Read gitonga Yeremiya 19 Bible Online

Yeremiya 19 - gitonga bible

Yeremiya 19

¹Viyo atiti Ambuya, “Ruta, ukagule supa yakuumbika ya dongo, ndipo utopo ŵanyake ŵa ŵara ŵa ŵanthu ndi ŵanyake ŵa ŵara ŵa ŵazukuru,

²ndipo murute ku dambo la mwana waku Hinomo pa kuserere pa Likomo la Zinga; ndipo penipa ukamemeze mazu ghenigho nditukunene.

³Wamkuti, ‘Avwani mazu gha Ambuya, mwa ŵakaronga ŵaku Yuda ndi mwa ŵakuja mu Yerusalemu. Viyo atiti Ambuya ŵa maŵanja, Chiuta waku Yisraele, Ehe, ine ndikatolenga uheni pa malo yagha weniwo po ŵanthu ŵakauvwanga, ŵakazizwanga nawo.

⁴Pakuti ŵanthu ŵandisiya ine, ndipo ŵakazuzga malo yagha pakochiyapo sembe zakusunkhizga ku ŵachiuta ŵanyake, ŵeniwo chingana ndiwo, chingana mbauskeu chingana mbakaronga ŵaku Yuda ŵalivi kuŵaziŵa, ndipo pakuti ŵazaza malo gho ndi ndopa za ŵambura kalema,

⁵ndipo ŵazenga malo gha pachanya ghaku Bala, kochiyapo ŵana ŵawo mu moto nge ndi mpasku wakocha kwaku Bala, ine ndengavi kulangula pamwenga kukamba viyo ndipo kuti ndingughanaghana viyo cha.

⁶Chifukwa cho mazuŵa ghakazanga, atiti Ambuya, penipo malo yagha kuti ghazamdanika so Tofeti cha, pamwenga dambo la mwana waku Hinomo, kweni dambo Lakubayiyamo.

⁷Ndipo mu malo ghenigha ndikamariskanga vinjeru vyaku Yuda ndi Yerusalemu, ndikabayiskanga ŵanthu ŵawo ndi lipanga paurongo pa ŵakupindikana ŵawo, ndi janja laku wo ŵapenja kuŵabaya. Ndikapaskanga viŵanda vyawo ku viyuni vya mude ndi ku nyama za charu chapasi kuti zirghenge.

⁸Ndipo ndikasanduskanga msumba uwu kuŵa wakofya, chinthu chakunyozeka; yose wakudumuwapo wakazizwanga ndipo wakafyonyanga mufyonyo chifukwa cha masoka ghake.

⁹Ndipo ndikaŵarghiskanga nyama ya ŵana ŵawo ŵanthurumi ndi ŵana ŵawo ŵanthukazi, yose wakarghanga nyama ya mwanasi wake mu kuzingizgika ndi mu suzgu yo ŵakupindikana ŵawo ndi ŵeniwo ŵapenja kuŵabaya ŵaŵasuzgenge nayo.’

¹⁰“Penipo ndipo ukaswanga supa yo mu maso gha ŵanthu wo ŵakarutanga nawe,

¹¹ndipo wamkuti kwaku iwo, ‘Viyo atiti Ambuya ŵa maŵanja: Umu ndimu ndikaswiyanga ŵanthu yaŵa ndi msumba uwu, nge ndimo munthu waswiya chiyaŵi cha muumbi, mwakuti kuti chingazindika so cha. Ŵanthu ŵakaŵikananga mu Tofeti chifukwa malo ghanyake ghakuŵikamo palive.

¹²Viyo ndimu ndikachitiyanga malo yagha, atiti Ambuya, ndi ŵakujamo ŵake, kuti msumba uwu uŵe nge ndi Tofeti.

¹³Nyumba za Yerusalemu ndi nyumba za ŵakaronga ŵaku Yuda, nyumba zose zenizo pa mitenje yake vyachema vikochekiyapo ku liŵanja lose la kuchanya, ndi mipasku yakumwa yikudikiyapo ku ŵachiuta ŵanyake, zikakazuzgikanga, nge ndi malo gha Tofeti.’ ”

¹⁴Sono Yeremiya wangutuwako ku Tofeti, kweniko Chiuta wangumutuma kwachichima, ndipo wanguma mu bwalo la nyumba ya Ambuya, ndipo wanguti ku ŵanthu wose,

¹⁵“Viyo atiti Ambuya ŵa maŵanja Chiuta waku Yisraele, Ehe, ndikatolenga pa msumba uwu ndi pa mizi yose uheni wose weniwo ndapataula paku wo, chifukwa ŵangangamiska khose lawo, ŵakana kuvwa mazu ghangu.”