Read gitonga ŴaLevi 11 Bible Online

ŴaLevi 11 - gitonga bible

ŴaLevi 11

¹Ndipo Ambuya anguti kwaku Mosese ndi Aroni,

²“Kambani ku ŵaYisraele, Izi ndi nyama zo mukarghanga kutuwa mu nyama zose zo ze pa charu cha pasi.

³Nyama zo zose za chikandiru chakugaŵikana ndi marundi ghakugaŵikana ndi zakusumbiya pa kurgha, mukarghanga.

⁴Kweni mwaku zo zisumbiya pamwenga zakugaŵikana chikandiru zo mukarekanga kurgha ndi izi: Gamila chifukwa chingana wasumbiya pa kurgha kweni kuti wakugaŵikana cha chikandiru chake, ngwa munguzgu kwinu.

⁵Godi, chifukwa chingana wasumbiya kurgha kweni kuti wagawuwa cha chikandiru chake, ngwa munguzgu kwinu.

⁶Kalulu, chifukwa chingana wasumbiya kurgha kweni kuti wagawuwa chikandiru chake cha, ngwa munguzgu kwinu.

⁷Ndi nkhumba, chifukwa chingana yigawuwa chikandiru chake, ndipo marundi ghake ghakugaŵikana, kweni kuti yisumbiya cha kurgha, nja munguzgu kwinu.

⁸Nyama yaku zo mungarghanga cha, ndipo thupi laku zo mungalikwaskanga cha; za munguzgu kwinu.

⁹“Mwaku vyose vyo vye mu maji, vyo mukarghanga ndi ivi: che chose cho che ndi chiphephe, ndi mamba manyi ndi mu zinyanja, pamwenga mu misinji, mukarghanga.

¹⁰Kweni chose cho che mu zinyanja pamwenga mu misinji, cho chilivi chiphephe, ndi, mamba, ncha munguzgu kwinu.

¹¹Vikajariliyanga kuwa vya munguzgu kwinu; nyama yaku vyo mungarghanga cha, ndi thupi laku vyo nda munguzgu.

¹²Che chose cha mu maji cho chilivi chiphephe ndi mamba nchikazuzi kwinu.

¹³“Ndipo viyuni ivi vya munguzgu kuti vikarghikanga cha; nombo, khuŵi, nkhwazi,

¹⁴kamuntheŵeza, kaŵandu, wa mtundu wose,

¹⁵chaholi wa mtundu wose,

¹⁶ositirichi, manchinchi, mbuye, kabaŵi wa mtundu wose,

¹⁷phululu, muswankhono, tofu,

¹⁸nkhukuruzu, sekwe, ngalo,

¹⁹baka, kakoŵa mtundu wake wose, kataŵa, ndi kasusa.

²⁰“Vizimu vyose vyakuŵa ndi mapapa vyo vitende marundi ndi mapapiku vikazuzi kwinu.

²¹Kweni so mu vizimu vya mapapa vyo vitenda ndi marundi ndi mapapiku murghenge vyo vye ndi marundi ghakujwanthiya pasi.

²²Mwaku vyo mukarghanga ndi ivi: zombe wa mtundu we wose, zombe wa phala mu mtundu wake wose, chenje mu mtundu wose ndi manduŵa mu mtundu wake wose.

²³Kweni vinyake vyose vyakuwa ndi mapapa ndi marundi ghanayi vya munguzgu kwinu.

²⁴“Ndipo chifukwa chaku ivi mukakazuzgikanga; yose wakuko thupi lake wakaŵanga wakunguzgika mpaka mazulo,

²⁵ndipo we yose wakunyamuwa kachiŵaru ke kose ka thupi lawo wakachapanga saru zake, ndi wakaŵanga wakunguzgika mpaka mazulo.

²⁶Nyama yose yakugawuwa chikandiru, ndipo yilivi kugaŵikana marundi pamwenga kuti yisumbiya cha, njikazuzi kwinu. Munthu we yose wakuzikwaska yo wakaŵanga wakunguzgika.

²⁷Ndipo mukati mu vinyama vyakwende marundi ndi manja, vyose vyakwende njoŵe vya munguzgu kwinu, munthu yose wakukwaska thupi laku vyo wakaŵanga wakunguzgika mpaka mazulo.

²⁸Ndipo yo wanyamuwa thupi laku vyo wakachapanga saru zake ndipo wakaŵanga wakunguzgika mpaka mazulo; vyamunguzgu kwinu.

²⁹“Mu vyakukwaŵa vyose vyo vikwaŵa pa charu chapasi, vyamunguzgu; msuru, mbeŵa, gwarawala mtundu wake wose.

³⁰Gondwa, kaŵaŵa, mtondoni, burumuti, ndi lwenda.

³¹Ivi vyamunguzgu kwinu mu vyakwandana vyose vyakukwaŵa; yose wakuvikwaska po vyafwiya wakaŵanga wakunguzgika mpaka mazulo.

³²Ndipo ke kose ko chakufwa cho chawiyapo, kakaŵanga ka munguzgu manyi nkhamuti pamwenga chakuvwara; pamwenga chikopa pamwenga chigudulu, chiyaŵi che chose chakutataliyamo ke kose katenere kubizgika mu maji ndipo kakaŵanga kakutozgeka.

³³Ndipo asani chakukwaŵa chaviyo chiwiya mu chiyaŵi cha dongo, vinthu vyose vyo vye mukati vikaŵanga vya munguzgu ndipo mukaswanga chiyaŵi cho.

³⁴Chakurgha chakuwamo mwaku cho chingaziŵa kurghika, nanga chingasukika ndi maji chikaŵanga cha munguzgu; ndipo chakumwa che chose cha mu chiyaŵi cha viyo chikaŵanga cha munguzgu.

³⁵Ndipo chinthu chose po pangawa kachiŵaru ka chakufwa cho, chinthu cho chikaŵanga cha munguzgu, ndipo chikaŵanga cha munguzgu kwinu.

³⁶Kweni mu chisima pamwenga mu beseni mo mwe maji vikaŵanga vyakuphotoka; kweni chose chakukwaska thupi laku vyo chikaŵanga cha munguzgu.

³⁷Ndipo asani chiŵaru chose cha thupi laku vyo chiwiya pa mbeu yakupanda, njakutozgeka;

³⁸kweni asani maji ghadirika pa mbeu, sono chiŵaru che chose cha thupi la chakufwa cho chawapo, iko njamunguzgu kwinu.

³⁹“Ndipo asani nyama yose yo mungargha yafwa, yo wakwaskenge thupi lake, wakaŵanga wakunguzgika mpaka mazulo, ndipo wakunyamuwa thupi lo nayo wakachapanga saru zake, wakaŵanga wakunguzgika mpaka mazulo.

⁴⁰Yo wakayirghanga nayo so wakachapanga saru zake, ndipo wakaŵanga wakunguzgika mpaka mazulo.

⁴¹“Chamoyo chose chakukwaŵa pa charu chapasi nchamunguzgu; chingarghikanga cha.

⁴²Che chose chakukwaŵiya pamoyo ndi chose chakwende marundi ndi manja, pamwenga chose chakuŵa ndi marundi ghanandi, vinthu vyose vyakukwaŵa pa charu chapasi kuti mukarghanga cha; pakuti vyamunguzgu.

⁴³Mungajikazuzganga cha ndi vinthu vya kukwaŵa vyo vikwaŵa, mureke kujikazuzga ndi vinthu vyo, vinu mungaŵa wakunguzgika.

⁴⁴Pakuti Ine nde Ambuya Chiuta winu; viyo mujipatuwe mwija, muŵe ŵatuŵa pakuti Ine nde mtuŵa. Mureke kujikazuzga ndi chinthu chose chakukwaŵa cho chikwaŵa pa charu chapasi.

⁴⁵Pakuti Ine nde Ambuya wo angukutuzgani mu charu cha Egipiti, kuŵa Chiuta winu; chifukwa chenichi mukaŵanga ŵatuŵa, pakuti Ine nde mtuŵa.”

⁴⁶Ili ndi dangu lapa nyama ndi chiyuni ndi chamoyo chose chakwendendeka mu maji ndi chinthu chose chakukwaŵa pa charu chapasi,

⁴⁷kupambaniska pakati pa vya munguzgu ndi vyakuphotoka, ndi chamoyo cho nchamarghika ndi cho nchambura kurghika.