Read gitonga Yeremiya 27 Bible Online

Yeremiya 27 - gitonga bible

Yeremiya 27

¹Pakwamba kuwusa Zedekiya mwana waku Josiya, karonga waku Yuda, mazu yagha ghanguza kwaku Yeremiya kutuliya ku Ambuya.

²Viyo anguti Ambuya kwaku ine: “Ujichitiye vyakumangiya vyachikumba ndi magori, ndipo uviŵike pa khosi lako.

³Tuma mazu ku karonga wa Edomo, karonga wa Moabu, karonga wa ŵana ŵaku Amoni, karonga wa Turo, ndi karonga ŵaSidoni pa manja gha mathenga gho ghaza ku Yerusalemu kwaku Zedekiya karonga waku Yuda.

⁴Uŵapaske uthenga uwu ŵakakambe ku ŵambuyawo: ‘Viyo atiti Ambuya ŵa maŵanja, Chiuta waku Yisraele yagha ndigho mukakambe ku ŵambuyamwe:

⁵“Ndine mweniyo ndi nthazi zangu zikuru ndi janja langu lakutambaruka ndikulenga charu chapasi, pamoza ndi ŵanthu ndi vinyama vyo vye mwenimo, ndipo nditichipaska kwaku yose yo ndikhumba.

⁶Sono ndapaska vyaru vyose ivi mu janja laku Nebukadanezara, karonga wa Babiloni, mteŵeti wangu, ndipo ndamupaska so vinyama vya mudondo kumutataliya.

⁷Mitundu yose yikamuteŵetiyanga iyo ndi mwana wake ndi ŵazuku ŵake, mpaka penipo nyengo ya kunangiya charu chake yafika, po ndipo mitundu yinandi ndi ŵakaronga ŵakuzirwa ŵazakumusanduska kuŵa muŵanda wawo.

⁸“ ‘ “Kweni asani mtundu we wose, pamwenga ufumu, ukarekanga kutataliya Nebukadanezara, karonga wa Babiloni, ndi kureka kuŵika khosi lake mu gori la karonga wa Babiloni; ine ndikawulanganga mtundu wo ndi lipanga, ndi chilala, ndi chideru, mpaka penipo ndawumara ndi janja lake, atiti Ambuya.

⁹Viyo rekani kutegherezga ku nchimi zinu, ŵavyanusi ŵinu, ŵakulota ŵinu, wakombeza ŵinu, pamwenga ŵakuwukwa ŵinu, ŵeniwo ŵatimuneniyani, ‘Kuti mukateŵetiyanga karonga wa Babiloni cha.’

¹⁰Mautesi gheniwo ŵachima kwaku, kuti ndikudikiskeningimo, ndipo mukafwanga.

¹¹Kweni mtundu we wose weniwo ukaŵikanga khose lake mu gori la karonga wa Babiloni ndi kumutataliya, ndikawusiyanga pa charu chake, kulima, ndi kuja mwenimo, atiti Ambuya.” ’ ”

¹²Kwaku Zedekiya karonga waku Yuda ndingukamba viyo: “Ŵikani makhosi ghinu mu gori la karonga wa Babiloni mumutataliye iyo ndi ŵanthu ŵake, mwakuti muŵe ŵamoyo.

¹³Chifukwa chine kuti iwe ndi ŵanthu ŵako mubayike ndi lipanga, chilala, ndi chideru nge ndimo Ambuya akukambiya pa mtundu wose wo ukalekanga kutataliya karonga wa Babiloni?

¹⁴“Rekani kutegherezga ku mazu gha ŵamchimi wo ŵatiti, ‘Kuti mukatataliyanga karonga wa Babiloni cha,’ pakuti mbutesi wo ŵatimuchimiyani.

¹⁵Ine ndilivi kuŵatuma, atiti Ambuya, kweni ŵachima ndi utesi mu zina langu, pakuti kukaŵanga kuti ndikakudikiskaningimo ndipo mukafwanga, imwe pamoza ndi ŵamchimi ŵeniwo ŵatimuchimiyani.”

¹⁶Sono ndingukamba ndi ŵazukuru ndi ŵanthu wose yaŵa, kuti, “Viyo atiti Ambuya, Rekani kuvwiya mazu gha ŵamchimi ŵinu wo ŵatimuchimiyani, kuti, ‘Ehe, viyaŵi vya nyumba ya Ambuya vikawezgekanga kwa sosonokweni kutuwa ku Babiloni’ uwu mbutesi wo ŵatumukambiyani.

¹⁷Rekani kuŵategherezga; tataliyani karonga wa Babiloni mwakuti muŵe ŵamoyo. Chifukwa chine chakuti msumba uwu uŵe mapopa?

¹⁸Asani iwo mbamchimi, ndipo asani mazu gha Ambuya ghemwaku iwo, rekani ŵaŵeyere Ambuya ŵa maŵanja, kut viyaŵi vyo vikujamo mu nyumba ya Ambuya, mu nyumba ya karonga waku Yuda, ndi mu Yerusalemu vireke kutoreke ku Babiloni.

¹⁹Pakuti atiti viyo Ambuya ŵa maŵanja gha pa mizati, nyanja, vyakuŵikapo, ndi viyaŵi vinyake vyo vikusiyaka mu msumba uwu,

²⁰vyo Nebukadanezara karonga wa Babiloni wengavi kuruta navyo, pa nyengo yo wanguyole amikoli mu Yerusalemu kuruta nawo ku Babiloni Yekoniya mwana waku Yehoyakimu, karonga waku Yuda ndi ŵamazaza wose ŵaku Yuda ndi Yerusalemu,

²¹ghapa viyaŵi vyo vikusiyika mu nyumba ya Ambuya, mu nyumba ya karonga waku Yuda, ndi mu Yerusalemu:

²²Vikanyamulikiyanga ku Babiloni kwachija kwenikuwa mpaka zuŵa lenilo ndikavilongosoliyanga, atiti Ambuya. Pavuli ndikawezgiyanga kuvuli ndi kuviwezge ku malo yagha.”