Read gitonga Yeremiya 5 Bible Online

Yeremiya 5 - gitonga bible

Yeremiya 5

¹Chimbiriyani uku ndi uku mu miseu ya Yerusalemu, lereskani ndi teskani! Penjani uku ndi uku mwenimo! Kuwona vinu mungasaniya munthu, mweniyo wachita cheruzgu chirunji ndi wapenja uneneska; alinga kuti ndimugowoke.

²Chingana ŵatiti, “Nge ndimo aliri amoyo Ambuya,” kweni ŵarapa kwakupusika.

³Ambuya mwe, asi maso ghinu ghapenja uneneska? Imwe munguŵapuma, kweni kuti ŵanguvwa kuŵaŵa cha; imwe munguŵamara, kweni kuti ŵangukhumba kususkikacha. Ŵalimbiska visku vyawo kwakuruska jarawi ŵakana kung'anamuka mtima.

⁴Viyo ine ndinguti, “Yaŵa mbakusauka, ŵalivi chinjeru; pakuti kuti ŵaziŵa cha nthowa ya Ambuya, dangu laku Chiuta wawo.

⁵Ndikarutanga ku ŵaraŵara, ndamurongoro nawo; pakuti ŵaziŵa nthowa ya Ambuya, dangu laku Chiuta wawo.” Kweni iwo so nawo ŵangufyo goli lo, ŵakuswa maunyoro ghakumangiya.

⁶Chifukwa chenichi nkharamu yakutuwa ku dondo yazakuŵabaya, mphumphi yakutuwa ku bozwa yazakuŵamara. Nyalubwe wakhazga mu mizi yawo, we yose wakutuwa mwaku yo wakaparurikanga tumanatumana; chifukwa vyakulakwa vinandi; kuwere vuli kwawo nkhukuru.

⁷“Ndingamugowokiyani uli? Ŵana ŵinu ŵakundisiya ine ndipo ŵarapiya paku wo kuti mba chiuta cha. Penipo ine ndinguŵahiŵa kwakuguta iwo ŵangureŵa, ndipo ŵangusere ŵanandi mu nyumba za ŵareŵi.

⁸Ŵanguhiŵika umampha ukongwa, ŵanguŵa nge mba kavalo mu unkharghi, we yose kukhumbira muwoli wa munyake.

⁹Kumbi kuti ndikaŵalanganga cha chifukwa cha machitidu yagha? atiti Ambuya; ndipo kuti ndikajichitiyanga thayu cha pa mtundu nge ndi uwu?

¹⁰“Ukwere ukaporoti mu mizere yake ya mphereska ndi ukaparghang'e, kweni kwachimarizgiya limu cha; katuzgemo mphanda zake pakuti kuti za Ambuya cha.

¹¹Pakuti nyumba yaku Yisraele ndi nyumba yaku Yuda ŵaŵa ŵambura magomezgeka kwakufikapo kwangu, atiti Ambuya.

¹²Ŵakamba vya utesi pa Ambuya, ndipo ŵatiti, ‘Kuti wachitenge kanthu cha; palivi chiheni cho chikazanga paku ifwe, chingana nkhuti tikawonanga lipanga pamwenga chilala cha.

¹³Ŵamchimi ŵakaŵanga nge ndi mphepo; mazu mulivi mwa wo, Viyo ndimu chikachitikiyanga kwaku wo!’ ”

¹⁴Chifukwa chenichi atiti Ambuya, Chiuta wa maŵanja: “Chifukwa ŵakamba mazu yagha, ehe, nditighachita mazu ghangu mu mlomo wako kuŵa moto, ndipo ŵanthu yaŵa ŵakaŵanga nkhuni, ndipo moto ukaŵabayanga.

¹⁵“Ehe, ndikatolenga paku iwe mtundu wakutuliya kutali wa nyumba yaku Yisraele, atiti Ambuya. “Uwu ndi mtundu wakukhwima, ndi mtundu wamwaka, mtundu weniwo mazu ghake imwe mulivi kughaziŵa, chingana nkhuti mungawamo cha cho warongoro.

¹⁶“Phodo lawo lenge ndi muunda wa mwazi, wose mbanthu ŵakulimba.

¹⁷“Ŵazamkurgha vuna yinu ndi kurgha kwinu; ŵazamkurgha ŵana ŵinu ŵanthurumi ndi ŵana ŵinu ŵanthukazi; ŵazamkurgha mberere zinu ndi viŵetu vinu: ŵazamkurgha mphereska zinu ndi miti ya mikuyu; ŵazamubwanganduwa ndi lipanga mizi yinu ya malinga mwaku yo mugomezga.”

¹⁸“Kweni chingana ndi mu mazuŵa gho, atiti Ambuya kuti ndikafiskanga umari wakufikapo paku iwe cha.

¹⁹Ndipo penipo ŵanthu ŵinu ŵakambenge, ‘Chifukwa chine Ambuya Chiuta ŵachita vinthu vyose ivi paku ifwe?’ Muŵaneniyenge iwo, ‘Pakuti mwasiya ine ndipo mwatataliya ŵachiuta ŵachilendo mu charu chinu, viyo mukatataliyanga ŵalendo mu charu chenicho kuti nchinu cha.’ ”

²⁰Ziŵiskani ichi mu nyumba yaku Yakobe, chimemezeni mwaku Yuda;

²¹“Vwani ichi mwa ŵanthu ŵakupusa ndi ŵambura zeru, mwaŵakuwa ndi maso kweni kuti muwona cha, mwa ŵakuŵa ndi makutu, kweni kuti mutuvwa cha.

²²Kumbi kuti mutindopa cha ine? atiti Ambuya; Kumbi kuti mumbwambwanthiya cha paurongo pangu? Ndinguŵikapo mchenga nge ndi mphaka ya nyanja, ndi dangu la muyaya kuti yireke kurutiliyapo, chingana mayigha ghapumeko, kuti ghangayijumpha cha, nanga ghawuruma, kweni kuti ghangarutiliya yapa cha.

²³Kweni ŵanthu yaŵa ŵendi mtima unonono ndi wakugaruka; ŵapatuka ndipo ŵaruta kunyake.

²⁴Kuti ŵakamba cha mu mitima yawo, ‘Tiyeni topenge Ambuya Chiuta widu, mweniyo wapaska vuwa mu nyengo yake, vuwa yamtumbuku ndi ya chipwepwe, ndipo watitiŵikiya ŵasabata ŵakupaturikiya kuvuna.’

²⁵Mphurupuru zinu zikutuzgapo nthowa izi, ndipo mauheni ghinu ghakanizga vinthu vyamampha kwaku imwe.

²⁶Pakuti ŵanthu ŵaheni ŵawoneka mukati mu ŵanthu ŵangu; ŵabisama nge ngwakuthya nkhwali. Watuthya chiŵana; ŵatonja ŵanthurumi.

²⁷Uli ndi sokora yakuzaza tuyuni, nyumba zawo zizala fuzi yiheni; chifukwa cho ŵaŵa ŵakutukumuka ndi ŵaromba,

²⁸ŵakuwa ndi kututuŵa, ŵali bwitubwitu. Kuti ŵaziŵa po ŵamurekezga nchitu zawo za mphurupuru cha; kuti ŵateruzga ndi urunji cha mlando wa ŵaranda ŵatuwendeska mwakwenere cha, ndipo kuti wavikiriya vyakurunjika ku ŵasauchi cha.

²⁹Kumbi kuti ndikaŵalanganga cha? Chifukwa cha vinthu ivi ndipo kuti ndikajitayiyanga thayu cha pa mtundu wakuŵa nge ndi uwu?”

³⁰Chinthu chaukazuzi ndi chakofya chachitika mu charu:

³¹ŵamchimi ŵachima vyautesi, ndipo ŵazukuru ŵateruzga mo ŵakhumbiya iwo; ŵanthu ŵangu ŵatanja vyaviyo, kweni mwazamchitanji utakuti waza umari?