Read gitonga Yeremiya 39 Bible Online

Yeremiya 39 - gitonga bible

Yeremiya 39

¹Mu mwezi wa chumi, chirimika cha chinkhonde ndi vinayi chaku Zedekiya karonga waku Yuda, Nebukadanezara karonga wa Babiloni ndi wumba wake wose wa nkhondo ŵanguza kurwana ndi Yerusalemu ndipo ŵanguwuzinga;

²pa zuŵa la chinkhonde ndi chinayi, mu mwezi wa chinayi, mu chirimika cha chumi ndi chimoza muzi ungupankhuka.

³Penipo Yerusalemu wangutoreka, ŵaraŵara wose ŵa karonga ŵa Babiloni ŵanguza ndi ŵanguja pasi mu likomo la pakati: Nergala-sharezere, Samagaranebo, Serasekimu mlonda mura, Nergalasharezere, mchimi mura, pamoza ndi nduna zose za karonga wa Babiloni.

⁴Penipo Zedikiya karonga waku Yuda ndi ŵankhondo ŵake wose ŵanguwawona, ŵanguthaŵa. Ŵangutuwa mu msumba ndi usika ŵanguruta mu nthowa yaku munda wa karonga, ŵanguporota pa likomo la pakati pa malinga ghaŵi, ndipo ŵanguruta kulazga ku Araba.

⁵Kweni wumba wa ŵankhondo ŵa ŵaKaldiya unguŵandondoloska, ndipo ungusaniya Zedikiya mu madambo gha Yeriko; ŵanguti ŵamuto, ŵanguza nayo kwaku Nebukadanezara karonga wa Babiloni pa Ribula, mu charu cha Hamati, ndipo wangumweruzga.

⁶Karonga wa Babiloni wangubaya ŵana ŵaku Zedekiya ndi ŵakuzirwa wose ŵaku Yuda pa Ribula pa maso pake.

⁷Wangukorowo maso ghaku Zedekiya wangumumanga ndi matangaja kuya nayo ku Babiloni.

⁸ŴaKaldiya ŵangocha nyumba ya karonga ndi nyumba za ŵanthu, ndi ŵangubwanganduliya pasi malinga gha Yerusalemu.

⁹Sono Nebuzaradani, nduna ya ŵalonda wanguyola ŵanthu wose wo ŵangusiyika mu msumba, ŵeniwo ŵanguthaŵiya kwaku iyo, ndi wose wo ŵangujamo kuya ku umkoli ku Babiloni.

¹⁰Nebuzaradani, nduna ya ŵalonda, wangusiyamu mu charu chaku Yuda, ŵanthu ŵanyake ŵakusauka ŵeniwo ŵengavi kuŵa ndi kanthu, ndipo wanguŵapaska minda ya mphereska ndi minda pa nyengo yeniyo pe.

¹¹Nebukadanezara karonga wa Babiloni wanguchita langulu paku Yeremiya; wangukamba ndi Nebuzaradani nduna ya ŵalonda, kuti,

¹²“Mumuto, mumuphwere umampha ndi mungamuchitiya kaheni cha, kweni muchitenge nayo uli ndimo wakukambiyeninge.”

¹³Viyo Nebuzaradani nduna ya ŵalonda, Nebushazabani mlonda mura, Nergala-sharezere mchini mura ndi nduna zose za karonga wa Babiloni,

¹⁴ŵangutuma ndi ŵangwachimuto Yeremiya ku bwalo la ukaidi, ŵangumupereka kwaku Gedaliya mwana waku Ahikamu, mwana waku Shafani, kuti warutenge nayo kwake. Viyo wanguja mukati mu ŵanthu wo.

¹⁵Mazu gha Ambuya ghanguza kwaku Yeremiya pa nyengo yo wangujarikiya mu bwalo la ukaidi.

¹⁶“Ruta, ukakambe kwaku Ebedimeleke mu Etiopia, ‘Viyo atiti Ambuya ŵa maŵanja, Chiuta waku Yisraele: Ehe, ndikafiskanga mazu ghangu gha pa msumba uwu chifukwa cha uheni kuti mpha chifukwa cha umampha cha, ndipo ghakafiskikanga paurongo pako mu zuŵa lenilo.

¹⁷Kweni ndikakutaskanga iwe mu zuŵa leniliya, atiti Ambuya, ndipo kuti ukaperekekanga mu janja la ŵanthu wo utopa cha.

¹⁸Pakuti ndikakutaskanga, kuti ukabayikanga ndi lipanga cha; kweni ukaŵanga ndi umoyo wako nge ndi mphoto ya nkhondo, chifukwa wagomezga mwaku ine, atiti Ambuya.’ ”