Read gitonga Yeremiya 34 Bible Online

Yeremiya 34 - gitonga bible

Yeremiya 34

¹Mazu ghanguza kwaku Yeremiya kutuwa ku Ambuya, penipo Nebukadanezara, karonga wa Babiloni ndi ŵankhondo ŵake wose, ndi maufumu ghose ghenigho wanguusa ndi ŵanthu wose ŵarwananga ndi Yerusalemu ndi misumba yake yose:

²“Viyo atiti Ambuya, Chiuta waku Yisraele: Ruta, ukakambe ndi Zedekiya karonga waku Yuda, ukati viyo kwaku iyo, ‘Viyo atiti Ambuya: Ehe, ndipereka msumba uwu mu janja la karonga wa Babiloni, ndipo wakawuwochanga ndi moto.

³Kuti ukapozomokanga cha ku janja lake, kweni nadi ukakolekanga ndi kuperekeka mu janja lake; ukamuwonanga karonga wa Babiloni maso ndi maso ndi kurongoro nayo mlomo ndi mlomo; ndipo ukarutanga ku Babiloni.’

⁴Kweni ivwa mazu gha Ambuya, Zedekiya we, karonga waku Yuda, viyo atiti Ambuya gha paku iwe: ‘Kuti ukafwanga ndi lipanga cha.

⁵Ukafwanga mu chimangu. Ndipuuli nge ndimo ŵangoche ausu, vyachema, ŵakaronga ŵakali ŵeniwo ŵengako paurongo pako, viyo ŵanthurumi ŵawochenge vyachema ndi kukuliliya, kuti, “Owe ambuya!” ’ Pakuti ndakamba mazu, atiti Ambuya.”

⁶Sono Yeremiya mchimi wangukamba mazu yagha ghose kwaku Zedekiya karonga waku Yuda, mu Yerusalemu,

⁷penipo wumba wa ŵankhondo ŵa karonga wa Babiloni ŵarwananga ndi Yerusalemu ndi misumba yose yaku Yuda yeniyo yingujako, Lakisi ndi Azeka, pakuti yeniyi pe ndiyo misumba ya malinga yo yingujako.

⁸Mazu ghenigho ghanguza kwaku Yeremiya kutuwa ku Ambuya, pavuli Karonga Zedekiya wati wachita phanganu ndi ŵanthu wose mu Yerusalemu kuchita mumemezu wa wanangwa kwaku wo,

⁹kuti we yose wafwatuwe ŵa ŵanda ŵake ŵachiHebere, munthurumi ndi munthukazi; viyo kuti paulevi yumoza wakuchita uŵanda mu Yuda, mwana munyake.

¹⁰Ndipo ŵanguvwiya, ŵaraŵara wose ndi ŵanthu wose ŵeniwo ŵangusere mu phanganu lo lakuti we yose wafwatuwenge ku uŵanda, muŵanda wake, munthurumi pamwenga munthukazi, kuti wareke kuchitika so uŵanda; ŵanguvwiya ndi ŵanguŵafwatuwa.

¹¹Kweni pavuli ŵangugadabuka ndi ŵanguwawezga so ŵaŵanda ŵanthurumi ndi ŵanthukazi, ŵeniwo ŵangufwatuwa, ndikuŵawezge so mu uŵanda.

¹²Mazu gha Ambuya ghanguza kwaku Yeremiya kutuwa ku Ambuya:

¹³“Viyo atiti Ambuya, Chiuta waku Yisraele: Ndinguchita phanganu ndi auskemwe penipo ndinguŵatuzga mu charu cha Egipiti, kutuwa ku nyumba ya uŵanda, ndinguti,

¹⁴‘Pa umari wa virimika vinkhonde ndi chimoza we yose waku imwe wafwatuwe muHebere munyake, mweniyo wakuguliskika kwaku iwe ndipo watataliya iwe virimika vinkhonde ndi chimoza, utenere kumufwatuwako ku nchitu yako.’ Kweni auskemwe kuti ŵangunditegherezga cha chingana nkhundivwa cha.

¹⁵Ruŵi mungung'anamuka mtima ndi munguchita cho nchakurunjika mu maso ghangu pakumemeza wanangwa, we yose ku mwanasi wake, ndipo munguchita phanganu paurongo pangu mu nyumba yo yidanika ndi zina langu:

¹⁶kweni pavuli mungugadabuka so ndi mungukazuzga zina langu, penipo we yose waku imwe wanguko so muŵanda wake munthurumi ndi munthukazi; ŵeniwo munguŵafwatuwa kwakuyana ndi kukhumba kwawo, ndipo munguŵawezga kuŵa ŵaŵanda ŵinu.

¹⁷Chifukwa cho, viyo atiti Ambuya: Mulivi kundivwiya ine kumemeza we yose ku mwana munyake ndi ku mzengezgani wake; wanangwa, ehe, nditikupaskani wanangwa waku lipanga, waku chideru, ndi wanangwa waku chilala, atiti Ambuya. Ndikamuchitaninga kuŵa chakofya ku maufumu ghose gha charu chapasi.

¹⁸Ndipo ŵanthu wo ŵangulakwiya phanganu langu ndipo kuti ŵangusunga cha muruliku waphanganu lo, lenilo ŵanguchita paurongo pangu, ndikachitanga uli ndi thole lenilo ŵadumuwa vipitika viŵi ndi kujumpha pakati paku vyo.

¹⁹Mafumu ghaku Yuda, mafumu gha Yerusalemu, ŵamthenu, ŵazukuru, ndi ŵanthu wose ŵa charu cho ŵeniwo ŵangwenda pakati pavipitika vya thole;

²⁰ndikaŵaperekanga mu janja la ŵakupindikana ŵawo ndi mu janja laku ŵeniwo ŵapenja kuŵabaya. Viŵanda vyawo virghikenge ndi viyuni vya mude ndi vinyama vya charu chapasi.

²¹Ndipo Zedekiya karonga waku Yuda, ndi ŵaraŵara ŵake, ndikaŵaperekanga mu janja la ŵakupindikana ŵawo ndi mu janja laku ŵeniwo ŵapenja kuŵabaya, mu janja la umba wa ŵankhondo ŵa karonga wa Babiloni ŵeniwo ŵatuwako kwako.

²²Ehe, ndikalanguranga, atiti Ambuya, ndipo ndikaŵawezgiyanga ku msumba uwu; ndipo ŵazamukurwa nawo, ndi kuwocha ndi moto. Ndikachitanga misumba yaku Yuda kuŵa mapopa mwambura wakujamo.”