Read gitonga Yesaya 57 Bible Online

Yesaya 57 - gitonga bible

Yesaya 57

¹Munthu murunji watufwa, ndipo palivi yo waphwereko mu mtima wake; ŵanthu ŵakusopa ŵatoreka, penipo palivi yo wawamo. Pakuti munthu murumji watorekako ku masoka,

²wasere mu chimangu; ŵapumuwa mu vita vyawo wo ŵatenda mu ukongorekwa wawo.

³Kweni imwe, ndereni pano pafupi, mwaŵana ŵa vyanusi, mphapu ya mureŵi ndi wachigololo.

⁴Njani yo mulankha nayo? Mphaku yani po mupambanuliya mlomo weni ukongwa ndi kutuzga lilime linu? Kuti mwe ŵana ŵa wakulakwa cha, mphapu yakufuvya,

⁵imwe mukore ndi malikhumbira mukati mu miti musina mu muti wose uŵisi; imwe mubaya ŵana ŵinu mu madambo, kusi ku malijengwajengwa gha majarawe?

⁶Mukati mu mya ya nkhulungo yamu dambo mwe chigaŵa chinu; iyo, yeniyo pe, ndi mphenduzga yinu; kwaku yo mwadira mpasku wakumwa, mwatoliyako mpasku wa ufwa. Kumbi ndikachetamiskikanga pa vinthu ivi?

⁷Pa phiri litali ndi lakusonthoka mwaŵikapo chita chinu, kwenikuwa munguyako kwachipereka sembe.

⁸Ku msana ku chisasa ndi mphanjizgu za pa khomo mwaŵikako chiziŵisku chinu; pakuti, pakundithaŵa, mwakungunuwa chita chinu, munguruta kwaku chenicho mwachisamiska; mwapangana nawo chifukwa chaku mwaŵeni, mwanja chita chawo, mwalereska pa nkhuli.

⁹Munguto lwendo kuya kwaku Moleki ndi mafuta mungwandaniska vyachema vinu; mungutuma nthumi zinu kutali ukongwa, ndipo mungutuma so chingana nkhu muunda.

¹⁰Munguvuka ndi utali wa nthowa yinu, kweni mwengavi kukamba, kuti, “Palivi gomezgu”; nthazi yinu munguyisaniliya umoyo ufya, chifukwa cho kuti mungulakatuka cha.

¹¹Njani yo mungutenthema ndi kopa, po mwakambanga utesi, ndipo mwengavi kundikumbuka, mwengavi kundighanaghana? Kumbi po ndaja ŵaka cheti ine, kwa nyengo yitali, chifukwa cho kuti mutindopa cha?

¹²Ndikokhomenge gha urunji winu ndivyenivyo muchita, kweni kuti vimovyeninge cha.

¹³Muchibongo chinkhumbu chinu chawangoza chikutaskeni! Mphepo yikaŵaputiskiyanga kunyake, mvuchi ukaŵatolenga kutali. Kweni wakudingang'a mwaku ine wakaharanga charu, ndipo wakaharanga phiri langu lakupaturika.

¹⁴Ndipo kukakambikanga, “Zengani, zengani, rongosoni nthowa, tuzganimo viguŵisku vyose mu nthowa ya ŵanthu ŵangu.”

¹⁵Pakuti viyo watiti wapachanya ndi Mutali yo, mweniyo waja mu umuyaya, yo zina leke ndi Wakupaturika: “Ndija pachanya pa malo ghakupaturika, ndipo so pamoza ndi yo ngwa mtima wakupe ndi wakujiyuyuwa, kusisipuska mzimu wa wakujiyuyuwa, ndi kuyuska so mtima wa wakupe.

¹⁶Pakuti kuti ndikakwiyanga Muyaya cha, chingana nkhuti ndikakaripanga nyengo zose cha; pakuti kwangu ndiku kutuwa mzimu wo, ndipo ndine ndikulenga mvuchi waumoyo.

¹⁷Chifukwa cha kulakwa kwakukhumbira kwake ine ndingukaripa, ndingumukoso, ndingubisa chisku changu ndi ndingukaripa; kweni wangukiyakiya kuwerevuli mu nthowa ya mtima wa mweneko.

¹⁸Ndawona nthowa zake, kweni ndikamuchizganga; ndikamurongozganga, ndi ndikamuwezgiyanga kusangaruka, kuŵachitiya ŵakumutenje chipasi cha milomo yo.

¹⁹Chimangu, chimangu kutali ndipafupi, atiti Ambuya; inya ndikamuchizganga.

²⁰Kweni ŵaheni ŵe nge ndi nyanja yakuputa; yo kuti yipumuwa cha, ndipo maji ghake ghavunduwa ulambwe ndi fuvu.

²¹Kulivi chimangu, watiti Chiuta wangu, ku ŵaheni.”