Read gitonga Yesaya 61 Bible Online

Yesaya 61 - gitonga bible

Yesaya 61

¹Mzimu wa Ambuya Chiuta wa paku ine, chifukwa Ambuya andipaka ine kutole makani ghamampha mu ŵakuyuzgika; andituma kwachimanga ŵakusweka mtima, kumemeza chifwatuwa ku ŵamagoŵa, ndi kujurika kwa nyumba ya magoŵa kwaku wo ŵakumangika;

²kumemeza chirimika cha lisungu cha Ambuya, ndi zuŵa la thayu laku Chiuta widu; kuzangaruska wose ŵakutenje;

³kunozge wo ŵatenje mu Zioni kuŵapaska vivwalo vyakunozga mu malo mwa vyoto, mafuta gha likondwa mu malo gha kutenje, munjirira wa marumbu mu malo mwa mzimu wakulakatuka; mwakuti ŵadanikenge miti yaukongorekwa, wakupandika ndi Ambuya, alinga kuti akankhuskike.

⁴Ŵakazenganga so mapopa gha mwaka, ŵakayuskanga so maphasulu gha kali; ŵakarongosonga misumba ya kuphwanyika, masara gha migonezi yinandi.

⁵Ŵalendo ŵakamanga ndi kuliska miskambu yinu, ŵanthu ŵa vyaru vinyake ŵakaŵanga ŵalimi ŵinu ndi ŵakurongoso mphereska,

⁶kweni imwe mukadanikanga ŵazukuru ŵa Ambuya, ŵanthu ŵakamukambaninga kuti ŵamirizi ŵaku Chiuta widu; mukarghanga usambasi wa ŵamitundu ndipo mukalankhiyanga mu chuma chawo.

⁷Mu malo mwa soni zinu mukaŵanga navyo kwakusazgiyapo, mu malo ghakuyeyeka mukasekerenga mu phande linu; viyo mu charu chinu mukaŵanga ndi vya uzali wa kaŵi, chinu chikaŵanga chimwemwe cha muyaya.

⁸Pakuti ine Ambuya nditanja cheruzgu chirunji, nditinkha kuba ndi kuchimwa; ndikaŵapaskanga kwamagomekezgeka mphoto yawo, ndipo ndikapangananga nawo phanganu la muyaya.

⁹Mphapu yawo yikaziŵikwanga mukati mu ŵamitundu, ndi ŵana ŵawo mukati mu ŵanthu ŵa mitundu yose; wose ŵakuwawona ŵakaŵaziŵanga, kuti iwo mbanthu wo Ambuya atumbika.

¹⁰Ndikakondwerenga ukongwa mu Ambuya, mzimu wangu ukajikuzgiyanga mwaku Chiuta; pakuti wandivwarika vivwalo vya chipozomosku, wandivwinkha ndi munjirira wa ukongorekwa, uli ndimo mweni nthengwa watijivwarikiya vivwalo vyakunozga nge ndimo mwali wa nthengwa watijinozge ndi vyakung'anima.

¹¹Pakuti mo charu chapasi chituzgiya mumera wake, ndipo nge ndimo munda umezge vyo vyamijikamo, viyo so ndimu Ambuya Chiuta wakamezgiyanga ukongore kwa ndi rumbu pa maso pa mitundu yose.