Read gitonga Yeremiya 49 Bible Online

Yeremiya 49 - gitonga bible

Yeremiya 49

¹Gha pa Amoni. Viyo atiti Ambuya: “Kumbi Yisraele walivi ŵana? Kumbi walivi ŵakuhara? Na chifukwa chine Milkomo walonda Gadi, ndipo ŵanthu ŵake ŵaja mu mizi yake?

²Chifukwa cho, ehe, mazuŵa ghakazanga, atiti Ambuya, ndikachiskanga mumemezu wankhondo kuti uvwike kwachirwana ndi Raba wa Amoni; ukaŵanga chimbumira cha mapopa, ndipo mizi yake yikawochekanga ndi moto; sono Yisraele wakapokanga wo ŵangupoka iyo, atiti Ambuya.

³“Tenje, Heshiboni, we, pakuti Ai wachitika mapopa! Liyani, mwa ŵana ŵanthukazi ŵaku Raba! Jivwarikeni vigudulu, tenjeni, ndi chimbiyani uku ndi uku vivwati vya mphaka! Pakuti Milkomo wakayanga mu umkoli ŵazukuru ŵake ndi mafumu ghake.

⁴Chifukwa chine utijitukumuwa pa madambo ghako, wa mwana munthukazi wambura magomezgeka; yo wangugomekezga mu chuma chake, kunena kuti, ‘Njani yo wakandiyukiyanga?’

⁵Ehe, ndikatolenga mantha paku iwe, atiti Ambuya Chiuta wa maŵanja, kutuliya kwaku wose ŵakukuzunguliya, ndipo mukadikiskikiyanga kubwalo we yose kurunjika po warata maso, paulengevi wakuwunjika ŵamayinga.

⁶Kweni pavuli ndikawezgiyanga umampha paku Amoni, atiti Ambuya.”

⁷Gha paku Edomu. Viyo atiti Ambuya ŵa maŵanja: “Kumbi zeru kuti zichalimu cha mu Temani? Kumbi fundu zaŵamariya ŵa zeru? Kumbi chinjeru chawo chikuzilimitiya?

⁸Thaŵani, weriyani vuli, jani mu zindimba, mwa ŵakuja mu Dedani mwe! Pakuti ndikatolenga soka laku Esau paku iyo, pa nyengo yo ndimulangenge.

⁹Asani ŵakupontho mphereska ŵakazanga kwako, kuti ŵakasiyangamo cha mphereska zakutondomo ŵa muvuli? Asani ŵankhungu ŵangazandi usiku, asi ŵazamunanga vyakukwana iwo pe?

¹⁰Kweni ine ndamujarika nkhuli Esau, ndakungunuwa malo ghake ghakubisamamo, ndipo watondeka kujibisa. Ŵana ŵake ŵaphwanyika, ndi ŵana ŵanyake, ndi ŵanasi ŵake, ndipo iyo kuti walipo so cha.

¹¹Ŵareke ŵana ŵako ŵaranda, ine ndikaŵasunganga ŵamoyo; ndipo virekeni vyoko vinu vigomekezge mwaku ine.”

¹²Pakuti viyo atiti Ambuya: “Asani wo ŵengavi kwenere kumwa nkhondo ndiwo ŵatumwa, kumbi iwe ukarutanga wambura kulangika? Kuti ukarutanga wambura kulangika cha, kweni utenere kumwa.

¹³Pakuti ndarapa paku ndamweni, atiti Ambuya, kuti Bozra wakaŵanga chakofya, wakunyozeka, phasulu, ndi thembo; ndipo mizi yake yose yikaŵanga mayiyi muyaya.”

¹⁴Ndavwa uthenga wakutuwa ku Ambuya, ndipo nthumi yatumika mu mitundu: “Unjikanani pamoza mwaŵeni mwija ndipo zani ku limbana nayo, sokiyani ku nkhondo!”

¹⁵Pakuti ehe, ndikamusanduskaninga ŵamana mukati mu mitundu, ŵakutozeka mukati mu ŵanthu.

¹⁶Kofya ko we nako kwakupusika, ndi kujikuzga kwa mtima wako, iwe wakuja mu malijengwajengwa gha mya, iwe uthamiya utali wa mtunthu. Chingana uchita chivimbu chako nge ncha nombo, ine ndikakusiskiyanga pasi kutuwa kwenikuwa, atiti Ambuya.

¹⁷“Edomu wakaŵanga chakofya: yose wakudumuwapo pake wakawofyerwanga ndipo wakajumanga chifukwa cha masuzgu ghake ghose.

¹⁸Uli ndimo Sodomu ndi Gomora ndi misumba yinyawo yakuŵandikana nayo yingupasukiya, atiti Ambuya, palivi munthu yo wakajangamo muwa, palivi munthu yo wendamugonamo.

¹⁹Ehe, nge ndi nkharamu yituwa mu lisuwa la Yordane kulimbana ndi khora la mberere lakukho, ruŵiruŵi ndikaŵachitanga kuŵa wakuthaŵa kwaku iyo; ndipo ndikamikanga paku iyo mweniyo ndingakhumba kusankha. Pakuti ndi yani wakulingana nane? Njani wangamikana nane ndimuliska nunju wangaziŵa kuma paurongo pangu?

²⁰Chifukwa chenicho vwani kanozgedu ka Ambuya keniko anozga kumikana ndi Edomu ndi vifukwa vyo avisaniya kumikana ndi ŵakuja mu Temani: chingana nthumanatumana twa muskambu wo tukaguguzikiyanga kunyake; kwakuneneska khora lawo likawayukanga pa soka lawo.

²¹Pa chiwawa cha kuwa kwawo charu cha pasi chikatenthemanga; chiwawa cha kuliya kwawo chikavwikanga pa Nyanja Yiyera.

²²Ehe, yumoza wakakwelanga ndi kuwuluka kwa mankharu nge ndi nombo, ndi kutambaruliya mapapa ghake pa Bozra, ndipo mtima wa wankhondo wa Edomu ukaŵanga mu zuŵa liya uli ndi mtima wa munthukazi wachiŵa mu kuŵaŵa kwake.”

²³Gha paku Damasko. “Hamati ndi Arpadi ŵasuzgika, pakuti ŵavwa uthenga uheni; ŵasongonoka ndi mantha, ŵasuzgika uli ndi nyanja yo yayuka yo kuti yingaja bata cha.

²⁴Damasko watomboroka, wangung'anamuka kuti wathaŵenge; mantha ghamuvumbatiya; suzgu ndi vitima vyamuko, nge ndi munthukazi pa kupapa.

²⁵Ehe, mo muzi wakuvwika wasiyikiya, muzi wa likondwa!

²⁶Chifukwa cho ŵanyamata ŵake ŵakawiyanga mu maluluwa ghake ndipo ŵankhondo ŵake wose ŵakaphwanyikanga mu zuŵa leniliya, atiti Ambuya ŵa maŵanja.

²⁷Ndipo ndikakozganga moto mu linga la Damasko ndipo ukarghanga malinga ghaku Benehadadi.”

²⁸Gha paku Kedara ndi maufumu ghaku Hazoro gho Nebukadanezara karonga wa Babiloni wangukoso. Viyo atiti Ambuya: “Sokani, skomiyani ku Kedara! Kamaleni ŵanthu ŵaku vuma!

²⁹Mahema ghawo ndi viŵetu vyawo vikatolekanga, saru zawo zakuchinga ndi vinthu vyawo vyose; ŵagamila ŵawo ŵakatolekanga kwaku wo, ndipo ŵanthu ŵakaliyanga kwaku iwo: ‘Mantha ghe kose kose!’

³⁰Thaŵani, kayingeni kutali, kajeni mu zindimba, mwa ŵakuja mu Hazoro imwe! atiti Ambuya. Pakuti Nebukadanezara karonga wa Babiloni walongoso chakuchita ndi imwe; ndipo wanozga fundu paku imwe.

³¹“Sokani, kaninga pa mtundu wo mgwakufwasa wo uja kwambura mantha, atiti Ambuya, wo ulivi malikomo pamwenga mipiringizgu, wo uja paku wija.

³²Ŵagamila ŵawo ŵakaŵanga ŵakuskoŵeka miskambu yawo ya ng'ombe yikarondekanga. Ndikambininiskiyanga ku mphepo zose wo ŵameta visongo vya sisi lawo, ndipo ndikatolenga uyowe wawo kutuwa ku mbegheka zawo zose, atiti Ambuya.

³³Hazoro wakasandukanga mwakuja ŵakambwe, malo ghaphasulu muyaya: palivi munthu yo wakajangamo palivi yo wendamugonamo mwake.”

³⁴Mazu gha Ambuya ghanguza kwaku Yeremiya mchimi gha paku Elamu, mu chiyambo cha muwusu waku Zedekiya karonga waku Yuda.

³⁵Viyo atiti Ambuya ŵa maŵanja: “Ehe, ndikafyonga uta waku Elamu, po pakura ukongwa nthazi yawo;

³⁶ndipo ndikatolenga paku Elamu mphepo zinayi kutuwa ku malo ghanayi gha kuchanya; ndikaŵambiniskiyanga ku mphepo zose zo, ndipo kuti kukaŵanga mtundu cha wo ŵalekenge kuyako wo ŵadikiskika mu Elamu.

³⁷Ndikawofyanga ŵaElamu paurongo pa ŵakupindikana ŵawo, paurongo paku wo ŵapenja kuŵabaya. Ndikatolenga chiheni paku wo, kukwiya kwangu kwakofya, atiti Ambuya. Ndikatumanga lipanga pavuli pawo, mpaka penipo ndaŵamara;

³⁸ndikamikanga chitengo changu cha ujumu mu Elamu, kuphwanya karonga wawo ndi ŵaraŵara, atiti Ambuya.

³⁹“Kweni mu mazuŵa gha pavuli ndikawezgiyanga umampha paku Elamu, atiti Ambuya.”