Read gitonga ŴaLevi 6 Bible Online

ŴaLevi 6 - gitonga bible

ŴaLevi 6

¹Ambuya anguti kwaku Mosese,

²“Asani we yose walakwa ndipo wasiya umagomekezgeka ku Ambuya, pakupusika muzengezgani wake, pakusungizga kanthu pamwenga chikoli, pamwenga pakuba, pamwenga pakuyuzga muzengezgani wake.

³Pamwenga asani pakubowozga cho chingusoŵa ndipo iyo wakambiyapo utesi ndi kurapa kwakupusika, mu vinthu vyose vyo ŵanthu ŵachita ndi walakwa.

⁴Munthu yo walakwa wakawezganga chenicho wangutole mu unkhungu, pamwenga mu kuyuzga, pamwenga cho wangusungizgika pamwenga chakusoŵa cho iyo wangubowozga,

⁵pamwenga che chose cho iyo wangurapa kwakupusika. Wakawezganga chose chizirima, ndipo wakasazgangako kwaku cho chigaŵa cha chinkhonde ndi kuchipaska ku mweneko, pa zuŵa la kupereke mpasku wapa ulakwi wake.

⁶Ndipo wakatolenga ku mzukuru mpasku wapa ulakwi wake ku Ambuya, bira wambura kalema kutuwa ku msambu wa mtengo wo iwe wapima kuyana ndi mtengo wa mpasku wapa ulakwi.

⁷Ndipo mzukuru wakamuŵeyeliyanga paurongo pa Ambuya, ndipo iyo wakagowokelekiyanga pa chinthu che chose cho munthu wanguchita ndiwanguŵa ndi mlandu.”

⁸Ambuya anguti kwaku Mosese,

⁹“Languliya Aroni ndi ŵana ŵake, kuti ili ndilo dango la sembe yakocha Sembe yakocha yikaŵanga pa chipa pa jochero mpaka mlenji ndipo moto ukakolenga penipo.

¹⁰Ndipo mzukuru wakavwaranga chivwalo chake chakutunga chiyera ndi tharauzisi lakutunga, ndipo wakatonga choto cha moto wakochapo sembe yakocha pa jochero ndi kuchiŵika pafupi ndi jochero.

¹¹Pavuli wakazuwanga vyakuvwara vyake ndi kuvwara vivwalo vinyake, ndi kutuzgiya vyoto kubwalo kwa ugoŵi pa malo ghamampha.

¹²Moto wapa jochero ukakolenga penipa, kuti ukazimwanga cha. Mzukuru wakaŵikangapo nkhuni mlenji ndi mlenji, ndipo wakayalikanga mwa muruliku sembe yakocha pachanya pake, ndipo wakawochiyangapo mafuta gha mpasku wa chimangu.

¹³Moto ukolenge pachanya pa jochero kwambura kulekezga; kuti uzimwenge cha.

¹⁴“Ndipo ili ndi dango la mpasku wa ufwa, ŵana ŵaku Aroni ŵakawuperekanga paurongo pa Ambuya panthazi pa jochero.

¹⁵Ndipo yumoza wakatongako ufwa wamampha kuzaza janja ku mpasku wa ufwa, ndi mafuta ghake ndi vyachema vyose vyo vye pa mpasku wa ufwa, kocha uwu nge nchiŵalu cha chikumbusku chake pa jochero, fungu lakukondweska Ambuya.

¹⁶Ndipo chakujako chose Aroni ndi ŵana ŵake ŵakachirghanga, chikarghikanga chambura mtupu mu malo ghakupaturika; mu bwalo la hema lakuwunganamo.

¹⁷Kuti chikawochekanga ndi mtupu cha. Ndachipereka kuŵa phande lawo la mpasku wapa moto, kwangu nchinthu chakupaturika kwakuruska kwakuyana ndi mpasku wapa ulakwi ndi mpasku wapa mlandu.

¹⁸Munthurumi we yose mu ŵana ŵaku Aroni wangarghako ichi ndimo kukulangulikiya muyaya mu migonezi yinu, kutuwa ku mpasku wapa moto wa Ambuya. Munthu we yose wakuviko wakaŵanga wakupaturika.”

¹⁹Ambuya anguti kwaku Mosese,

²⁰“Uwu ndi mpasku wo Aroni ndi ŵana ŵake ŵakaperekanga ku Ambuya pa zuŵa lenilo wapakika ndi mafuta, chigaŵa chimoza cha vigaŵa chumi cha chipimo cha ufwa wamampha kuŵa mpasku wa zuŵa ndi zuŵa, nusu ya chigaŵa ichi mukaperekanga ku mlenji; nusu yinyake mukaperekanga ku mazulo.

²¹Chikachitikanga ndi mafuta pa lamba; mukazanga nacho chakusazga umampha mu maburunga ghakocha uli ndi mpasku wa ufwa ku Ambuya.

²²Mzukuru mwana waku Aroni yo wakupakika kuhara iyo, wakaperekanga cho ku Ambuya, uli ndimo kukulangulikiya muyaya; chikawochekanga chose.

²³Mpasku wose wa ufwa wa mzukuru ukawochekanga ndipo kuti ukarghikanga cha.”

²⁴Ambuya anguti kwaku Mosese,

²⁵“Ukambe kwaku Aroni ndi ŵana ŵake, Ili ndi dango la sembe ya ulakwi. Mu malo mwenimo sembe yakocha yabayikiya, ndimo sembe ya ulakwi yibayikiyenge paurongo pa Ambuya: njakupaturika ukongwa.

²⁶Mzukuru mweniyo watitipereke sembe yapa ulakwi wakayirghanga, wakayirghanga mu malo ghakupaturika mu bwalo la hema lakuwunganamo.

²⁷Che chose chakukwaska nyama yake chikaŵanga chakupaturika, ndipo penipo ndopa zake zawazgika pa chakuvwara mukachichapanga mu malo ghakupaturika.

²⁸Ndipo chiyaŵi cha dongo mwaku cho nyama yikabikikanga chikaphwanyikanga; kweni asani yabikika mu chiyaŵi cha mkuŵa chiyaŵi cho chikwarakwatike ndi kupuputika.

²⁹Munthurumi yose mukati mu ŵazukuru wangaziŵa kurghako ichi; nchakupaturika unkongwa.

³⁰Kweni paulevi sembe yapa ulakwi yo yikarghikanga mwaku yo ndopa zose zatoreke mu hema lakuwunganamo kwa chipepeske mu malo ghakupaturika; yikawochekanga ndi moto.