Read gitonga ŴaLevi 5 Bible Online

ŴaLevi 5 - gitonga bible

ŴaLevi 5

¹“Asani we yose walakwa, mwakuti watuvwa mazu ghakudana ghakufumbika kuti wasimikizge ukaboni wake, manyi ngwakuti wanguwona pamwenga waziŵa makani gho, kweni kuti wasumuwacha, wakapinganga kwananga kwake.

²Pamwenga asani we yose wakwaska chamunguzgu, manyi ndi nyama yakufwa yamunguzgu, pamwenga chiŵetu chakufwa chamunguzgu, pamwenga chakukwaŵa chamunguzgu, nanga kuti wachiziŵa cha iyo waŵa wakukazuzgika wakaŵanga ndi kafukwa.

³Pamwenga asani wakwaska cha munguzgu cha munthu pamwenga manyi chingaŵa chamunguzgu wakutinji wo ukazuzga munthu yo kuti wanguwuziŵa cha, kweni watakuti wawuziŵa wakaŵanga ndi mlandu.

⁴Pamwenga asani munthu warapa rapu kwambura kughanaghana ndi mlomo wake kuchita uheni pamwenga umampha, rapu la mtundu we wose lo warapa kwambura kughanaghana kweni walivi kuchiziŵa, penipo wachiziŵa chose cho warapa wakaŵanga ndi mlandu.

⁵Munthu yo we ndi mlandu wa viyo wakazomeranga ulakwi wake wo wakuchita,

⁶ndipo wakazangu ku Ambuya ndi mpasku wapa ulakwi wo wakuchita, mberere pamwenga mbuzi yinthukazi kuŵa mpasku wapa kwananga. Ndipo mzukuru wakamuŵeyeriyanga.

⁷“Asani walivi mwana wa mberere, ike wakazanga ku Ambuya chifukwa cha mamphuru ghake, tunjiŵa tuŵi pamwenga tuviwunda twa nkhunda tuŵi, kamoza kuŵa mpasku wapa ulakwi, ndi kanyake kuŵa mpasku wakocha.

⁸Wakazanga nato ku mzukuru mweniyo wakaperekanga kamoza chifukwa cha kwananga; wakanyongoronga mutu wake mu mkosi kweni kuti wakadumuwangako muto cha.

⁹Ndipo wakawazganga ndopa zinyake za mpasku wapa kwananga kurwande kwa jochero, penipo ndopa zose zakujapo zikadirikanga pasina pa jochero; ndi mpasku wapa kwananga.

¹⁰Sono wakaperekanga kachiŵi kuŵa mpasku wakocha kwakuyana ndi langulu. Mzukuru wakamuŵeyeriyanga pa chifukwa cha ulakwi wo wakuchita ndipo wakagowokelekanga.

¹¹“Kweni asani walivi njiŵa ziŵi pamwenga tuviwunda twa nkhunda, iku wakazanga ndi ufwa wamampha wa chipimo cha chigaŵa cha chumi, kuŵa mpasku wake wapa kwananga ko wakuchita. Kuti waŵikengepo mafuta cha, ndipo kuti waŵikengepo vya chema cha, pakuti ndi mpasku wapa kwananga.

¹²Ndipo wakatongapo janja fwa laku wo kuŵa phande la chikumbusku, ndi kocha wo pa jochero, pachanya pa mpasku wapa moto ku Ambuya; mpasku wapa ulakwi.

¹³Viyo mzukuru wakamuŵeyeliyanga pa ulakwi wo wose wo wakuchita, ndipo wakagowokelekiyanga. Ndipo vyakujapo vikaŵanga vya mzukuru uli ndi mpasku wa ufwa.”

¹⁴Ambuya anguti kwaku Mosese,

¹⁵“Asani we yose wasiya umagomekezgeka wake ndi walakwa kwambura kuziŵa mwaku che chose cha vituŵa vya Ambuya, wakazanga ndi bira wambura kalema kutuwa ku mskambu wo iwe wapima mtengo wake mu ndrama za siliva kwakuyana ndi ndrama ya nyumba yakupaturika wo ndi mpasku wapa kwananga.

¹⁶Yo munthu wakalipanga so paku cho wakuchita uheni mu vituŵa vyaku Chiuta; ndipo wakasazgiyangapo chigaŵa chimoza cha chinkhonde ndi kuchipaska ku mzukuru. Viyo mzukuru wakamuŵeyeliyanga ndi bira, sembe ya kwananga ndipo wakagowokelekiyanga.

¹⁷“Asani we yose walakwa pakuchita che chose cho Ambuya akulangula kuti wareke kuchita, kweni iyo kuti wachiziŵa cha, ndipuuli we ndi mlandu ndipo wakalangikanga.

¹⁸Wakatolenga ku mzukuru bira wambura kalema kutuwa ku mskambu wakupimika mtengo ndi iwe kwakuyana ndi mtengo wa sembe yapakwananga, ndipo mzukuru wakamuweyeliyanga pa kuchimwa kweniko wakuchita kwambura kuziŵa ndipo wakagowokelekiyanga.

¹⁹Ndi mpasku wakwananga, yo munthu wenga wakwananga paurongo pa Ambuya.”