Read gitonga Yesaya 62 Bible Online

Yesaya 62 - gitonga bible

Yesaya 62

¹Pa chifukwa cha Zioni kuti ndikachetamanga cha, pa chifukwa cha Yerusalemu kuti ndikapumuwanga cha, mpaka penipo uneneska wangu ukaŵalanga mwaku wo, ndipo kutaskika kwake uli ndi lumbuni lakukole.

²Mitundu yikawonanga uneneska winu, ŵakaronga wose unkhankhu winu; ndipo mukadanikanga ndi zina lifya lenilo Ambuya akapaskanga.

³Mukaŵanga chilemba cha ufumu chakutowa mu janja la Ambuya, ndi chisoti cha ukaronga mu janja laku Chiuta winu.

⁴Kuti mukadanikanga so Ŵakujoworeka cha ndipo charu chinu kuti chikadanikanga Mapopa cha; kweni mukadanikanga likondwa Langu le mwake (Hefiziba), ndi charu chinu Wakuŵirwa (Beula); pakuti Ambuya akondwere mwaku imwe, ndipo charu chinu chikaŵirwanga.

⁵Pakuti mo munyamata watole mwali, viyo ŵana ŵinu ŵakatonga imwe, nge ndimo mweninthengwa wakondwe pa mwali yo wato, viyo so ndimu Chiuta wakondwere paku imwe.

⁶Ndaŵikapo ŵalonda pa malinga ghako, Yerusalemu we, msana wose ndi usiku wose kuti wakachetamanga cha. Imwe muŵika Ambuya mu chinkhumbu chinu, mungapumuwanga cha,

⁷ndipo mungamupaskanga kupumuwa cha mpaka penipo wazenga Yerusalemu ndi kumuchita rumbu mu charu chapasi.

⁸Ambuya arapa ndi janja lawo lakurghiya ndi janja lawo lanthazi: “Kuti ndikapaskanga so mbutu yinu cha kuŵa chakurgha cha ŵarwani ŵinu, ndipo ŵamwenda nthowa kuti ŵakamwanga vinyo winu cha yo mwajitakatakiya mwaŵeni;

⁹kweni wo ŵatiyiwunjika ndiwo ŵakarghanga ndi kurumba Ambuya, ndipo wo ŵatimuwunjika pamoza ndiwo ŵakamumwanga mu maluluwa gha nyumba yakupaturika.”

¹⁰Porotani, porotani mu vipata, rongosoni nthowa ya ŵanthu, zengani, zengani ŵagurwi, tuzganimo mya, soskani mbendera pa mitundu ya ŵanthu.

¹¹Ehe, Ambuya amemeza mpaka ku chigoti cha charu chapasi: Kamba ku ŵanthu ŵaku Zioni, “Ehe mtaski winu watuza, awonani, wapinga mphoto yeniyo wakakuwomboliyaninga nayo.”

¹²Ndipo ŵakadanikanga ŵanthu Ŵakupaturika, Ŵakuwomboleka ŵa Ambuya; ŵanthu ŵakupenjeka, Muzi wambura kusiyika.