Read gitonga Yesaya 56 Bible Online

Yesaya 56 - gitonga bible

Yesaya 56

¹Viyo atiti Ambuya: “Sungani cheruzgu chirunji, chitani, ukongorekwa, chifukwa utaski wangu ukazanga ruŵi, ndipo uwombozi wangu ukavumbulikanga.

²Ngwakutumbikika munthu yo wachita ichi; ndi mwana wa munthu yo watichikoreska, mweniyo wasunga sabata, kwambura kulikazuzga, ndipo wakanizga janja lake ku kuchita uheni.”

³Wareke kukamba mlendo yo wajibatika ku Ambuya, kuti, “Ambuya akandipatuwangako nadi ku ŵanthu ŵawo”; wamthenu wareke kunena kuti, “Ehe, nde chimuti chakumira.”

⁴Pakuti Ambuya atiti viyo: “Ku ŵamthenu wo ŵasunga masabata ghangu, wo ŵasankha vinthu vyo vikondweska ine, ndi kukoreska phanganu langu,

⁵ŵakarondiyanga kwangu vyamampha kuruska ŵana ŵanthurumi ndi ŵana ŵanthukazi, chikumbusku ndi zina mukati mu nyumba yangu ndi mu viliŵa vyangu; ndiŵapaskenge zina la muyaya, zina lo kuti likamaranga cha nyengo yose.

⁶“Ndipo ŵalendo wo ŵatijibatika ŵeneko ku Ambuya, kuŵatataliya, kwanja zina la Ambuya, ndi kuŵa ŵateŵete ŵawo, we yose yo wasunga sabata, ndipo kuti watilikazuzga cha, wakoreska phanganu langu

⁷ŵa viyo ndikaŵatoliyanga ku phiri langu lakupaturika; ndi kuŵapaska likondwa mu nyumba yangu ya kuromba; mipasku yawo yakocha ndi sembe zawo vikarondelekanga pa chiguŵa changu cha sembe; pakuti nyumba yangu yikadanikanga nyumba ya kuromba ya ŵanthu wose.

⁸Viyo atiti Ambuya Chiuta, mweniyo wawunjika ŵakutayika ŵaku Yisraele, ndikawunjikanga mbwenu ŵanyake kwaku iyo pade paku wo ŵakuwunjikika kale.”

⁹Imwe mwa vinyama vyose vyamudondo, zani muziparuwe, mwa vinyama vyose mu lisuwa.

¹⁰Ŵalonda ŵake mbachiburumutiya, wose mbambura zeru; wose mbagaru ŵa mbuwu, kuti ŵangabwentha cha; kulota, kugona pasi, kwanja kusiwa.

¹¹Ŵagaru ŵendi nja yanthazi; kuti ŵagutapo nanga nkhamoza cha. Waliska nawo ŵalivi zeru; wose ŵawere ku nthowa yapa mtima wawo, we yose ku kwanduwa kwake wose pamoza.

¹²“Zaninga,” ŵatiti, “tiyeni timwe vinyo, tiyeni tigute ndi vyakuloŵereska; ndipo la mawa likawanga nge ndi msana wale, zuŵa likuru ndi lambura mapimika.”