Read gitonga Yesaya 59 Bible Online

Yesaya 59 - gitonga bible

Yesaya 59

¹Ehe, janja la Ambuya kuti lafupiskika cha, kuti litondeke kutaska, pamwenga gutu lawo kuti ndi zitu cha, kuti lingareka kuvwa;

²kweni mauheni ghinu ndigho ghaŵikapo chipatuwa pakati pinu ndi Chiuta winu, ndipo uheni winu wabisa chisku chake kwaku imwe rekani wareka kuvwa.

³Pakuti manja ghinu ghakazuzgika ndi ndopa ndi minwe yinu ndi uheni; milomo yinu yirondoro mautesi, lilime linu ling'ung'uta utimbanizi.

⁴Palivi yumoza yo wasere pa mlandu mu uneneska palivi yo watiya ku dangu mu ukongorekwa; ŵayegeme pa mpandira uyumu, ŵarongoro mautesi, ŵazuwuka urwani, ndipo ŵapapa mphurupuru.

⁵Ŵasukusa mazira gha khaku, ŵaruka mtatavu wa thandaudi; yo waturgha mazira ghawo watufwa, ndipo lo lasweka likonkhomo chipi.

⁶Mtatavu wawo kuti ukachitikanga saru cha; ŵanthu kuti ŵakajivwalikanga ndi vyo ŵapanga cha. Nchitu zawo ndi nchitu za utimbanizi, machitidu gha nkhaza ghe mu manja ghawo.

⁷Marundi ghawo ghachimbiriya ku uheni, ndipo watinthimikiya kukudira ndopa; maghanughanu ghawo ndi maghanughanu gha mphurupuru, uyiku ndi phasulu vye mu ŵagurwi ŵawo.

⁸Nthowa ya chimangu kuti ŵatiyiziŵa cha, mulivi cheruzgu chirunji mu nthowa zawo; wanyongoloska miseu yawo, palivi yumoza wakwenda mwaku zo yo waziŵa chimangu.

⁹Chifukwa chenichi cheruzgu chirunjiche kutali ndi ifwe, ndipo ukongorekwa kuti utitisaniya cha; tipenja ukweru, ndipo ehe, ndi mdima, tipenja kungweruka, kweni titenda mu munkhorwe.

¹⁰Tipapaska chimati nge ngwachiburumutiya, tipapaska nge ndiwo ŵalivi maso; tiguŵa ndi msana pakati uli ndi mazulo pa kwafipa; mukati mwaku wo mbanthazi kwakufikapo tituŵa uli mbanthu ŵakufwa.

¹¹Tose tiuruma nge ndi nkharamu, tijumajuma uli nkhuliya kwankhunda; tipenjapenja cheruzgu chirunji, kuti chiliko cha; tipenja utaski, kweni we kutali ndi ifwe.

¹²Pakuti mautimbanizi ghidughandana pa maso pinu, mauheni ghidu ghatitipanikizga; inya mauheni ghidu ghe pamoza nafwe, ndipo tiziŵa maukazuzi ghidu:

¹³kutimbanizga, ndi kukana Ambuya, ndipo tituwako kukurondo Chiuta widu, tirongoro kuyuzga ndi chigaruka, tizuwuka utesi mu mitima, ndi kutuzga mazu gha kunyenga pa mlomo.

¹⁴Cheruzgu chirunji chawere vuli, ndipo ukongorekwa utuma kutali kuwa, pakuti uneneska wawa mu maluluwa ghanandi, ndipo urunji kuti ungasere cha.

¹⁵Uneneska usoŵa, ndipo yo watuwako ku uheni watijichita kuŵa chakuliwa. Ambuya anguchiwona ichi ndipo chengavi kuŵakondweska: po kwengavi cheruzgu chirunji.

¹⁶Anguwona kuti pengavi munthu, ndipo ŵanguzizwa po pengavi mwenda pakati; sono janja la mweneko lingumutole kupunda, ndipo ukongorekwa wake ungumuvikiriya.

¹⁷Wavwala ukongorekwa uli nchivekeru chapa mtima, ndi chisoti cha utaski pa mutu wake; wavwala vivwaro vya thayu nge ndi saru, ndipo wajivunga mu ufyu uli nchiphemeska.

¹⁸Kwakulingana ndi nchitu zawo, ndimu ŵakaŵawezgiyanga, ukari ku ŵakupindikana ŵake, kuwezge thayu ku ŵamawongo ŵake; ku vyaru vya mu malikumba gha nyanja wakawezgiyanga nduzga.

¹⁹Viyo ŵakawopanga zina la Ambuya kutuwa ku zambwe, ndi unkhankhu wake kwamba kukutuliya dazi, pakuti wakazanga nge nkhamsinji ka mweza, ko kadikiskika ndi mphepo ya Ambuya.

²⁰“Ndipo akazanga ku Zioni uli ndi Muwombozi, kwaku wo ŵaweko ku utimbanizi mwaku Yakobe,” atiti Ambuya.

²¹“Kweni nge nkhwaku ine, ili ndi phanganu langu ndi iwo, atiti Ambuya: mzimu wangu wo we paku iwe, ndi mazu ghangu gho ndaŵika mu mlomo wako, kuti ghakatuwangamo cha mu mlomo wako, pamwenga kutuwamo mu mlomo wa ŵana ŵako, pamwenga mu mlomo wa ŵana ŵa ŵana ŵako, atiti Ambuya, kwamba kunu ku sono, kurutiliya ku nthazi ndi mpaka ku muyaya.”