Read gitonga Yeremiya 18 Bible Online

Yeremiya 18 - gitonga bible

Yeremiya 18

¹Mazu ghanguza kwaku Yeremiya kutuwa ku Ambuya:

²“Soka, ruta ku nyumba ya muumbi, ndipo kwenikuwa ndamkukuvwiska mazu ghangu.”

³Viyo ndinguruta kusikiya ku nyumba ya muumbi, ndipo kuwa waumbanga pa mkombelo wake.

⁴Ndipo chiŵiya cho waumbanga chingunangika mu janja la muumbi, wanguumba so chinyake, uli ndimo kungumuŵiya kwamampha kuchita.

⁵Sono mazu gha Ambuya ghanguza kwaku ine:

⁶“Mwa ŵaYisraele mwe, kumbi ine kuti ndingaziŵa kuchita namwe nge ndimo muumbi uyu wachitiya cha? atiti Ambuya. Ehe, nge ndimo liliri dongo mu janja la muumbi viyo ndimu muliri imwe mu janja langu, mwa ŵaYisraele.

⁷Asani pa nyengo yose ine nditaula pa mtundu pamwenga pa ufumu kuti ndikawuponthonga ndi kuwuswiya pasi ndi kuwananga,

⁸ndipo asani mtundu wuwa ndakambiyapo, uweko ku uheni wake, po ndipo ndikang'anamukangako ku uheni weniwo ndatinge ndiuchitiyenge.

⁹Ndipo asani pa nyengo ye yose nditaula pa mtundu pamwenga ufumu, kuti ndikauzenganga ndi kuwupanda,

¹⁰ndipo asani uchita chiheni mu maso ghangu, kuvwiya mazu ghangu cha; po ndipo ndikang'anamukangako umampha wo ndatinge ndiuchitiyenge.

¹¹Sono, chifukwa cho, kamba ku ŵanthu ŵaYuda ndi ŵakuja mu Yerusalemu, atiti Ambuya, ‘Ehe, ndirongosole chiheni paku imwe, ndighanaghana fundo yakumikana namwe. Weniko, we yose ku nthowa yake yiheni, ndipo nozgani nthowa zinu ndi machitidu ghinu.’

¹²“Kweni iwo ŵatiti, ‘Palivi kanthu! Tikarondonga vyo tighanaghana taŵeni, ndipo we yose wakachitanga nge ndimo mtima wake uheni wangangamikiya.’

¹³“Chifukwa cho Ambuya atiti: Fumbiriyani mu mitundu, njani wakuvwapo chakukozgana, ndi ichi? Mwali Yisraele wachita chinthu chiheni ukongwa.

¹⁴Kumbi nyankhuŵinda wapa Lebanoni wasiya malijengwajengwa gha mapiri gha Sirioni? Kumbi maji ghamu mapiri ghakamuka, tumisinji twakupopoma twakuzizira?

¹⁵Kweni ŵanthu ŵangu ŵandiruwa ine, ŵatoche sembe ku ŵachiuta ŵatesi; ŵaguŵa mu nthowa zawo, mu miseu ya mwaka, ndipo ŵasere mu tunthowa twakudumuwa, ŵareka mseu ukuru,

¹⁶ŵasanduska charu chawo kuŵa chakofya, chinthu chakunyozeka muyaya. We yose wakujumphamo watofyera ndipo wapukung'a mutu wake.

¹⁷Nge ndi mphepo yaku vuma ndikaŵaparghang'anga paurongo pa wakupindikana. Ndikaŵarongonga ku msana chisku changu cha, mu zuŵa la sokalawo.”

¹⁸Sono iwo ŵanguti, “Tiyeni, timuchitiye vya chiŵembo Yeremiya, pakuti dangu kuti likamaranga cha ku mzukuru, chingana ndi fundu ku wazeru, chingana ndi mazu kutuwa ku mchimi. Tiyeni, timupume ndi lilime, ndipo tireke kuphwereko mazu ghake chingana ngamoza.”

¹⁹Phwereni ine, Ambuya, ndipo tegherezgani kudandaula kwangu.

²⁰Kumbi uheni ndi mphoto ya umampha? Kweni iwo ŵakumbiya mbuna umoyo wangu. Kumbukani mo ndingumiya paurongo pinu kuŵakambiya umampha iwo, kutuzgako ukari winu kwaku iwo.

²¹Chifukwa cho mupereke ŵana ŵawo ku chilala; muŵapereke ku nthazi ya lipanga, ŵawoli ŵawo ŵaŵe ŵambura ŵana, ŵaŵe vyoko. Ŵanthurumi ŵawo ŵafwe, ndi chideru, ŵanyamata ŵawo ŵabayike ndi lipanga mu nkhondo.

²²Kuliya kuvwike kutuwa ku nyumba zawo muchitole ŵachivwamba kwamabuchibuchi pakuwo! Pakuti ŵakumba mbuna yakuti ndiwemo, ndipo ŵathyiya marundi ghangu viŵana.

²³Kweni, imwe Ambuya, muziŵa viŵembo vyawo vyose kuti ŵandibaye. Mungaŵagowoke cha mautimbanizi ghawo, pamwenga kuzimwa uheni wawo pa maso pinu. Chondi muŵathereske paurongo pinu; muŵarange mu nyengo ya ukari winu.