga ghako ghose gha mya yakuzirwa.

¹³Ŵana ŵako wose ŵakasambizgikanga ndi Ambuya, ndipo kusakata kwa ŵana ŵako kukaŵanga kukuru.

¹⁴Ukajarikikanga mu urunji, ukaŵanga kutali kukuyuzgika, pakuti kuti ukawopanga cha; ndi ku chakofya, pakuti kuti chikazanga kufupi nawe cha.

¹⁵Asani munthu wayuska ndeu, kuti njakutuwa kwangu cha; we yose wakwambana nawe ndeu wakawanga chifukwa chako.

¹⁶Ehe, ndalenga msuzi mweniyo wavukuta moto wa maka, ndipo wapanga chidya cha nchitu yake. Ndalenga so wakunanga kuti wanange;

¹⁷palivi chidya cho chapangikiya paku iwe chikachitanga kanthu, iwe ukasuskanga lilime lose lenilo litukuyukiya mu cheruzgu. Ichi nchihara cha ŵateŵeti ŵa Ambuya, ndi kurunjiskika kwawo kwakutuliya kwangu, atiti Ambuya.”