Read gitonga ŴaLevi 24 Bible Online

ŴaLevi 24 - gitonga bible

ŴaLevi 24

¹Ambuya angunena ndi Mosese,

²“Langula ŵaYisraele kutole kwako mafuta gha Olive gho ghakukozge nyali, alinga kuti nyali yikolenge kwakukiyakiya kwambura kuzimwa.

³Kubwalo ku chivwinkhu chakuchinga cha chisimikizgu, mu hema lakuwunganamo, Aroni wakayipwerenga umampha paurongo pa Ambuya kutuwa mazulo mpaka mlenji kwambura kureka. Likaŵanga langulu muyaya mu migonezi yinu yose.

⁴Wakayiphwerenga umampha nyali pa vyakumapo vyake vya golide paurongo pa Ambuya rutaruta.

⁵“Ndipo mukatonga ufwa wamampha, ndi kocha tuviŵande chumi ndi tuŵi, ke kose ka ufwa wa vigaŵa viŵi vya vigaŵa chumi vya mweso wa sokora.

⁶Ndipo mukatuŵikanga mu mizere yiŵi; tunkhonde ndi kamoza mu mzere umoza, pa gome la golide wakwengeka.

⁷Ndipo mukaŵikangapo vya chema vyakufikapo mu mzere ndi mzere, alinga kuti vikiyenge pamoza ndi chiŵande nge nchigaŵa cha chikumbusku cha mpasku wapa moto ku Ambuya.

⁸Pa sabata ndi sabata, Aroni wakarongosoriyanga kwa muluriku paurongo pa Ambuya kwambura kurekezga kuŵachitiya ŵaYisraele. Ichi chiŵenge phanganu la muyaya.

⁹Ivi vikaŵanga vyaku Aroni ndi ŵana ŵake, ndipo ŵakavirghiyanga mu malo ghakupaturika, pakuti kwaku iyo, nchigaŵa chakupaturika, kutuwa pa vyakupereka vyapa moto ku Ambuya. Ili ndi phanganu la muyaya.”

¹⁰Sono mwana munthurumi wa munthukazi muYisraele, yo wiske wake wenga mwina Egipiti, wanguruta mukati mu ŵaYisraele. Sono iyo ndi munyake muYisraele ŵangubayana mu ugoŵi,

¹¹ndipo mwana wa munthukazi yo muYisraele wangusakaza zina la Ambuya ndi wangutemba. Viyo wanguza nayo kwaku Mosese. Zina la nyina wake lenga Shelomiti mwana munthukazi waku Dibri wa fuko laku Dani.

¹²Ndipo wangumuŵika mu nyumba ya magoŵa kulindizga mpaka penipo Ambuya aŵaziŵiska cho akhumba.

¹³Ambuya anguti kwaku Mosese,

¹⁴“Mutuzgeni mu ugoŵi yo wangutemba; ndipo wose wo ŵangumuvwa ŵaŵike manja ghawo pa mutu wake, ndipo ŵanthu wose wa mpingu wo ŵamudine ndi mya.

¹⁵Ndipo ukambe ku ŵaYisraele kuti yose wakutuka Chiuta wake wakalakwanga.

¹⁶Yo watuka zina la Ambuya wabayike: mpingu wose ukamudinanga ndi mya. Mlendo wakutandara mukati mwinu ndi mwenicharu nayo, asani watuka, zina lo, wakabayikanga.

¹⁷Yo wabaya munthu nayo so wabayike.

¹⁸Yo wabaya chinyama wakalipanga, umoyo ku umoyo.

¹⁹Asani munthu wapunduwa munyake, nayo wakapundulikanga kwakuyanayana.

²⁰Kufyo ku kufyo, jiso ku jiso, jinu ku jinu, mo wapunduliya munthu ndimo nayo wakapundulikiyanga.

²¹Yo wabaya chinyama wakalipanga; ndipo yo wabaya munthu wakabayikanga nayo.

²²Dangu linu likaŵanga limoza pe pa mlendo ndi mwenicharu; pakuti Ndine Ambuya Chiuta winu.”

²³Viyo Mosese wangukamba ndi ŵaYisraele; ndipo ŵanguza nayo kubwalo kwa ugoŵi yo wangutemba, ndi ŵangumudina ndi mya. Viyo ŵaYisraele ŵanguchita cho Ambuya angulanguliya Mosese.