Read gitonga Yeremiya 48 Bible Online

Yeremiya 48 - gitonga bible

Yeremiya 48

¹Gha paku Moabu. Viyo atiti Ambuya ŵa maŵanja, Chiuta waku Yisraele: “Soka kwaku Nebo, pakuti wapasuka! Kiriataimu walengeskeka wapundika: linga lalengeskeka ndi labwangandukiya pasi:

²mbiri yaku Moabu yamara. Mu Heshiboni ŵangulongoso cheheni paku iyo: ‘Zaninga, timudumuwe kuti uŵe mtundu so cha!’ Imwe, namwe mwa ŵakuja mu Madimeni, mukachetamiskikanga; lipanga likakundondoloskaninga.

³“Avwani! Kuliya kutuwa ku Horonaimu, ‘Mapopa ndi phasulu likusu!’

⁴Moabu wapasulika; kuliya kuvwika mpaka ku Zoara.

⁵Pakuti pachikwera cha Luhiti ŵakwera ndi kuliya; ndipo pasendemu ya Horonaimu ŵavwa kuliya kwa phasulu.

⁶Thaŵani! Jipozomoskeni! Muŵe nge ndi chuzu mu bozwa!

⁷Chifukwa mungugomezga mu malinga ghinu ndi mu chuma chinu, imwe namwe mukatolekanga; ndipo Kemoshi[6] wakarutanga ku umkoli, ŵazukuru ŵake ndi mafumu ghake.

⁸Wakupasuwa yo wakazanga pa msumba we wose, paulengevi msumba wakupozomoka; dambo likamaranga, chifya chikaphwanyikanga, nge ndimo akambiya Ambuya.

⁹“Paskani mapapa kwaku Moabu, chifukwa wangaziŵa kuthaŵiya kutali misumba yake yikaŵanga mapopa, mwambura ŵakujamo.

¹⁰“Wakutembeka ndi munthu yo wachita nchitu ya Ambuya ndi kutomboloka; ndipo wakutembeka ndi mweniyo wakanizga lipanga lake kudiska ndopa.

¹¹Moabu waja pa chimangu kutuliya ku uhurwa wake, nge ndi vinyo yo watengama pa visika vyake; walivi kukhutulikapo kutuwa ku chiyaŵi ichi kuya ku chiyaŵi chiya, walivi kurorekapo nanga nkhu umkoli; chifukwa cho kunowa kwake kweche mwake, ndipo chema chake kuti chasinthapo cha.

¹²“Chifukwa cho, ehe, mazuŵa ghakazanga, atiti Ambuya, po ndikamutumiyanga ŵakuvunikiriya wo Wazakumuvunikiriya, kukhutuwa viyaŵi vyake, ndi kuswa vipindi vyake tumanatumana.

¹³Sono Moabu wakalengeskekanga kwaku Kemoshi, nge ndimo nyumba yaku Yisraele yingulengeskeke kwaku Betele, gomezgu lawo.

¹⁴Mukamba uli, ‘Te ŵanthazi ndi ŵankhondo ŵakulimba’?

¹⁵Wakuparghang'a Moabu ndi misumba yake waza, ndipo ŵanyamata ŵake ŵakutowa ŵasikiya kukubayika, watiti Karonga, yo zina lake ndi Ambuya ŵa maŵanja.

¹⁶Soka laku Moabu laŵandika, ndipo suzgu yake yitinthimika.

¹⁷Muchitiyeni chitenje, imwe mose mwe pafupi nayo kwakumuzunguliya, ndi wose wo ŵaziŵa zina lake; nenani, ‘Yisweka uli ndodo ya nthazi yaufumu, ndodo ya unkhankhu.’

¹⁸“Sikiya pasi kutuwa ku unkhankhu wako, uje pasi pa kufunda, iwe wakuja mu Diboni! Pakuti wakubwanganduwa Moabu waza paku iwe; wabwanganduwa malinga ghako.

¹⁹Ume pa nthowa uwone, iwe wakuja mu Aroere! Umufumbe munthurumi yo wathaŵa ndi munthukazi yo wapozomoka; kuti, ‘Kwawanji?’

²⁰Moabu wachita soni, pakuti wasweka; tenje ndi kuliya! Unene mu Arnoni, kuti Moabu waja mapopa.

²¹“Cheruzgu chaza pa charu cha chidika, pa Holoni ndi Jaza, ndi Mefata,

²²ndi Diboni, ndi Nebo, ndi Betediblataimu,

²³ndi Kiriataimu ndi Betegamula, ndi Betemeoni,

²⁴ndi Kerioti, ndi Bozra, ndi misumba yose ya charu cha Moabu, kutali ndi pafupi.

²⁵Sengwe laku Moabu ladumuka, janja lake lafyoka, atiti Ambuya.

²⁶“Muloŵereskeni, chifukwa wangujikuzga kulimbana ndi Ambuya; viyo kuti Moabu wakakunkhurukanga mu maukuzi ghake, ndipo iyo nayo wakajanga mu kusekeka.

²⁷Asi Yisraele wenga chakusekeka kwaku iwe? Kumbi wangusanirika mukati mu ŵankhungu, pakuti pose po ŵakambanga zaku iyo wapukung'anga mutu wako?

²⁸Yisiyeni misumba, janinga mu majarawi, mwa ŵakuja mu Moabu mwe! Muŵe uli ndi njiŵa yo yizenga chivimbu, mu mphepete mu mlomo wa jarawi.

²⁹Tavwa gha kujikuzga kwaku Moabu ndipo nadi watijikuzga ukongwa, pa kujituntha kwake, kujikuzga kwake, ndi kujitukumuwa kwake, ndi kujikwezga kwamtima wake.

³⁰Ine ndiziŵa muyuyu wake, atiti Ambuya; kujikuzga kwake nkhwawaka, nchitu zake zakupusika.

³¹Chifukwa cho nditenjere Moabu; ndiriliya Moabu yose; ŵanthurumi ŵaku Kiriherese nde nawo ndi chitima.

³²Kwakuruska paku Jazere ndiriliya iwe, wa mphereska yaku Sibima! Mphanda zako zingwambuka nyanja, zingwachifika ku Jazare, pa vipasi vyako vya chipwepwe ndi mphereska ziko wakubwanganduwa wawa.

³³“Chimwemwe ndi likondwa vyatuzgikapo pa charu cha vipasi cha Moabu; ndamariska vinyo mwakuponde mphereska; palivi yumoza watumukanda ndi chiwawa cha likondwa, chiwawa kuti nchiwawa cha likondwa cha.

³⁴“Heshiboni ndi Eleyale ŵaliya, mpaka kwachifika ku Jahazi mazu ghawo ghavwika, kutuwa ku Zoara kufika ku Horonaimu ndi Eglatishelishiya. Pakuti maji ghamu Nimrimu nagho ghaŵa mapopa.

³⁵Ndipo ndikamaranga mu Moabu, atiti Ambuya, yo wapereka sembe mu malo gha pachanya ndi watocha vyachema kwaku chiuta wake.

³⁶Chifukwa cho mtima wangu usinginikiya Moabu nge ndi fyolilo, mtima wangu usinginika nge ndi fyolilo pa ŵanthu ŵaku Kiriherese, chifukwa cho mausambasi gho ŵangusaniya ghamara.

³⁷“Pakuti mutu wose wasengeka ndi mwembe wose wameteka; pa manja ghose pa temekatemeka ndipo mu viunu mwe vigudulu.

³⁸Pachanya pa nyumba zose za Moabu ndi mu maluluwa mose kuti mwe kanthu so kanyake cha kweni kutenje pe; pakuti ndaswa Moabu nge nchiyaŵi chenicho palivi yumoza wakuchiphwere, atiti Ambuya.

³⁹Ehe mo chasweke! Ehe mo watenjere! Ehe Moabu wang'anamukiya msana wake mu chilengesku! Viyo Moabu wasanduka kawerere ndi chakofya kwaku wose wo mbakumuzunguliya iyo.”

⁴⁰Pakuti viyo atiti Ambuya: “Ehe, wakaphururukanga uli ndi nombo, wakatambaruliyanga mapapa ghake paku Moabu;

⁴¹misumba yikatolekanga, malinga ghakakolekanga. Mtima wa wankhondo wa Moabu mu zuŵa liya ukaŵanga nge ndi mtima wa munthukazi mu maurwirwi ghake;

⁴²Moabu wakabwangandulikanga ndipo kuti ukaŵanga so mtundu wa ŵanthu cha; chifukwa wangujitumphuska kumikana ndi Ambuya.

⁴³Mantha, zenje, ndi chiwana vye paurongo pako, iwe wakuja mu Moabu! atiti Ambuya.

⁴⁴Yo wathaŵa ku mantha, wakawanga muzenje, ndipo yo wakwera kutuwa mu zenje wakawiranga mu chiŵana. Pakuti ndikatolenga vinthu ivi paku Moabu mu chirimika cha kulangika kwawo, atiti Ambuya.

⁴⁵“Mu chiduzi cha Heshiboni ŵakuthaŵa ŵatuma kwambura nthazi; pakuti moto watuwa ku Heshiboni mulipu wa moto kutuwa ku nyumba yaku Sihoni, wabwanganduwa mphumi yaku Moabu, chifukwa cha ŵana ŵa viwawa.

⁴⁶Owe soka kwaku iwe, Moabu we! Ŵanthu ŵamu Kemoshi mbakunangika; chifukwa ŵana ŵinu ŵanthurumi ŵakoreka umkoli, ŵana ŵinu ŵanthukazi ŵaruta ku uŵanda.

⁴⁷Kweni ndikawezganga umampha waku Moabu mu mazuŵa gha pavuli, atiti Ambuya.” Cheruzgu cha paku Moabu chafika yapa.