Read gitonga Yeremiya 26 Bible Online

Yeremiya 26 - gitonga bible

Yeremiya 26

¹Pakwamba kuwusa Yehoyakimu mwana waku Josiya, karonga waku Yuda, mazu ghangutuwa ku Ambuya,

²“Viyo atiti Ambuya: Ume mu bwalo la nyumba ya Ambuya, ndipo urongoro ku misumba yaku Yuda yeniyo yituza kwachisopa mu nyumba ya Ambuya mazu ghose gho ndakulanguliya kwachirongoro nawo; ungasiyangako nanga ngamoza cha.

³Vinu kokuli ŵakategherezganga, kuti we yose waweko ku nthowa yake yiheni, mwakuti nding'anamukeko ku chiheni cho ndikhumba kuŵachitiya chifukwa cha machitidu ghawo ghaheni.

⁴Iwe ukakambe kwaku wo, ‘Viyo atiti Ambuya, Asani mureka kutegherezga kwangu, kwenda mu dangu langu lenilo ndingukupaskani,

⁵ndi kuphwere mazu gha ŵateŵeti ŵangu ŵamchimi ŵeniwo ndituma kwinu, pakuti mulivi kuphwere,

⁶iku sono ndikayichitanga nyumba iyi kuŵa nge ndi Shilo; ndi ndikauchitanga msumba uwu kuŵa thembo ku mitundu yose ya charu chapasi.’ ”

⁷Ŵazukuru, ŵamchimi ndi ŵanthu wose ŵangumuvwa Yeremiya wachikamba mazu yagha mu nyumba ya Ambuya.

⁸Ndipo penipo Yeremiya wanguti wamara kukamba vyose vyenivyo Ambuya angumulanguliya ku ŵanthu, ŵazukuru, ndi ŵamchimi, ndi ŵanthu wose ŵangumuko, ŵanguti, “Ukafwanga!

⁹Chifukwa chine wachimiya mu zina la Ambuya kuti, ‘Nyumba iyi yikaŵanga uli ndi Shilo, ndipo msumba uwu ukaŵanga mapopa, mwambura munthu wakujamo?’ ” Ndipo ŵanthu wose ŵanguunjikana kwakuzunguliya Yeremiya mu nyumba ya Ambuya.

¹⁰Penipo ŵarawara ŵaku Yuda ŵanguvwa vinthu ivi, ŵanguza kutuliya ku nyumba ya karonga kuza ku nyumba ya Ambuya, ndipo ŵanguja pasi pa kuserere pa likomo Lifya la nyumba ya Ambuya.

¹¹Sono ŵazukuru ndi ŵamchimi ŵanguti ku ŵaraŵara ndi ku ŵanthu wose, “Uyu munthu watenere kubayika, chifukwa wachimiya vyakwananga msumba uwu, nge ndimo mwavwiya ndi makutu ghinu.”

¹²Yeremiya wangukamba ku ŵaraŵara ndi ŵanthu wose wakuti, “Ambuya angundituma kuchimiya pa nyumba iyi ndi msumba uwu mazu ghose gho mwavwa.

¹³Chifukwa ichi sinthani nthowa zinu ndi machitidu ghinu, ndi vwiyani mazu gha Ambuya Chiuta winu; ndipo Chiuta wakarekanga kuchita chiheni cho wakukamba paku imwe.

¹⁴Kweni ine, ehe, nde mu manja ghinu. Ndichitiyeni cho chingamuŵiyani chamampha ndi chakurunjika.

¹⁵Kweni ziŵani kwakuneneska kuti asani mundibayenge, mukajitoliyanga ndopa zambura kalema paku mwaŵeni ndi pa msumba uwu ndi ŵakujamo ŵake, pakuti kwakuneneska Ambuya angundituma kwaku imwe kuzachirongoro mazu yagha mu makutu ghinu.”

¹⁶Sono ŵaraŵara ndi ŵanthu wose ŵanguti ku ŵazukuru ndi ŵamchimi, “Uyu munthu kuti watenere chilangu cha nyifwa cha, pakuti warongorore mu zina la Ambuya Chiuta wide kwakuifwe.”

¹⁷Ndipo ŵanyake ŵa ŵara ŵa charu ŵangusoka ŵangurongoro ku ŵanthu wose wo ŵanguungana pamoza, ŵanguti,

¹⁸“Mika waku Moreshete wanguchima mu mazuŵa ghaku Hezekiya karonga waku Yuda, ndipo wanguti ku ŵanthu wose ŵaYuda, ‘Viyo atiti Ambuya ŵa maŵanja, Zioni wakalimikanga nge ndi munda; Yerusalemu wakasandukanga chimbumira cha vyakunangika, ndipo phiri la nyumba likaŵanga nge ndi malo gha pachanya gha dondo.’

¹⁹“Kumbi Hezekiya karonga waku Yuda ndi ŵaYuda wose angumubaya? Kuti ŵangopa Ambuya cha ndi wanguŵeyerere lisungu la Ambuya, ndipo kuti Ambuya angugowoka cha ku chiheni chenicho wangutauliya paku wo? Kweni ifwe tikhumba kujidaniya uheni ukuru paku taŵeni.”

²⁰Munthu munyake wanguchimiya mu zina la Ambuya, Uriya mwana waku Shemaya waku Kiriata-jearimi. Wanguchimiya pa msumba uwu ndi charu ichi mu mazu ghakukozgana ndi ghaku Yeremiya.

²¹Ndipo po karonga Yehoyakimu, pamoza ndi ŵankhondo ŵake ndi ŵaraŵara wose, ŵanguvwa mazu ghake, karonga wapenjanga kumubaya; kweni Uriya wanguti waghavwa wangopa ndi wanguthaŵiya ku Egipiti.

²²Sono karonga Yohoyakimu wangutuma ŵanthu ku Egipiti, Elenatani mwana waku Akibori ndi ŵanyake pamoza nayo,

²³ndipo angwachimuto Uriya ku Egipiti anguza nayo ku karonga Yehoyakimu mweniyo wangumubaya ndi lipanga ndipo wangutaya chiŵanda chake mu masano gha ŵanthu ŵauliuli.

²⁴Kweni janja laku Ahikamu mwana waku Shafani lenga ndi Yeremiya viyo kuti wengavi kuperekeka ku ŵanthu kuti wabayike.