Read gitonga ŴaLevi 4 Bible Online

ŴaLevi 4 - gitonga bible

ŴaLevi 4

¹Ndipo Ambuya anguti kwaku Mosese,

²“Ukambe ku ŵa Yisraele kuti asani munthu wachita chinthu che chose cho Ambuya alangula kuti chireke kuchitika, kweni watichichita kwadara cha,

³asani ndi mzukuru wakupakika mafuta, mweniyo walakwa pakuti watole vyo vyakususkika pa ŵanthu, iku wapereke ku Ambuya kankhuzi kampupuka kambura kalema chifukwa chakulakwa kwake kuŵa mpasku wapa ulakwi.

⁴Wakazanga ndi kankhuzi ku khomo la hema lakuwunganamo paurongo pa Ambuya, ndi kuŵika janja lake pa mutu wa kankhuzi ko, ndi kukabaya paurongo pa Ambuya.

⁵Ndipo mzukuru wakupakika wakatongapo ndopa zinyake za kankhuzi kuza nazo ku hema lakuwunganamo;

⁶ndipo mzukuru wakabizganga munwi mu ndopa ndi kuwazgiya ndopa zinyake kankhonde ndi kaŵi paurongo pa Ambuya kunthazi kwachivwinkhu cha chipinda chakupaturika.

⁷Ndipo mzukuru wakaŵikanga ndopa zinyake pa masengwe gha jochero la vyachema vyakusunkhizga paurongo pa Ambuya lo le mu hema lakuwunganamo, ndipo ndopa zakujapo za kankhuzi zo, wakadiranga pasina pa jochero la sembe yakocha lo le pa khomo la hema lakuwunganamo.

⁸Ndipo wakatuzgangamo mafuta ghose mu kankhuzi kakupereka pa chifukwa cha ulakwi, mafuta gho ghavimba matumbo ndi mafuta gho ghe pa matumbo,

⁹ndi sana ziŵi pamoza ndi mafuta gho ghe paku zo mu chiunu ndi pa khumano la mphafwa lo, wakatuzgangamo pamoza ndi sana zo

¹⁰(watuzge viyo nge ndi mu ng'ombe ya sembe ya mpasku wa chimangu), mzukuru wakawochanga vyo pa jochero la sembe yakocha.

¹¹Kweni chikopa cha nkhuzi ndi nyama yake yose pamoza ndi mutu wake, marundi ghake, matumbo ghake, ndi mavi ghake,

¹²nkhuzi yose wakapinganga kiyituzgiya kubwaro kwa ugoŵi, kuya nayo pa malo ghakutowa, penipo padirika choto, yikawochekanga pa moto wa nkhuni po wadira choto ndipo yochekenge penipo.

¹³“Asani mpingu wose wa ŵaYisraele ulakwa kwambura kuchitiya dara ndipo chilakwa cho chabisika ku maso gha ungano, kuti ŵachitapo chose cho Ambuya akulangula kuti ŵareke kuchichita, ndipo kwaziŵakwa kuti ŵachichita.

¹⁴Po chilakwa cho ŵachita chaziŵikwa, ungano ukaperekanga kankhuzi kampupuka kuŵa sembe yapa ulakwi. Ndi kuza nayo paurongo pa hema lakuwunganamo;

¹⁵ndipo ŵara ŵa mpingu ŵakaŵikanga manja ghawo pa mutu wa kankhuzi ko paurongo pa Ambuya.

¹⁶Sono mzukuru wakupakika wakazanga ndi ndopa zinyake za kankhuzi ku hema lakuwunganamo.

¹⁷Ndipo mzukuru wakabizganga munwi wake mu ndopa ndi kuziwazga kankhonde ndi kaŵi paurongo pa Ambuya kunthazi kwa chisaru chakuchinga.

¹⁸Ndipo wakaŵikanga ndopa zo zinyake pa masengwe gha jochero lo le mu hema lakuwunganamo paurongo pa Ambuya, ndipo ndopa zakujapo wakadiranga pasi pasina la jochero la mpasku wakocha lo le pa khomo la hema lakuwunganamo.

¹⁹Ndipo mafuta ghake ghose gho wakatonga kwaku yo wakaghawochanga pa jochero.

²⁰Viyo ndimu wakachitiyanga ndi nkhuzi; nge ndimo wanguchitiya ndi nkhuzi ya mpasku wapa ulakwi, viyo ndimu wakachitiyanga ndi uwu, ndipo mzukuru wakapepeskiyanga iwo, ndipo ŵakagowokelekiyanga.

²¹Wakatoliyanga kankhuzi kubwaro kwa ugoŵi ndi kukawocha uli ndimo wanguwoche nkhuzi yakudanga, ndi mpasku wapa ulakwi wa mpingu.

²²“Po mweruzgi walakwa, kuchita kwambura kuziŵa che chose cha vinthu vyo Ambuya Chiuta wake wangulangula, kuti wareke kuchita ndipo wachichita;

²³asani ulakwi weniwo wachita waziŵikwa ndi iyo wakazanga ndi mbuzi yinthurumi yambura kalema kuŵa mpasku wake wapa ulakwi.

²⁴Wakaŵikanga janja lake pa mutu wa mbuzi, ndi kuyibaya mu malo ghenigho ŵabayiya mpasku wakocha paurongo pa Ambuya, ndi mpasku wapa ulakwi.

²⁵Sono mzukuru wakatonga ndopa zinyake za mpasku wapa ulakwi ndi munwi wake ndi kuziŵika pa masengwe gha jochero la mpasku wakocha.

²⁶Ndipo mafuta ghake ghose wakawochanga pa jochero uli ndi mafuta gha mpasku wa chimangu; Viyo mzukuru wakamupepeskiyanga ulakwi wake, ndipo wakagowokelekiyanga.

²⁷“Asani yumoza wa ŵanthu bweka walakwa kwambura kuziŵa pakuchita che chose cho Ambuya angulangula kuchita cha, ndipo iyo wachichita,

²⁸penipo ulakwi wo wachita waziŵikwa kwaku iyo, wakazanga ndi mbuzi yinthukazi yambura kalema chifukwa cha ulakwi wake wo wachita.

²⁹Ndipo wakaŵikanga janja lake pa mutu paku yo, ndi kuyibaya kuŵa mpasku wapa ulakwi mu malo gha mpasku wakocha.

³⁰Ndipo mzukuru wakatonga ndopa zinyake za mbuzi ndi munwi wake ndi kuziŵika pa masengwe gha jochero la mpasku wakocha, ndi kudira ndopa zose zakujapo pasina pa jochero.

³¹Mafuta ghake wakatuzgangamo uli ndimo mafuta ghatuzgikiyamo mu mpasku wa vyachimangu ndipo mzukuru wakawochanga gho pa jochero, kuŵa fungu lakukondweska Ambuya. Mzukuru wakaŵeyeriyanga iyo ndipo wakagowokelekiyanga.

³²“Asani wakazanga ndi mwana wa mberere kuŵa mpasku wake, wakazanga ndi kanthukazi, kambura kalema.

³³Ndi kuŵika janja lake pa mutu pa kamberere ka mpasku wapa ulakwi, ndi kukabayiya mu malo ghenigho ŵabayiyapo mpasku wakocha.

³⁴Sono mzukuru wakatonga ndopa zinyake za mpasku wapa ulakwi ndi munwi wake ndi kuziŵika pa masengwe gha jochero la mpasku wakocha, ndi kudira ndopa zake zakumapo pasina pa jochero.

³⁵Ndipo mafuta ghake watuzgengemo uli ndimo mafuta gha mwana mberere ghatuzgikiyamo mu mpasku wa chimangu. Ndipo mzukuru wakawochanga gho pa jochero pachanya pa mpasku wapa moto ku Ambuya. Viyo mzukuru wakamuŵeyeriyanga iyo chifukwa cha ulakwi wo wachita, ndipo wakagowokelekiyanga.”