Read gitonga ŴaLevi 9 Bible Online

ŴaLevi 9 - gitonga bible

ŴaLevi 9

¹Pa zuŵa la chinkhonde ndi chitatu Mosese wangudana Aroni ndi ŵana ŵake ndi ŵara ŵa ŵaYisraele.

²Wanguti kwaku Aroni, “Uto kathole kanthurumi ka mpasku wapa ulakwi, ndi bira wa mpasku wakocha, viŵe vyambura kalema, uvipereke paurongo pa Ambuya.

³Ndipo ukambe ku ŵaYisraele, ‘Toni phongo kuŵa mpasku wapa ulakwi, ndi thole ndi kamberere vyose viŵi vya umoyo wa chirimika chimoza vyambura kalema, kuŵa mpasku wakocha,

⁴ng'ombe ndi bira kuŵa mpasku wa chimangu. Perekani vyo paurongo pa Ambuya, pamoza ndi mpasku wa ufwa wakusazgika ndi mafuta; pakuti msana wale Ambuya akawonekanga paurongo pinu.’ ”

⁵Ndipo ŵanguza navyo vyo Mosese wanguŵalanguliya paurongo pa Ambuya pa hema lakuwunganamo, ndipo mpingu wo wose ungundere pafupi ndi kuma paurongo pa Ambuya.

⁶Mosese wanguti, “Ichi ndicho Ambuya angumulanguliyani kuti muchichite, ndipo unkhankhu wa Ambuya ukamuwonekiyaninga.”

⁷Sono Mosese wanguti kwaku Aroni, “Ndere kufupi ku jochero, upereke mpasku wako wapa ulakwi ndi mpasku wako wakocha, ujipepeske wamweni ndi ŵanthu wo. Uzi ndimpasku wa ŵanthu kuti uŵachitiye mphepeska; uli ndimo Ambuya akulanguliya.”

⁸Viyo Aroni wangundere kufupi ku jochero, wangubaya thole la mpasku wapa ulakwi waku iyo mweneko.

⁹Ŵana ŵaku Aroni ŵangutole ndopa kwaku iyo, ndipo wangubizga munwi wake mu ndopa ndi kuziŵika pa masengwe gha jochero, wangudira ndopa pasina pa jochero,

¹⁰kweni mafuta ndi sana ndi vyaku mphafwa vyakutuwa ku mpasku wapa ulakwi wangocha pa jochero, uli ndimo Ambuya angulanguliya Mosese.

¹¹Nyama yake ndi chikopa wangocha ndi moto kubwalo kwa ugoŵi.

¹²Ndipo wangubaya sembe yakocha; ŵana ŵaku Aroni ŵangupereka kwaku iyo ndopa zo, ndipo wanguzidira pa jochero kwakuzunguliya.

¹³Ndipo ŵangupereka sembe yakocha kwaku iyo mathuŵi ndi mutu; ndipo wanguvyocha pa jochero.

¹⁴Wangusuka vya mukati ndi marundi, wanguvyocha pamoza ndi sembe yakocha pa jochero.

¹⁵Pavuli wangupereka mpasku wa ŵanthu, wanguto mbuzi ya mpasku wapa ulakwi wa ŵanthu, wanguyibaya, uwu wenga mpasku wakuperekeke pa ulakwi, uli ndi mpasku wapakudanga wapa ulakwi.

¹⁶Ndipo wangupereka mpasku wakocha, wanguwupereka kwakuyana ndi langulu.

¹⁷Wangupereka mpasku wa ufwa ndipo wangutopo paku wo wanguzaza janja lake, ndi wa ufwa ndipo wangutopo paku wo wanguzaza janja lake, ndi ndi wanguwocha pa jochero pade pa mpasku wakocha wa mlenji.

¹⁸Wangubaya so ng'ombe ndi bira sembe ya mpasku wakuperekeke chimangu cha ŵanthu; ndipo ŵana ŵaku Aroni wangupereka kwaku iyo ndopa zo wangudira pa jochero kwakuzunguliya,

¹⁹ndi mafuta gha ng'ombe ndi gha bira, muchiya wa mafuta, ndi ghenigho ghamata ku matumbo, ndi sana ndi songo ya mphafwa,

²⁰ndipo wanguŵika mafuta pa nganga, wanguwocha mafuta pa jochero.

²¹Kweni nganga ndi chigha chaku marghe Aroni wanguzungung'a kuŵa mpasku wakuzungung'a paurongo pa Ambuya; uli ndimo Mosese wangulanguliya.

²²Pavuli Aroni wangusoske manja ghake kurata ku ŵanthu, wanguŵatumbika, ndipo wangusika po wanguti wamara kupereka mpasku wapa ulakwi, ndi mpasku wakocha ndi mipasku ya chimangu.

²³Ndipo Mosese ndi Aroni ŵangusere mu hema lakuwunganamo; ndipo ŵanguti ŵatuwa ŵangutumbika ŵanthu, ndipo unkhankhu wa Ambuya unguwoneka ku ŵanthu wose.

²⁴Ndipo moto unguburika kutuwa paurongo pa Ambuya ungocha mpasku wakocha ndi mafuta gho ghenga pa jochero; ndipo penipo ŵanthu wose ŵanguwuwona, ŵangukambura, ndi ŵanguwa pasi kavunama.