Read gitonga Yesaya 63 Bible Online

Yesaya 63 - gitonga bible

Yesaya 63

¹Njani uyu yo watuwa ku Edomo, mu vivwalo vyakuchesama vyakutuwa ku Bozra, ndi mweniyo ngwa unkhankhu mu kuvwara wakwenda mu ukuru wa nthazi zake? “Ndine, nditaula uneneska, ndawanthazi kutaska.”

²Chifukwa chine vivwalo vyako vyachesama, maraya ghako uli ngaku yo wakanda mphereska?

³“Ndakanda mphereska ndija mu mbuli, ndipo pengavi munthu yumoza yo wenga pamoza nane, ndinguzikanda mu ukari wangu, ndinguziphwata mu kukara kwangu; viyo ndipo za umoyo wawo zaŵalikiya mu maraya ghangu, ndipo zazumbwiska vivwalo vyangu.

⁴Pakuti zuŵa la thayu lenga mu mtima wangu, chirimika changu cha uwombozi chafika.

⁵Ndingulereska, mweni pengavi yumoza wakovya; ndingopa ukongwa kweni pengavi wakuvikiriya; viyo janja laku ndamweni lingunditole kupunda, ndipo ukari wangu ungundivikiriya.

⁶Ndinguŵakandirizga pasi ŵanthu mu ukari wangu, ndinguŵalowereska mu kukwiya kwangu, ndipo ndingudira ndopa za umoyo wawo pa charu chapasi.”

⁷Ndikakambanga so za chanju chizirima cha Ambuya, marumbu gha Ambuya, kwakulingana ndi vyose vyo Ambuya atipaska, ndi umampha ukuru ku nyumba yaku Yisraele, weniwo apaska kwakulingana ndi lisungu lawo, kwakulingana ndi chanju chawo chizirima.

⁸Pakuti anguti, Kwakuneneska mbanthu ŵangu, ŵana wo kuti ŵakachitanga kwakupusika cha; ndipo iyo wanguŵa Mtaski wawo.

⁹Mu kuyuzgika kwawo kose iyo nayo wanguyuzgika, kweni mungelo wakuma pa maso pake wanguŵataska; mu chanju chake ndi chitima chake wanguŵawombo; wanguŵasoska ndi kuŵanyamuwa mazuŵa ghose gha kali.

¹⁰Kweni ŵangugaruka ndi kukaraliska Mzimu wake wakupaturika; viyo ŵangung'anamuka wanguŵa mphindikwa yawo, ndipo iyo mweneko wangurwana nawo.

¹¹Mweni wangukumbuka mazuŵa gha kali, mazuŵa ghaku Mosese muŵanda wake. Ŵepani yo wangukwezga kutuwa mu nyanja ŵaliska ŵa muskambu? Wepani yo wanguŵika mukati mwawo Mzimu wake utuŵa,

¹²mweniyo wangutambaruwa janja lake la unkhankhu kuruta ku janja la marghe laku Mosese, mweniyo wangugawuwa maji paurongo pawo kujichitiya mweneko zina la muyaya,

¹³njani wanguŵarongozga mu zindimba? Nge ndi kavalo mu bozwa, kuti ŵanguguŵa cha.

¹⁴Uli ndi ngombe zo zisikiya mu dambo, Mzimu wa Ambuya unguŵapaska chipumulu. Viyo ndimu mungurongozge ŵanthu ŵinu, kujichitiya mwaŵeni zina la unkhankhu.

¹⁵Lereskani pasi kutuliya kuchanya, muwone, kutuliya uja winu utuŵa ndi wa unkhankhu. Kumbi lepani phamphu linu, ndi kulimba kwinu? Linweka la mtima winu ndi chifundu chinu, vyatuzgikako kwangu.

¹⁶Pakuti imwe ndimwe Auskefwe, chingana Abrahamu wareka kutiziŵa ifwe, ndipo Yisraele kuti watitipanikizga cha; imwe Ambuya, ndimwe mwe Auskefwe, Muwombozi widu ndilo zina linu kutuliya ku mwaka.

¹⁷Ambuya mwe, chifukwa chine mutitichitiska kusovya ku nthowa yinu, ndi kunonopeska mitima yidu, kuti tireke kumopani imwe? Weni chifukwa cha ŵaŵanda ŵinu, mafuku ghakumwaŵeni.

¹⁸Ŵanthu ŵinu ŵakupaturika ŵanguja mu malo ghinu ghatuŵa nyengo yimanavi; ŵakupindikana ŵidu ŵaghapwatiya pasi.

¹⁹Taŵa ulaka ndi wo imwe mulivi kuŵawusapo, nge ndi wo ŵalivi kudanikapo kuti mbaku mwaŵeni.