Read gitonga Yesaya 65 Bible Online

Yesaya 65 - gitonga bible

Yesaya 65

¹Ndenga wakurongosoleka kupenjeka ndi wo ŵengavi kundifumbiriya; ndenga wakurongosoleka kusanirika ndi wo ŵengavi kundipenja. Ine ndinguti, “Ndine pano, ndine pano,” ku mtundu weniwo wengavi kudana pa zina langu.

²Ndingutambaruwa manja ghangu zuŵa lose ku ŵanthu ŵakugaruka, wo ŵatenda mu nthowa yo kuti njamampha cha, ŵakurondo fundu zaŵeneko ŵija;

³ŵanthu wo ŵatindisosomo ku maso ghangu kwamkiyakiya, ŵakusaska chisopo mu minda ŵakocha vyachema pa nchelwa;

⁴wo ŵaja mu miunda, ndipo ŵacherezga usiku wose mu malo gha kuwubende, wo ŵaturgha nyama ya nkhumba, ndipo kusazga kwa vinthu vya ukazuzi kwe mu viyaŵi vyawo;

⁵ŵeniwo ŵatiti, “Ujiwone wamweni, reka kuza kufupi kwangu, pakuti ndi kuŵikika pakundija kwaku iwe.” Yaŵa ndi usi mu mphunu zangu, moto wo unyeka zuŵa lose.

⁶Ehe, chikulembeka paurongo pangu; “Kuti ndikachetamanga cha ndikawerezgiyangapo, inya, ndikawerezgiyangapo mu chifuŵa chawo,

⁷maulakwi ghawo ndi maulakwi gha auskewo pamoza nawo, atiti Ambuya; chifukwa ŵangocha vyachema pa mapiri ndi kundituka pa mapiri pachanya, mu chifukwa cha machitidu ghawo ghakudanga ndikaŵapimiyanga mphoto yapa chifuŵa chawo.”

⁸Viyo atiti Ambuya: “Uli ndimo vinyo wasanirikiya mu khoroza, ndipo watiti, ‘Mungalinanga cha, pakuti mwe chitumbiku mukati mwake,’ viyo so ndikachitanga chifukwa cha mteŵeti wangu kuti ndi kaŵamaranga wose cha.

⁹Ndikatuzganga mphapu mwaku Yakobe; ndi mwaku Yuda wakuhara mapiri ghangu; ŵakusankhika ŵangu ŵakaharanga, ŵateŵeti ŵangu ŵakajanga mwenimuwa.

¹⁰Sharoni wakasandukanga uliska wa miskambo, ndi chinkhwau cha Akoro[8] malo gha kugonamo miskambo ya ŵanthu ŵangu wo ŵatindipenja.

¹¹Kweni imwe mupata Ambuya, imwe mwaruwa phiri langu lakupaturika, imwe mumika gome chifukwa cha Mwaŵi muzaza vyandi vya vinyo wakusazga kuzaziya Nyifwa;

¹²ine ndikakurongosoliyaninga ku lipanga, ndipo imwe mose mukakotamiyanga pasi kubayika; chifukwa, penipo ndingudana, kuti mungwamuka cha, po ndingurongoro, kuti mungutegherezga cha, kweni mukuchita cho chenga uheni mu maso ghangu, mungusankha cho ine ndengavi kukondwa nacho.”

¹³Chifukwa chenichi atiti viyo Ambuya Chiuta: “Ehe, ŵateŵeti ŵangu ŵakarghanga, kweni imwe mukaŵanga ŵanja; ehe, ŵateŵeti ŵangu ŵakamwanga, kweni imwe mukaŵanga ŵanyota; ehe, ŵateŵeti ŵangu ŵakakondwanga, kweni imwe mukalengeskekanga;

¹⁴ehe, ŵateŵeti ŵangu ŵakambanga mu chimwemwe cha mtima kweni imwe mukaliyanga chifukwa cha kuŵaŵa kwa mtima, ndipo mukatenjenga chifukwa cha suzgu ya mzimu.

¹⁵Mukajowolenga zina linu kuti litembeke ndi ŵakusankhika ŵangu, ndipo Ambuya Chiuta akuperekaninga ku nyifwa; kweni ŵateŵeti ŵake wakaŵadananga zina linyake.

¹⁶Viyo kuti yo watijitumbika mu charu wakajitumbikanga mwaku Chiuta wa uneneska, ndipo yo wachita rapu mu charu wakarapiyanga mwaku Chiuta wa uneneska; chifukwa masuzgu ghakudanga gharuwika ghabisika kwangu ku maso.

¹⁷“Pakuti ehe, ndilenga machanya ghafya ndi charu chapasi chifya; ndipo vinthu vyakudanga kuti vikakumbukikanga cha, pamwenga kuvighanaghana.

¹⁸Kweni mukasekerenga ndi kukondwere muyaya mwaku cho ndilenga; pakuti ehe, ndilenga Yerusalemu kuŵa likondwa, ndi ŵanthu ŵake kuŵa ndi chimwemwe.

¹⁹Ndikakondwanga mu Yerusalemu ndikasekerenga mu ŵanthu ŵangu; chiwawa cha kuliya kuti chikavwikanga so cha mwaku iyo ndi kuliya kwa masuzgu.

²⁰Kuti mukawonekanga so litema lakuja lamoyo mazuŵa ghamanavi cha muwa, pamwenga khongwe lambura kufiska mazuŵa ghake, pakuti mwana wakafwanga wachiŵa mura wa virimika machumi pe chumi, ndipo muheni wa ura wa virimika machumi pe chumi wakaŵanga wakutembeka.

²¹Ŵakazenganga zinyumba ŵakajanga mwaku zo; ŵakapandanga minda ya mphereska ndi kurgha vipasi vyake.

²²Kuti ŵakazenganga ndi kujamo munyake cha; kuti ŵakapandanga kuti warghenge ndi munyake cha; pakuti nge ndi mo ghaliri mazuŵa gha muti ndimu ghakaŵiyanga mazuŵa gha ŵanthu ŵangu, ndipo ŵakusankhika ŵangu ŵakakondwanga nyengo yitali ndi nchitu ya manja ghawo.

²³Kuti ŵakatakatakanga kwa ŵakacha, pamwenga ŵana ŵakupapiya chisungu cha; chifukwa ŵakaŵanga ŵana ŵakutumbikika ŵa Ambuya ndi ŵana ŵawo pamoza nawo.

²⁴Ŵenga ŵandadane, ine ndamukenge, penipo ŵeche kurongoro, ine ndikavwanga.

²⁵Mphumphi ndi mwana wa mberere vikarghiyanga pamoza, nkharamu yikarghanga uteka nge ndi ng'ombe; fuvu likaŵanga kurgha kwa njoka. Kuti vikapwetekanga pamwenga kwananga cha, mu phiri langu lose lakupaturika, atiti Ambuya.”