Read gitonga Yeremiya 10 Bible Online

Yeremiya 10 - gitonga bible

Yeremiya 10

¹Avwani mazu gho Ambuya arongoro namwe, mwa nyumba yaku Yisraele.

²Viyo atiti Ambuya: “Rekani kusambira nthowa ya ŵamitundu, rekani kutenthema pa virongorero vya kuchanya, pakuti ŵamitundu ŵatenthema paku vyo,

³pakuti malusu gha ŵanthu ngakupusika. Muti wamu lisuwa utemeke pasi, ndipo usemeka ndi mbavi, ndi manja gha misiri.

⁴Ŵanthu ŵatiuzganga ndi siliva ndi golide; ŵatiukhozga ndi nyundu ndi mizumali kuti ureke kusukunika.

⁵Ŵangoza ŵawo ŵakozgana ndi vyakudikiya tuyuni vyakumikika mu munda wa vipasi, ndipo kuti ŵaziŵa kurongoro cha; ŵachita kunyamulika pakuti kuti ŵangenda cha. Mungaŵawopanga cha, pakuti kuti ŵangachita chiheni cha, pakuti nanga khuchita umampha nako mulivi mwawo.”

⁶Kulivi nanga njumoza wakukozgana namwe, Ambuya mwe; mwe ŵakuru, ndipo zina linu nda nthazi ukongwa.

⁷Njani yo wangareka kumopani imwe, mwa Karonga ŵa mitundu? Pakuti mwe ŵakwenere kopeka; mukati mu ŵazeru wose ŵa mitundu ya ŵanthu ndi mu maufumu ghawo ghose mulivi wakuyana ndi imwe.

⁸Mbakupusa ndi ŵazereza, kusambizga kwa ŵangoza nchimuti pe!

⁹Siliva wakusula watoreka ku Tarshishi, ndi golide kutuwa ku Ufazi. Ivi ndi nchitu ya ŵamisiri ndi ya manja gha ŵakusula golide; kuvwara kwawo ndi saru ya majimaji ndi ya manjani; yaŵa wose ndi nchitu ya ŵamisiri.

¹⁰Kweni Ambuya ndi Chiuta wauneneska; iyo ndi Chiuta wamoyo ndi Karonga wamuyaya. Pa ukari wake charu chiyaghayika, ndipo mitundu kuti yingakunthiyapo kukwiya kwake cha.

¹¹Viyo ndimu ukambiye kwaku wo: “Ŵachiuta ŵeniwo ŵengavi kulenga machanya ndi charu chapasi ŵakamaranga mu charu chapasi ndi kusi ku mitambo.”

¹²Iyo ndiyo wangulenga charu ndi nthazi yake, mweniyo wakujarika charu mu vinjeru vyeke, ndipo ndi kuwamo kwake wangutambaruwa machanya.

¹³Ŵachituzga mazu ghake maji ghachita chiwawa kuchanya, ndipo wakwezga nyankhuŵinda ku vigoti vya charu chapasi. Malimphezi ghachiska vuwa, ndipo watuzga mphepo mu mbiku zake.

¹⁴Munthu yose ngwakupusa ndi wambura chinjeru; ŵangoza ŵalengeska misiri wakuŵapanga, pakuti vikozgu vyake vya utesi, mulivi mvuchi mwaku wo.

¹⁵Mbaŵakaŵaka, ndi nchitu yakufuvya; panyengo ya kulangika kwawo ŵakamaranga.

¹⁶Wa chigawa chaku Yakobe kuti wakozgana ndi yaŵa cha, pakuti ndiyo wangwata vinthu vyose, ndipo Yisraele ndi khamu lake lakusankhika; Ambuya ŵamaŵanja ndilo zina lawo.

¹⁷Unjikani katundu winu, yo wenga pasi imwe mwakuzingirizgika!

¹⁸Pakuti viyo atiti Ambuya: “Ehe, ndikapong'anga kubwalo ŵakuja mu charu pa nyengo iyi, ndipo ndikatolenga suzgu paku wo, mwakuti ŵayivwe.”

¹⁹Owe soka ine chifukwa chakupwetekeka kwangu! Bala langu ndachitima. Kweni ndinguti, “Kwakuneneska ili ndi yuzgu, nditenere kukunthiyapo.”

²⁰Hema langu labwanganduka, vingwe vyangu vyose vyadumuka; ŵana ŵangu ŵatuwako kwangu, ndipo kuti ŵalipo cha; palivi nanga njumoza wakujintha so hema langu, pamwenga kuchinga saru zangu.

²¹Pakuti ŵaliska mbakupusa, kuti ŵafumbiriya ku Ambuya cha; chifukwa cho ŵalivi kwanduwa, ndipo viŵetu vyawo vyose vyaparghanika.

²²Avwani lumbiri! Ehe, chituza! Chimtimbaheka chikuru kutuwa ku charu chaku nkhonde, kuzachichita mapopa mizi yaku Yuda, mphanji za ŵakambwe.

²³Ndiziŵa, Ambuya, kuti nthowa ya munthu kuti ye mwaku iyo mweneko cha, kuti nkhwa munthu yo watenda cha kunyoroska menderu ghake.

²⁴Ambuya, ndisuskeni, ndi mweso wa urunji; mu ukari winu cha, vinu mungandimarizga.

²⁵Punguliyani ukari winu pa mitundu yeniyo yireka kumuziŵani imwe, ndi pa ŵanthu wo kuti ŵadana pa zina linu cha, pakuti ŵamuzwanduwa Yakobe; ndi kumurgha, ndipo ŵapopeska charu chake.