Read gitonga Yeremiya 12 Bible Online

Yeremiya 12 - gitonga bible

Yeremiya 12

¹Murunji ndimwe, Ambuya mwe, po ndidandauliya kwaku imwe; kweni ndikaperekanga makani ghangu paurongo pinu. Chifukwa chine nthowa ya muheni yisakata? Wakupusika chifukwa chine watuŵa wamoyo?

²Imwe mutuŵapanda, ndipo iwo ŵathaza; ŵakuwa ndi ŵapasa chipasi; imwe mwe pafupi mu mlomo wawo ndipo mwe kutali ndi mtima wawo.

³Kweni imwe, Ambuya mwe, mutindiziŵa; mutindiwona, ndipo mutesa mzimu wangu paku imwe. Waguguziyeni kubwalo uli ndi mberere zakuya kukubayika, ndipo muŵapatuliye zuŵa la kubayika.

⁴Charu chikatenjenga mpaka zuŵanji, mpaka zuŵanji uteka wamu minda yose ukamiranga? Chifukwa cha mautimbanizi ghaku wo ŵaja mwenimo vinyama ndi viyuni vyakukurwa; chifukwa ŵanthu ŵanguti, “Kuti wakawonanga umari widu cha.”

⁵“Asani mwachimbiya pamoza ndi ŵanthu ŵakwenda pasi, ndipo ŵakuvuskani, na mungapindana nawo uli ŵakavalo? Ndipo asani mu charu cha chidika ndimu mutuwa pasi, na mulisuwa la Yordane muchitenge uli?

⁶Pakuti chingana mbana ŵanyinu ndi mphapu ya auskemwe iwo nawo ŵachita namwe kwakupusika, ŵaliya, kwakufikapo kuliriya imwe; mungavwananga nawo cha, chingana ŵangarongoro namwe mazu ghakunozga.”

⁷“Ndayireka nyumba yangu, ndaŵapatiya limu ŵanthu ŵangu; ndapereka nkhwanjiwa wa mtima wangu mu manja gha ŵakupindikana ŵake.

⁸Ŵanthu ŵangu ŵaŵa kwaku ine uli ndi nkharamu mu dambo, ŵatinditafuliya; chifukwa cho ndaŵatinkha.

⁹Ŵanthu ŵangu ŵandiŵiya uli nchiyuni chakuŵaraŵata chakuko vinyake? Viyuni vyakuko vinyake vituŵatinkha kwakuzunguliya kose kose? Rutani, danani nyama zose zamu dondo ziungane; muze nazo kuzachiparuwa.

¹⁰Ŵaliska ŵanandi ŵabwanganduwa munda wangu wa mphereska, ŵapwatiya pasi chigaŵa chinga, charu changu cha kukondweska ŵachisanduska bozwa la uyiku.

¹¹Ŵachisanduska uyiku; nchauyiku, chiliriya ine. Charu chose ŵachisanduska uyiku, kweni palivi munthu yo waphwereko ndi ichi.

¹²Pa mitunthu yose ya chipalamba mu bozwa paza ŵaphasulu; pakuti lipanga la Ambuya limeza kutuwa ku chigoti chimoza cha charu kwachifika ku chigoti chinyake mu charu chose, kulivi chimangu.

¹³Ŵamija trigu ndipo ŵavuna minga, ŵajivuska kweni kuti ŵatopu kanthu cha, ŵakalengeskekanga ndi vuna yawo chifukwa cha ukari wakofya wa Ambuya.”

¹⁴Viyo atiti Ambuya pa ŵanyangu wose ŵaheni wo ŵakwaska charu chenicho ndikupaska ŵanthu ŵangu ŵaYisraele, kuchihara: “Ehe, ndikaŵazuwanga kutuwa mu charu chawo ndipo ndikazuwanga nyumba yaku Yuda mukati mwawo.

¹⁵Ndipo nditakuti ndaŵazuwa, ndikaŵanga so ndi chifundu paku iwo, ndipo ndikaŵatolenga so yumoza ndi yumoza ku chihara chake ndi we yose ku charu chake.

¹⁶Ndipo kukaŵanga kuti asani ŵakasambiranga ndi phamphu nthowa za ŵanthu ŵangu, kurapiya ndi zina langu, ‘Achiŵa amoyo Ambuya,’ uli ndimo ŵangusambizgiya ŵanthu ŵangu kurapa paku Bala, po ndipo wakazengekanga mukati mu ŵanthu ŵangu.

¹⁷Kweni asani mtundu we wose kuti ukategherezganga cha, po ndipo ndikawuzuwiyanga limu ndi kuwunanga, atiti Ambuya.”