Read gitonga Yeremiya 30 Bible Online

Yeremiya 30 - gitonga bible

Yeremiya 30

¹Mazu ghanguza kwaku Yeremiya kutuwa ku Ambuya:

²“Viyo atiti Ambuya, Chiuta waku Yisraele: Ulembe mu buku mazu ghose gho ndakukambiya.

³Pakuti ehe, mazuŵa ghakazanga, atiti Ambuya, penipo ndikawezgiyanga umampha ŵanthu ŵangu, Yisraele ndi Yuda, atiti Ambuya, ndikaŵawezgiyanga ku charu chenicho ndingupaska auskeu, ndipo chikaŵanga chawo.”

⁴Yagha ndigho mazu gho Ambuya angukamba gha paku Yisraele ndi Yuda:

⁵“Viyo atiti Ambuya: Tavwa kuliya kwa mantha, kwa chofyu, chimangu cha.

⁶Fumbani sono, ndipo wonani, kumbi munthurumi wangapapa mwana? Na chifukwa chine ndiwona munthurumi we yose manja ghake wako mu chiunu ulaka ndi munthukazi wachipapa? Chifukwa chine chisku chose chatuŵa?

⁷Owe! Zuŵa lo ndikurudi palive lakukozgana nalo; ndi nyengo ya suzgu yaku Yakobe; ndipuuli wakataskikangako kwaku lo.

⁸“Ndipo kwazamukuŵa mu zuŵa lo, atiti Ambuya ŵa maŵanja ndazamufyo gori pa khosi lawo, ndikapasuwanga ma unyoro, ndipo ŵalendo kuti ŵakaŵaŵetanga so cha.

⁹Kweni ŵakatataliyanga Ambuya Chiuta wawo ndi Davidi karonga wawo, mweniyo ndikaŵayuskiyanga.

¹⁰Viyo reka kopa, Yakobe we, mteŵeti wangu, atiti Ambuya, chingana nkhufipa mtima, Yisraele we; pakuti ehe, ndikakutaskanga kutuwa kutali, ndi mbeu yako kutuwa ku charu cha uŵanda wawo. Yakobe wakawenga ndi kuja mu chisisi ndi kufwasa, ndipo kukaŵangavi wakumofya.

¹¹Pakuti nde nawe pamoza kukutaska, atiti Ambuya; ndikamaranga kwakufikapo mitundu yose mwaku yeniyo ndingukumbininiskani, imwe kuti ndikamumariyaninga limu cha. Ndikakulanganinga mwakwenere, kweni kuti ndikakusiyaninga waka ŵambura kulangika cha.

¹²“Pakuti viyo atiti Ambuya: Kulasika kwako nkhwambura mapoleka, ndipo bala lako ndaurwirwi.

¹³Palivi wakukujaliya unkhoswe mlando wako, kulivi munkhwala wa bala lako, kulivi chakukupozge.

¹⁴Ŵakwanjiwa ŵako wose ŵakuruwa; kuti ŵatikuphwere nanga nkhamana cha; pakuti ndakupuma iwe nge ngwakupindikana, kulanga kwa murwani wambura lisungu pakuti kulakwa kwako nkhukuru, inya mauheni ghako nganandi.

¹⁵Chifukwa chine uliya ndi kulasika kwako? Kuŵaŵa kwako nkhwambura mapozgeka. Ndachita vinthu ivi kwaku iwe, chifukwa kulakwa kwako nkhukuru, chifukwa mauheni ghako nganandi.

¹⁶Chifukwa cho wose wo ŵatikuphwanya ŵakaphwanyikanga, ndipo ŵakupindikana ŵako wose, yumoza ndi yumoza ŵakarutanga mu uŵanda wo ŵatukuskoŵa ŵakaskoŵekanga, ndipo wose wo ŵatukurgha ndikaŵachitanga kuti nawo ŵarghike.

¹⁷Pakuti ndikakuwezgiyanga umoyo wamampha, ndipo ndikachizganga mabala ghinu, atiti Ambuya, chifukwa ŵakudana kuti we wakutayika kubwalo: ‘Ndi Zioni, mweniyo palivi yo watimuphwere!’

¹⁸“Ambuya atiti, Ehe, ndikawezgiyanga umampha ku mahema ghaku Yakobe, ndikaŵanga ndi chitima ndi malo ghake ghakujamo; msumba ukazengekanga so pa mapopa ghake, ndipo nyumba ya ufumu yikamanga penipo yenga kali.

¹⁹Mwenimo mukatuwanga sumu zakuwonge, ndi mazu ghaku wo mbakusangaruka. Ndikaŵandaniskanga, kuti ŵakaŵanga ŵamana cha; ndikaŵachitanga kuŵa ŵakuzirwa, ndipo kuti ŵakayuyukanga cha.

²⁰Ŵana ŵawo ŵakawanga nge mbara ŵakali, mpingu wawo ukazengekanga paurongo pangu; ndipo ndikalanganga wose wo ŵakaŵasuzganga.

²¹Mura wawo wakaŵanga yumoza wa ŵeneko, wakuŵausa wakatuwanga mukati mwawo; ndikamunderezganga pafupi, wakazanga kwaku ine, pakuti njani yo wangesa kuza yija kwaku ine? atiti Ambuya.

²²Imwe mukaŵanga ŵanthu ŵangu, ine ndikaŵanga Chiuta winu.”

²³Ehe lirondo la Ambuya! Ukari watuwa, lirondo lakavuruvuru, likaswekiyanga pa mutu wa muheni.

²⁴Kukwiya kwakofya kwa Ambuya kuti kukarekanga cha, mpaka penipo wachita ndi kufiska vyenivyo arongoso kuvichita. Mu mazuŵa gho ghatuza mwazamuwamo ichi.