Read gitonga ŴaLevi 19 Bible Online

ŴaLevi 19 - gitonga bible

ŴaLevi 19

¹Ndipo Ambuya anguti kwaku Mosese,

²“Nena ku mpingu wose wa ŵaYisraele kuti, Mukaŵanga ŵatuŵa; pakuti Ine Ambuya Chiuta winu nde mutuŵa.

³Munthu yose waku imwe watumbike nyina ndi wiske, ndipo musungenge masabata ghangu. Ndine Ambuya Chiuta winu.

⁴Mungang'anamukiyanga ku ŵangoza pamwenga kujisongonole ŵachiuta cha: Ndine Ambuya Chiuta winu.

⁵“Muchipereka sembe ya chimangu ku Ambuya, mukayiperekanga viyo kuti murondereke.

⁶Mukayirghanga muzuŵa lenilo mwayipereke, pamwenga ndi mlenji: che chose chakujako chakufika pa zuŵa la chitatu chocheke ndi moto.

⁷Asani charghika pa zuŵa la chitatu mbukazuzi, Kuti chikaronderekanga cha,

⁸ndipo yose yo wakachirghanga wakapinganga ulakwi wake, pakuti wakazuzga chinthu chakupaturika cha Ambuya; munthu yo wakadumulikangako ku ŵanthu ŵake.

⁹“Muchivuna vuna ya charu, kuti mukavunanga munda winu kufika ku mphaka yake cha, chingana nkhuyora mbuwa cha pavuli pa chivuna chinu.

¹⁰Mungayoranga teteti cha munda winu wa mphereska, pamwenga kutondo mphereska zo zawa pasi mu munda winu; muzireke kusiyiyiya mukavu, ndi mlendo, Ndine Ambuya Chiuta winu.

¹¹“Mungabanga, chingana nkhuchita kwakupusika cha, chingana nkhunenerana ndi munyinu utesi.

¹²Mungarapanga ndi zina langu kwakupusika cha, kukazuzga zina laku Chiuta winu: Ndine Ambuya.

¹³Mungayuzganga muzenegezgani winu cha; pamwenga kumubiya. Malipilo gha wanchitu mungaghasunganga usiku wose mpaka ku mlenji cha.

¹⁴Mungatembanga wambuwu, pamwenga kuŵika chakuguŵamo paurongo pa wachiburumutiya cha, kweni mopenge Chiuta winu; Ndine Ambuya.

¹⁵“Mungapenevyanga mu cheruzgu. Mungayeyanga mukavu; pamwenga kupayika mrando wa wakuzirwa kweni mu ukongorekwa ndimo mweruzgiyenge muzengezgani winu.

¹⁶Mungaŵanga ŵamwendanato cha mukati mu ŵanthu ŵinu, ndipo mungachitanga ukaboni wa kupusika cha pa umoyo wamuzengezgani winu. Ndine Ambuya.

¹⁷“Mungatinkhanga mwana munyinu mu mtima winu cha, kweni mukambiskanenge kwakujarikana umampha ndi muzengezgani winu, vinu mungatopo ulakwi chifukwa chake.

¹⁸Mungatayanga thayu pamwenga kunola ŵana ŵa ŵanthu ŵinu, kweni mwanjenge munyinu nge ndimwe mwaŵeni. Ndine Ambuya.

¹⁹“Musungenge malangulu ghangu. Mungazomerezganga ng'ombe zinu kwandana ndi ng'ombe za mitundu yinyake. Mungapandanga munda winu ndi za mitundu yiŵi cha; chingana nkhuti muvwarenge chakuvwara cha saru yakuŵa ndi mitundu yiŵi.

²⁰“Asani munthurumi wala ndi munthukazi yo ndi muŵanda, wakujaririka ndi munthurumi munyake kweni ngwambura kuwomboleka, paŵe mrando, kuti wakabayikanga cha chifukwa munthukazi kuti wenga mwanangwa cha:

²¹kweni munthurumi wakazanga ndi sembe yapa mrando wake ku Ambuya ku khomo la hema lakuwunganamo, bira wa sembe yapa mrando wa ulakwi.

²²Ndipo mzukuru wamupepeskiyenge ndi bira wa sembe yapa mrando paurongo pa Ambuya, chifukwa cha ulakwi wake wo wachita. Ndipo ulakwi wo wachita ugowokerekenge kwaku iyo.

²³“Mutakuti mwafika mu charu cho ndi kupanda mitundu ya miti yose ya vipasi vyakurgha, sono mukaŵerenganga vipasi vyake uli ndimo vikukanizgikiya; pa virimika vitatu vikakanizgikanga kwaku imwe; mungarghanga vyo cha.

²⁴Mu chirimika cha chinayi vipasi vyawo vyose vikaŵanga vyakupaturika, sembe ya kurumba ku Ambuya.

²⁵Kweni mu chirimika cha chinkhonde murghenge vipasi vyawo, alinga kuti miti yimupasiyeninge vyakuzala: Ndine Ambuya Chiuta winu.

²⁶“Mungarghanga nyama ndi ndopa zake cha. Mungachitanga chanusi ndi ufwiti cha.

²⁷Mungametanga vizingiriya pa njegheyu zinu cha, pamwenga kudumuwa songo ya myembe yinu.

²⁸Mungatemanga ke kose mu liŵavu linu chifukwa cha wakufwa cha pamwenga kutema simbu paliŵavu: Ndine Ambuya.

²⁹“Mungawozganga mwana winu munthukazi ndi uhuli cha, vinu charu chingasanduka chireŵi, ndi chingazaza utimbanizi.

³⁰Mu sungenge masabata ndi kutumbika nyumba yangu: Ndine Ambuya.

³¹Mungawombezanga pamwenga kuchita vyanusi, mungavipenjanga ivi cha vinu vingamukazuzgani: Ndine Chiuta winu.

³²“Muperekenge ulemu ku khongwe la nyivu, mutumbikenge ŵanthu ŵara, ndipo mopenge Chiuta winu, Ndine Ambuya.

³³“Asani mlendo watandara namwe mu charu chinu, mungamuchitiyanga phuzu cha.

³⁴Mlendo wakutandala namwe, wakaŵanga namwe uli ndi mweni charu, mukamwanjanga uli ndimo mutanjirana mwaŵeni. Pakuti imwe mwenga ŵalendo mu charu cha Egipiti. Ndine Ambuya.

³⁵“Mungapenevyanga cheruzgu cha, manyi ndi myeso yamu utali, manyi ndi mu uzitu, pamwenga mu unandi wa vinthu.

³⁶Muŵenge ndi vyakupima vyambura kupusika, mweso wakuneneska pakwesa vyakurgha ndi vyakumwa. Ndine Ambuya Chiuta winu, yo wangukutuzgani mu charu cha Egipiti.

³⁷Ndipo musungenge malangulu ghangu ghose ndi vyeruzgu vyangu vyose, ndi kuvichita. Ndine Ambuya.”