Read gitonga Yeremiya 42 Bible Online

Yeremiya 42 - gitonga bible

Yeremiya 42

¹Sono wose ŵakurongozga maŵanja gha nkhondo, Yohanani mwana waku Kareya ndi Azariya mwana waku Hoshaya, ndi ŵanthu wose kutuwa ku ŵapasi mpaka ku ŵapachanya, ŵangundere pafupi,

²ndi ŵanguti kwaku Yeremiya mchimi, “Zomerezga kuŵeyere kwidu kuvwike paurongo pako, ndipo utirombe ku Ambuya Chiuta wako, pa ŵakujapo yaŵa wose (pakuti nge ndimo utitiwone tajapo ŵamanavi chingana kali tinguŵa ŵanandi),

³kuti Ambuya Chiuta wako watirongo nthowa yakuti tendemo, ndi chinthu cho titenere kuchita.”

⁴Yeremiya wanguti kwaku wo, “Ndamuvwani, ehe, ndikarombanga ku Ambuya Chiuta winu nge ndimo mwapemphe, ndipo chenicho chose Ambuya akamukanga ndikuneniyeninge: kuti ndikabisanga kanthu kwaku imwe cha.”

⁵Sono iwo ŵanguti kwaku Yeremiya, “Ambuya aŵe kaboni mumeneska ndi wamagomekezgeka paku ifwe asani tirekenge kuchita kwakuyana ndi mazu ghose gho Ambuya Chiuta wako watukutuma kwaku ifwe.

⁶Manyi ngamampha pamwenga ghaheni, tikavwiyanga mazu gha Ambuya Chiuta widu kwaku mweniyo titukutumako iwe, alinga kuti kutiŵiyenge umampha ifwe tichivwiya mazu gha Ambuya Chiuta widu.”

⁷Pa umari wa mazuŵa chumi mazu gha Ambuya ghanguza kwaku Yeremiya.

⁸Sono wangudana Yohanani mwana waku Kareya ndi wose ŵakurongozga maŵanja ŵeniwo ŵenga pamoza nayo, ndi ŵanthu wose kutuwa ku ŵapasi mpaka ku ŵapachanya.

⁹Ndipo wanguti kwaku wo, “Viyo atiti Ambuya, Chiuta waku Yisraele, kwaku mweniyo mungundituma kwachipereka kuŵeyere kwinu paurongo pake:

¹⁰asani mukajaririyanga mu charu ichi, iku ndikakuzenganinga, kumuguziyani pasi cha; ndikakupandaninga, ndipo kuti ndikuponthoninga cha; pakuti ndaweko ku uheni wo ndikumuchitiyani.

¹¹Rekani kopa karonga wa Babiloni, mweniyo mutopa, rekani kumopa, atiti Ambuya, pakuti ine nde namwe pamoza, kumuwomboni ndi kumutaskani ku janja lake.

¹²Ndikupaskeninga lisungu, kuti iyo wakuchitiyeni lisungu, ndi kumuzomerezgani kuja mu charu chinu.

¹³Kweni asani mutiti, ‘Kuti tikajaririyanga mu charu ichi cha,’ kureka kuvwiya mazu gha Ambuya Chiuta winu ndi kunena kuti,

¹⁴‘Awa, tikarutanga ku charu cha Egipiti, kweniko kuti tamuwona nkhondo cha, pamwenga kuvwa mazu gha mbata, pamwenga kufwa ndi nja chifukwa cha kusoŵa chiŵande, ndipo tamuja kwenikuwa,’

¹⁵iku vwani mazu gha Ambuya, mwa ŵakujapo ŵaku Yuda. Viyo atiti Ambuya ŵa maŵanja, Chiuta waku Yisraele: Asani mukaratanga visku vinu kwachisere mu Egipiti ndi kuruta kwachija kuwa,

¹⁶po ndipo lipanga lo mutopa likamusaniyaninga kwenikuwa mu charu cha Egipiti: chilala cho mutopa chikandondoloskanga ndi nthazi pavuli pinu ku Egipiti; ndipo mwamufwiya kwenikuwa.

¹⁷Ŵanthu wose wo ŵarazga visku vyawo kuya ku Egipiti kwachija kwenikuwa, ŵakafwanga ndi lipanga, ndi chilala, ndi chideru ndipo kuti ŵakaŵanga ndi ŵakujapo cha pamwenga ŵakupozomoka ku chiheni chenicho ndikazanga nacho pakuwo.

¹⁸“Viyo atiti Ambuya ŵa maŵanja, Chiuta waku Yisraele: Mwenimo kukwiya kwangu ndi ukari wangu vingupungulikiya pa ŵakuja mu Yerusalemu, viyo ndimu ukari wangu ukapungulikiyanga paku imwe asani mutiya ku Egipiti. Mukaŵanga kawerere, chakofya, thembo chakunyozeka. Kuti mughawonenge so cha malo yagha.

¹⁹Ambuya akamba kwaku imwe, mwaŵakujapo ŵaku Yuda, ‘Mungarutanga ku Egipiti cha.’ Ziŵiskani kuti ndakuchenjezgani msana wale,

²⁰kuti pakupuruka kwinu mukafwanga. Pakuti mungundituma ku Ambuya Chiuta winu kuti, ‘Tirombe ku Ambuya Chiuta widu, ndipo chose cho Ambuya Chiuta widu wakambenge utitauliye ndipo tikachichitanga.’

²¹Ndipo msana wale ndakutauliyani ichi, kweni kuti mwavwiya mazu gha Ambuya Chiuta winu cha, kuchita cho wangundituma kumuneniyani.

²²Sono chifukwa cho ziŵiskani kuti mukafwanga ndi lipanga, ndi chilala, ndi chideru mu malo ghenigho munweka kwachijamo.”