Read gitonga ŴaLevi 3 Bible Online

ŴaLevi 3 - gitonga bible

ŴaLevi 3

¹“Asani munthu wapereka mpasku wa chimangu, ndipo wapereka nyama yakutuwa ku mskambu yinthurumi pamwenga yinthukazi, wakaperekanga yambura kalema paurongo pa Ambuya.

²Ndipo wakaŵikanga janja lake pa mutu wa chakuperekeka chake ndi kuyibayiya pa khomo la hema lakuwunganamo, ndipo ŵana ŵaku Aroni ŵazukuru ŵakadiranga ndopa ku jochero kwakuzunguliya.

³Ndipo kutuwa ku sembe ya mpasku wa chimangu uli nchakupereka cha pa moto ku Ambuya, wakaperekanga mafuta ghakumata pa vyamukati gho ghe mukati mu matumbo.

⁴Ndi sana zo ziŵi pamoza ndi mafuta gho ghe paku zo mu chiunu, ndi mu khumano la mphafwa wakatuzgangamo pamoza ndi sana.

⁵Sono ŵana ŵaku Aroni wakawochanga vyo pa jochero, pachanya pa mpasku wakocha wo we pachanya pankhuni za pa moto. Ndi mpasku wapa moto, fungu lake ndakukondweska Ambuya.

⁶“Asani mpasku wake wa chimangu ku Ambuya ndi nyama yakutuwa ku mskambu, yinthurumi pamwenga yinthukazi, wakaperekanga yambura kalema.

⁷Asani wapereka mberere kuŵa mpasku wake, wakayiperekanga paurongo pa Ambuya,

⁸pakuŵika janja lake pa mutu wa nyama yo ndi kuyibayiya paurongo pa hema lakuwunganamo; ndipo ŵana ŵaku Aroni ŵakadiranga ndopa zake ku jochero kwakuzunguliya.

⁹Sono kutuliya ku mpasku wa chimangu wakuperekeka wapa moto ku Ambuya; wakaperekanga mafuta ghake, muchiya wamafuta wose, kuwudumuwa pafupi ndi chiwanga cha msana, ndi mafuta ghose ghakumata ku vyamukati,

¹⁰ndipo sana ziŵi ndi mafuta gho ghe paku zo pa chiunu, ndi khumano la mphafwa lo wakatuzgangamo pamoza ndi sana zo.

¹¹Ndipo mzukuru wakaviwochanga pa jochero uli nkhurgha kwakupereka ku Ambuya pa moto.

¹²“Asani mpasku wake ndi mbuzi wakayiperekanga paurongo pa Ambuya.

¹³Ndi kuŵika janja lake pa mutu wake, ndi kuyibaya paurongo pa hema lakuwunganamo; ndipo ŵana ŵaku Aroni ŵakadiranga ndopa zake ku jochero kwakuzunguliya lo.

¹⁴Sono wakaperekanga kutoko kwaku cho kuŵa mpasku wake wapa moto ku Ambuya, mafuta gho ghamata ku vyamukati,

¹⁵ndi sana zo siŵi ndi mafuta gho ghe paku zo mu chiunu, pamoza ndi mafuta gho ghakuburumutizga mphafwa mpaka ku sana, ghatuzgikeko.

¹⁶Mzukuru wavyoche pa jochero nge nkhurgha kwakuperekeka ndi moto kuŵa fungu lamampha, mafuta ghose nga Ambuya.

¹⁷Ili likaŵanga dangu la muyaya mu migonezi yinu yose, mu malo ghinu ghose ghakujamo, lakuti mureke kurgha mafuta chingana ndi ndopa.”