Read gitonga Yeremiya 6 Bible Online

Yeremiya 6 - gitonga bible

Yeremiya 6

¹Thaŵiyani kwakubisama, mwa ŵanthu ŵaku Benjamini, kuthaŵa mukati mu Yerusalemu! Mbani mbata mu Tekoa, ndipo soskani chiteskeru pa Betehakeremu; pakuti chiheni chituza kutuliya ku nkhonde ndi pharghaniko likuru.

²Ndikaparghang'anga msumba wakutowa wa Zioni wakuhiŵika umampha.

³Ŵaliska ndi viŵetu vyawo ŵakamuyukiyanga: ŵakakhomanga mahema ghawo kwakumuzunguliya, ŵakaliskanga viŵetu we yose mu malo ghake.

⁴“Rongosoni nkhondo paku iyo; tikwere, tichite nkhondo ndi msana pakati!” “Soka kwaku ifwe, pakuti lumwi laruta, pakuti miduzi ya mazulo njitali!”

⁵“Sokani, tiyeni tichite nkhondo ndi usiku, tiphwanye nyumba zake za ufumu!”

⁶Pakuti Ambuya ŵa maŵanja ŵakati viyo: “Dumuliyani pasi miti yake; ungani mugandu kuzunguliya Yerusalemu. Uwu ndiwo msumba wo utenere kulangika mulivi kanthu kanyake kweni kunyekezgeka pe mukati mwake.

⁷Mo chisima chisungiya maji ghake umampha, nayo ndimu wasungiya umampha uheni wake; viwawa ndi phasulu vivwika mukati mwake, matenda ndi mabala nyengo zose vye paurongo pangu.

⁸Uchenjezgeke, Yerusalemu we, vinu ndingatuwako ine kwako; vinu ndingakuchita kuŵa mapopa, charu chambura ŵanthu.”

⁹Viyo atiti Ambuya ŵa maŵanja: “Kanimu so kwarwana nge ndi mphereska mu ŵakujamo ŵa ŵaYisraele; uli ngwakuunjika vipasi pitiska janja lako mu mphanda zake.”

¹⁰Njani yo ndikakambanga nayo ndi kumuncheŵeska, alinga kuti ŵavwenge. Ehe, makutu ghawo ghakujara, ŵatondeka kutegherezga; ehe, mazu gha Ambuya kwaku iwo nchinthu chakutozeka, kuti ŵatighakhumba cha.

¹¹Chifukwa cho ndazazika ndi ukari wa Ambuya; ndavuka kuja nawo chisisi. “Upunguliyeni pa ŵana mu museu, ndi pa maungano gha ŵanyamata; murumi ndi muwoli wose ŵaŵi ŵakatolekanga, madoda ndi khongwe ilo.

¹²Nyumba zawo zikapaskikanga ku ŵanyake, minda yawo ndi ŵawoli ŵawo pamoza; pakuti ndikatambaruwanga janja langu kurwana ndi ŵakuja mu charu cho,” atiti Ambuya.

¹³“Pakuti kwamba ku mumana kwachifika ku mura wawo, we yose ndi msusi chifukwa cha chanduwu chakupusika; ndipo kutuwa ku mchimi mpaka ku mzukuru we yose wachita kwakupusika.

¹⁴Ŵachizga bala la ŵanthu ŵangu kamanavi keni, ŵatiti, ‘Chimangu chimangu’, penipo kulivi chimangu.

¹⁵Kumbi ŵanguchita soni pakuchita unyakazi? Awa, kuti ŵanguchita soni nanga mkhamana cha; ŵengavi kuziŵa kuzimbwa. Chifukwa cho ŵakawiyanga pamoza ndi wo ŵatauwa; pa nyengo yo ndikaŵalanganga, ŵakathereskekanga,” atiti Ambuya.

¹⁶Viyo atiti Ambuya: “Mani mu zinthowa, ndipo lereskani, fumbani nthowa za mwaka, ko kwe nthowa yamampha; ndipo mwende mwaku yeniyo! Ndipo musaniye chipumulu cha mizimu yinu. Kweni iwo ŵanguti, ‘Kuti tendenge mwaku yo cha.’

¹⁷Ndingumika ŵalonda paku imwe, ndi kuti, ‘Phwereni ku kuliya kwa mbata.’ Kweni iwo ŵanguti, ‘Kuti tikaphwerenga cha!’

¹⁸Chifukwa cho vwani, mwa mitundumwe, ndipo ziŵani, mwa mpingu, cho chikaŵanga kwaku iwo.

¹⁹Yivwa, wa charu chapasi we; ndikazanga ndi chiheni pa ŵanthu yaŵa, chipasi cha vipangu vyawo! Chifukwa walivi kuphwere mazu ghangu: ndipo nge ndi dangu langu ŵalikana.

²⁰Kafukwa nkhane ko vyakusunkhizga viziya kwangu kutuliya ku Sheba, pamwenga mijuŵa kutuliya kucharu cha kutali? Sembe zinu zakocha kuti zirondereka cha, chingana ndi mipasku yinu kuti yitindikondweska cha.

²¹Chifukwa cho atiti Ambuya; ‘Ehe, ndikaŵikanga paurongo pa ŵanthu yaŵa viguŵisku mwaku vyo ŵakaguŵanga: ŵawiskeu ndi ŵana ŵanthurumi pamoza, muzengezgani ndi bwezi ŵakamaranga.’ ”

²²Atiti viyo Ambuya: “Ehe, ŵanthu ŵakatuwanga ku charu chaku nkhonde, mtundu ukuru ukatuwanga kutali ukongwa mu charu chapasi.

²³Ŵapinga uta ndi mkondo, mbakari ndipo ŵalivi lisungu, mdinu wawo ukozgana ndi nyanja yakuuruma; ŵakwera pa ŵakavalo, ŵatijivwarika uli ndi munthu wakuya ku nkhonde, kurwana ndi iwe, wa msumba wa Zioni!”

²⁴Tavwa mbiri yaku ichi, manja ghidu ngambura nthazi, kuŵaŵa kwatizinga kuŵaŵa uli nkhwa munthukazi wakupapa.

²⁵Mungarutanga kwachisere mu minda, chingana nkhwenda mu museu cha; pakuti wakupindikanga wendi lipanga, mantha ghe posepose.

²⁶Mwa ŵanthu ŵangu, vwarani vigudulu, ndipo mukunkhuwe mu vyoto; muchite chitenje nge nchikuliya mwana munthurumi yumoza pe, maliro ghakuŵaŵa kwakuruska; pakuti kwamabuchibuchi wakubaya yo wakazanga paku ifwe.

²⁷“Ndakuchita iwe kuŵa wakwesa ndi wakulaŵa mukati mu ŵanthu ŵangu alinga kuti uziŵenge ndi kwesa nthowa zawo.

²⁸Wose mbachigaruka ŵanonono, ŵaruta uku ndi uku ndi mautesi; iwo ŵe mkuŵa ndi chisulo, wose ŵatakataka kwaŵaka.

²⁹Mathumba ghakuvukutiya ghavukuta kwakofya, mthovu wamara ndi moto; kwenguŵa kukiyakiya waka pakuti ŵaheni kuti ŵanderezgeka cha.

³⁰Ŵadanika siliva lakupatika, pakuti Ambuya aŵapata iwo.”