Read gitonga Yesaya 58 Bible Online

Yesaya 58 - gitonga bible

Yesaya 58

¹“Bongoni ukongwa, kurekezga cha, kwezgani mazu ghinu uli ndi mbata; taulani ku ŵanthu ŵangu mautimbanizi ghawo, ku nyumba yaku Yakobe mauheni ghawo.

²Kweni ŵatindipenja zuŵa ndi zuŵa, ndipo ŵakondwere kuziŵa nthowa zangu, ulaka nge ndi mtundu wo uchita ukongorekwa wo ulivi kujowo malangulu ghaku Chiuta wawo; ŵatindipempha vyeruzgu vya kunyoroka ŵakondwa kundere kwaku Chiuta.

³‘Chifukwa chine tafunga, ndipo iwe kuti utichiwona cha? Chifukwa chine tajorovya ndipo iwe kuti uziŵa ichi cha?’ Ehe, mu zuŵa lakufunga kwinu mupenja vyakumukondwereskani vyakumwija, ndipo muyuzga ŵa nchitu ŵinu wose.

⁴Ehe, mufungiya ndeu pe ndikubayana kupuma ndi nkhonyu ya uheni; kufunga nge nkhwinu msana wale kuti kukachitiskanga mazu ghinu kuti ghavwike kuchanya cha.

⁵Kumbi kufunga ko ndisankha ine nkhwa viyo, zuŵa lakujorovye munthu? Kumbi nkhukotama waka mutu pasi mwa kuthaŵiriya, ndi kutandika chigudulu ndi choto kusi kwake? Kumbi ichi ndichu mungadana kuti nkhufunga, ndi zuŵa lamalondeka ku Ambuya?

⁶“Kumbi kufunga ko ine ndisankha asi ndi uku: kufwatuwa vimangiru vya uheni, kufwatuwa mikoŵa ya gori, kupaska wanangwa ku ŵakuyuzgika, ndi kuswa gori le lose?

⁷Kumbi asi nkhusangana chakurgha ndi wa nja, ndi kutole ŵasauchi ŵambura nyumba mu nyumba yinu; asani muwona wankhuli kumuvwalika, kureka kujibisa mwaŵeni ku mwanasi winu?

⁸Po ndipo ukweru winu ukangwerukanga uli ndi matandakucha, ndipo kuchira kwinu kukazanga ruŵiruŵi; ukongorekwa winu ukamudanjiriyaninga, unkhankhu wa Ambuya ukaŵanga chivekeru cha kuvuli.

⁹Sono mukadananga, Ambuya akamukanga; mukabongonga, iwo akatinge, Nde pano. “Asani mutuzgengemo mukati mwinu gori lo, kurongo ka munwe, ndi kurongoro uheni cha,

¹⁰asani mutijikhutuwa chifukwa chawanja ndi kugutiska makhumbu gha wakuyuzgika, po ndipo ukweru winu ukayukanga mu mdima ndi mukhorwe winu ukaŵanga uli ndi msana-pakati.

¹¹Ndipo Ambuya akamurongozganinge rutaruta, kugutiska khumbu linu ndi vyamampha, kukhomeska viwanga vinu, ndipo mukaŵanga uli ndi munda wakudiriya maji, nge nchisima cha maji, cho maji ghake kuti ghatuphwa cha.

¹²Ndipo mapopa ghinu ghamwaka ghakazengekanga so, mukayuskanga viŵanja vya migonezi yinandi; mukadanikanga ŵakuzinda viliŵa vyakusweka, ŵakuwerezgamo zinyumba mu mapopa.

¹³“Asani mukanizga rundi linu kusabata, kutuwako kukuchita vyakumukondweskani mu zuŵa langu lakupaturika, kudana sabata zuŵa lakukondweska ndi zuŵa lakupaturika la Ambuya kuŵa lakutumbikika; asani mutilitumbika, ndi kureka kwenda mu nthowa zapa mtima winu, pamwenga kupenja vya pa mtima winu vyakumkondweskani, pamwenga kurongoro vyaukata;

¹⁴po ndipo mukakondwerenga mu Ambuya, ndipo ine ndikakugariskaninga pa machanya gha charu chapasi; ndikamuliskaninga ndi chihara chaku Yakobe uskemwe, pakuti Ambuya akamba.”