Read gitonga Yeremiya 8 Bible Online

Yeremiya 8 - gitonga bible

Yeremiya 8

¹“Pa nyengo yeniyiya, atiti Ambuya, viwanga vya akaronga ŵaku Yuda, viwanga vya mafumu ghake, viwanga vya ŵazukuru, viwanga vya wa mchimi, ndi viwanga vya ŵakuja mu Yerusalemu vikatuzgikanga mu miunda yawo;

²ndipo vikanikikanga pa lumwi ndi mwezi ndi maliŵanja[2] ghose gha kuchanya, ghenigho ŵanthu wo ŵangwanja ndi kughatataliya, ghenigho wangurondo, ndi ghenigho ŵangupenja ndi ŵangughasopa, ndipo kuti vikaunjikikanga chingana nkhuŵikika cha: vikaŵanga nge ndi vundira pa chisku cha charu.

³Nyifwa yikarumbikanga kwakuruska umoyo ndi wose ŵakujapo wo ŵakajangapo ŵa mbumba iyi yiheni mu malo ghose mwenimo ndaŵadikiskiya, atiti Ambuya ŵa maŵanja.

⁴“Ukakambanga kwaku wo, Viyo atiti Ambuya: Asani ŵanthu ŵawa asi ŵayuka so? Asani yumoza wapatukiya kunyake asi wawe so?

⁵Na chifukwa chine ŵanthu yaŵa ŵapatukiya kunyake, ŵawere vuli kwambura kuweko? Ŵakoreska kupusika, ŵakana kuweko.

⁶Ine ndaphwere ndi kutegherezga, kweni kuti ŵakamba kwakurunjika cha; palivi munthu yo wang'anamuka ku uheni wake, kunena kuti, ‘Nchine cho ndachita?’ Munthu yose wawere ku nthowa yake, nge ndi kavalo wakuchimbiriya mu nkhondo.

⁷Chingana ndi kakoŵa mu machanya waziŵa nyengo zake; ndipo njiŵa, kaŵeluwelu, ndi tofu, ŵasunga nyengo za kuza kwawo; kweni ŵanthu ŵangu kuti ŵaziŵa cha lamulu la Ambuya.

⁸“Mungakamba uli, kuti, ‘Te ŵazeru ifwe, ndipo dangu la Ambuya le ndi ifwe’? Kweni ehe, peni yautesi ya ŵalembi yalemba utesi.

⁹Ŵanthu ŵazeru ŵakalengeskekanga, ŵakatenthemanga ndi kutoreka; ehe, ŵakana mazu gha Ambuya, na ndi zeru uli ze mwawo?

¹⁰Chifukwa cho ndipaskenge kuŵanyake ŵawoli ŵawo, ndi minda yawo ku ŵakuŵathereska, chifukwa kwamba ku wakumariya kufika ku mura wakuruska we yose ndi msusi chifukwa cha chanduwu chakupusika; kutuwa ku mchimi kufika ku mzukuru, we yose wachita kwakupusika.

¹¹Ŵachizga bala la ŵanthu ŵangu kamanavi keni, ŵatiti, ‘Chimangu, chimangu,’ penipo chimangu palivi.

¹²Kumbi ŵanguchita soni penipo wanguchita ukazuzi? Awa, kuti ŵanguchita soni ndi keni kamana cha; ŵengavi kuziŵa kuzimbwa. Chifukwa cho ŵakawanga mukati mu ŵakuwa, penipo ndikaŵalanganga ŵakathereskekanga, atiti Ambuya.

¹³Penipo ndingwenere kuŵaunjika, atiti Ambuya, vipasi mulivi mu mphereska, nanga ndi nkhuyu mu mkuyu; chingana ndi mani ghamira, ndipo cho ndinguŵapaska chatuwako kwawo.”

¹⁴Chifukwa chine tija chisisi? Unjikanani pamoza tirutenge, kwachisere mu mizi ya malinga, tikafwiye mwenimo, pakuti Ambuya Chiuta widu ŵatiteme kufwa, ndipo ŵatipaska maji gha nduru kuti timwe, chifukwa talakwiya Ambuya.

¹⁵Tingulereze chimangu, kweni kuti tinguwona umampha cha, tingupenja nyengo yakuchizga, kweni ehe, kofya.

¹⁶“Kututa kwakukoroma kwa ŵakavalo ŵawo kuvwika kutuwa mu Dani, pakuvwa kuliya kwa ŵakavalo ŵanthurumi charu chose chiyaghayika. Ŵatuza kunanga charu ndi vyose, vyakuzaza mwaku cho, muzi ndi wose ŵakuja mwaku wo.

¹⁷Pakuti ehe, ndikatumanga zinjoka mukati mwinu, ŵachipi ŵeniwo kuti ŵangasinkhika cha, ndipo ŵakakulumaninga,” atiti Ambuya.

¹⁸Chitima changu nchambura kuchizgika, mtima ngwakutama mukati mwangu.

¹⁹Avwani, kuliya kwa ŵanthu ŵangu, kutuliya mu utali ndi mu usani wa charu: “Kumbi Ambuya mulivi mu Zioni? Kumbi karonga wake kuti we mwake cha?” “Chifukwa nchine ŵandisosomole ku kukwiya ndi ŵangoza ŵawo ŵakusemeka, ndipo ndi ŵangoza ŵawo ŵachilendo?”

²⁰“Vuna wakapo, chifuku chamara ndipo ndasono tindataskike.”

²¹Mtima wangu walasika, chifukwa cha bala la ŵanthu ŵangu, nditenje, ndipo mantha ghandizinga.

²²Kumbi mulivi munkhwala mu Gileada? Kumbi ng'anga mulivi mwenimuwa? Na chifukwa nchine umoyo wa ŵanthu ŵangu ulivi kuweremo?