Read gitonga Yeremiya 14 Bible Online

Yeremiya 14 - gitonga bible

Yeremiya 14

¹Mazu gha Ambuya gho ghanguza kwaku Yeremiya gha pa chilala:

²“Yuda watenje ndipo malikomo ghake ghayungwanika; ŵanthu ŵake ŵatenjere pasi, ndipo kuliya kwa Yerusalemu kukwere pachanya.

³Ŵara-ŵara ŵake ŵatuma ŵateŵeti ŵawo kwachito maji: ŵatuza ku visima, kuti ŵasaniyako maji cha, ŵaweko ndi viyaŵi vyawo vya mwazi: ŵachita soni, ŵatimbanizgike, ndipo ŵavunikiriya mitu yawo.

⁴Alimi ŵalengeskeka, ŵavunikiriya mitu yawo, chifukwa cha nyata yo yanangika pakuti kwaulavi vuwa pa charu.

⁵Chingana ndi mphoyo mu bozwa yijowo tholi lake lakuwa sono chifukwa mulivi uteka.

⁶Ŵaboli ŵatuma pa mitunthu pa mtetete, ŵaŵeŵefukiya mphepo uli mbakambwe; maso ghawo ghatondeka, chifukwa chipozwa kulivi.

⁷“Chingana mautimbanizi ghidu ghatitisimika, tovyeni, Ambuya, chifukwa cha zina linu; pakuti kutondeka kwidu kwaŵa kukuru, talakwiya imwe.

⁸Imwe ndimwe Yisraele wagomezga, wakumutaska mu nyengo ya suzgu, chifukwa chine imwe muŵenge nge ndi mlendo mu charu chidu, ulaka ndi mwenda nthowa yo wapatuka kugone waka usiku?

⁹Chifukwa chine imwe mukozganenge ndi munthu yo watimbanizgika, nge ndi munthu wanthazi yo watondeka kutaska? Kweni imwe, Ambuya, mwe mukati mwidu, ndipo ifwe tidanika ndi zina linu; rekani kutisiya.”

¹⁰Viyo atiti Ambuya ghapa ŵanthu yaŵa: “Ŵanja kuyingayinga kwa viyo, ŵalivi kukanizga marundi ghawo; chifukwa cho Ambuya kuti ŵati ŵaronde cha. Sono ŵakakumbukanga mautimbanizi ghawo, ndi kulanga mauheni ghawo.”

¹¹Ambuya anguti kwaku ine, “Reka kuromba kuti yaŵa ŵanthu kuŵaŵiye umampha.

¹²Chingana ŵangafunga, kuti ndikavwanga kuliya kwawo cha, ndipo chingana ŵangapereka mpasku wakocha ndi mpasku wa ufwa, kuti ndivirondiyenge cha; kweni ndikaŵamaranga ndi lipanga, ndi chilala, ndi chideru.”

¹³Sono ndinguti, “Na, Ambuya Chiuta, ehe, ŵamchimi ŵatiti kwaku wo, ‘Kuti mukawonanga lipanga cha, chingana nkhuti mukaŵanga ndi chilala cha, kweni ndikakupaskaninga chimangu chakuneneska mu malo ghenighano.’ ”

¹⁴Ndipo Ambuya anguti kwaku ine: “Ŵamchimi ŵachima mautesi mu zina langu: ine kuti ndinguŵatuma, chingana nkhuti ndinguŵalanguliya cha, nanga nkhurongoronawo cha. Ŵachima kwaku imwe viwona vya utesi, ŵabwebweta waka, ndi kupisika kwa mu mitima yawo.

¹⁵Chifukwa cho atiti Ambuya gha pa ŵamchimi ŵeniwo ŵachimiya mu zina langu, chingana ndengavi kuŵatuma, ŵeniwo ŵatiti, ‘Lipanga ndi chilala kuti vikazanga pacharu ichi cha’: Ndi lipanga ndi chilala ŵakamaranga ŵamchimi wo.

¹⁶Ndipo ŵanthu, kwaku ŵeniwo ŵachimiya, ŵakapong'ekanga kubwalo mu miseu ya Yerusalemu, ŵakubayika ndi chilala ndi lipanga, pakaŵangavi ndi wakuŵaŵika, iwo, ŵawoli ŵawo, ŵana ŵawo ŵanthurumi ndi ŵana ŵawo ŵanthukazi. Pakuti ndikadiranga utimbanizi wawo paku iwo ŵeneko.

¹⁷Iwe uŵakambiyenge mazu yagha; ‘Usiku ndi msana maso ghangu ghasuruwe masozi, ghareke kukamuka, pakuti mwana munthukazi wa ŵanthu ŵangu wapwetekeka ndi bala likuru, ndi kupumika kuzitu.

¹⁸Asani ndituya ku munda, ehe, wo ŵabayika ndi lipanga! Ndipo asani ndisere mu muzi, ehe, ŵakubayika ndi chilala! Pakuti wose ŵaŵi mchimi ndi mzukuru ŵachita nchitu yawo mu charu mo, ndipo ŵalivi zeru.’ ”

¹⁹Kumbi mwamukaniya limu Yuda? Kumbi mzimu winu wamutinkha Zioni? Kumbi mwatipumiyanji mwakuti kulivi kuchizgika kwaku ifwe? Tingupenja chimangu, kweni kamampha kakuwoneka cha; nyengo ya kuchizgika, kweni ehe, chofyu.

²⁰Tizomera maulakwi ghidu, Ambuya mwe, ndi uheni wa auskefwe pakuti takulakwiyani imwe.

²¹Rekani kutitaya, chifukwa cha zina linu; rekani kuyuyuwa chitengo chinu cha unkhankhu; kumbukani phanganu linu ndi ifwe, rekani kuliswa.

²²Kumbi walipo mukati mu ŵachiuta ŵatesi ŵa ŵamitundu yo wangaziŵa kupereka vuwa? Pamwenga kumbi machanya ghangaziŵa kupaska manthonera? Ndimwe pe munyake cha, Ambuya Chiuta widu? Ifwe tiŵika chigomezgu chidu mwaku imwe, chifukwa ndimwe muchita vyose ive.