Read gitonga ŴaLevi 17 Bible Online

ŴaLevi 17 - gitonga bible

ŴaLevi 17

¹Ndipo Ambuya anguti kwaku Mosese,

²“Ukambe kwaku Aroni ndi ŵana ŵake, ndi ku ŵaYisraele wose kuti Ambuya alangula, kuti.

³Asani munthu wa nyumba yaku Yisraele wabaya ng'ombe pamwenga mberere pamwenga mbuzi mu ugoŵi, pamwenga watiyibayiya kubwalo kwa ugoŵi,

⁴ndipo kuti watuza nayo ku khomo la chihema chakuwunganamo cha, kwachiyipereka kuŵa cha wezi ku Ambuya paurongo pa chihema cha Ambuya, munthu yo wakatamulikanga kuŵa wakulakwiya ndopa; wadiska ndopa; munthu yo wakadumulikangako ku ŵanthu ŵake.

⁵Uku nkhuti ŵaYisraele ŵatoliyenge sembe zawo zo ŵabayiya kubwalo, alinga ŵazitoliyenge zo ku Ambuya ku mzukuru pa khomo la hema lakuwunganamo, ŵazibaye kuŵa mipasku ya chimangu ku Ambuya;

⁶ndipo mzukuru wakawazganga ndopa pa jochero la Ambuya, pa khomo la hema lakuwunganamo, ndi kocha mafuta kuŵa mununkhu wakukondweska Ambuya.

⁷Viyo kuti ŵakabayiyanga so sembe zawo ku vikozgu cha, kwaku vyo ŵagarukiyako. Ili likaŵanga langulu muyaya kwaku wo mu migonezi yawo yose.

⁸“Ndipo ukatinge kwaku wo, munthu yose wa nyumba yaku Yisraele pamwenga ya ŵalendo ŵakutandala mukati mwawo, yo wapereka sembe yakocha pamwenga mpasku,

⁹kwambura kuza nayo ku khomo la hema lakuwunganamo, kuyipereka ku Ambuya; munthu yo wakadumulikangako ku ŵanthu ŵake.

¹⁰“Asani munthu wa nyumba yaku Yisraele pamwenga ya ŵalendo ŵakutandara mukati mwawo waturgha ndopa ze zose, ndikamikananga nayo munthu yo, ndipo ndikamudumuwangako ku ŵanthu ŵake.

¹¹Pakuti umoyo wa liŵavu ndi ndopa; reka ndazisankha kuŵa zakupepeske pa jochero chifukwa chinu: ndi ndopa, ndizo umoyo, ndizo zichita mphepeska.

¹²Chifukwa cho ndaŵanene ŵaYisraele, paulevi munthu wa mukati mwinu yo wakarghanga ndopa chingana ndi mulendo wakutandara mukati mwinu.

¹³Ndipo yose wa ŵaYisraele, pamwenga ŵalendo ŵakutandara mukati mwawo pakusaka asani wabaya nyama pamwenga chiyuni vyo waturgha wadire pasi ndopa zake ndi kuziwunda ndi dongo.

¹⁴“Pakuti umoyo wa chamoyo chose ndi ndopa zake, chifukwa cho ndaŵanene ŵaYisraele, kuti, Mungarghanga cha ndopa za chamoyo chose, pakuti umoyo wa chamoyo chose ndi ndopa zake; we yose yo wakazirghanga wakadumulikangako.

¹⁵Ndipo munthu yose yo wakarghanga chakufwa chija; pamwenga cho chabayika ndi vikoko manyi yo munthu ndi mwenicharu pamwenga ndi mwendathowa wakachapanga vivwaru vyake wakasambanga mu maji, ndi kuŵa wakunguzgika mpaka mazulo; pavuli wakatozgekanga.

¹⁶Kweni asani walivi kuvichapa pamwenga kusamba liŵavu lake wakapinganga ulakwi wake”.