Read gitonga Chitenje 3 Bible Online

Chitenje 3 - gitonga bible

Chitenje 3

¹Ine nde munthu yo wawona suzgu pasi pa ndodo yakukara kwake;

²wandidikiska ndi wanditore mu mdima mwambura ukweru we wose,

³kwakuneska wang'anamuliyapo janja lake paku ine zuŵa lose pwa.

⁴Wagugiska nyama yangu ndi khungu langu, viwanga vyangu waphwanya;

⁵wandizinga ndi wandikulunga ndi kuŵaŵa ndi suzgu;

⁶wandiŵika kuja mu mdima nge ngwakufwa wa mwaka.

⁷Wandizingiya mu chimati mwakuti nditondeke kuthaŵa; wandimanga ndi maunyolo ghazitu;

⁸nanga ndidana kubongole chovyo, wajariya kubwalo rombu langu;

⁹wajara nthowa zangu ndi mya yakusema, wagombeteska nthowa zangu.

¹⁰Wandiŵiya chikoko chakukhazga uli ndi nkharamu yakubisama;

¹¹wangundipatuska munthowa ndi kundiparuwa tumana-tumana; wandipasuwa;

¹²watweŵa uta wake ndi kundimika nge nchendamale cha muvwi wake.

¹³Wanguserezga mu mtima wangu mivwi ya phodu lake,

¹⁴ndaŵa chisembwere chakusekeka ku ŵanthu wose, ndaŵa sumu yawo zuŵa lose.

¹⁵Wandizaza ndi vyakuŵaŵa wandigutiska vya nkhanya.

¹⁶Minyu ghangu waghakukutiska muchenga, wandiweska mu vyoto.

¹⁷Mzimu wangu wauravi chimangu, ndaruwa kuti kukondwa kwe uli;

¹⁸viyo ndititi, “Unkhankhu wanguwaruta; ndi chigomezgu changu ku Ambuya.”

¹⁹Kumbukani suzgu yangu ndikuŵaŵa kwangu, vyankhanya ndi nduru!

²⁰Mzimu wangu kaŵikaŵi ughanaghana ichi ndipo utomboloka mukati mwangu.

²¹Kweni ku mtima ndikumbuka ichi; chifukwa cho ndendi chigomezgu.

²²Chifundu cha Ambuya kuti chimera cha, malisungu ghawo kuti ghagota cha;

²³ngafya mlenji we wose; ukongolekwa winu ngukuru mbwenu.

²⁴Mtima wangu utiti, “Ambuya nchigaŵa changu, chifukwa cho ndigomekezgenge mwaku iwo.”

²⁵Ambuya mbamampha kwaku wo atuŵalindizga, ku mzimu weniwo utuŵapenja.

²⁶Nkhwamampha kuti munthu walindizgenge utaski wa Ambuya, chisisi.

²⁷Nkhwamampha kuti munthu wanyamuwenge goli mu unyamata wake.

²⁸Wajenge chisisi paku yija penipo waliŵika paku iyo;

²⁹waŵike mlomo wake mu fuvu, vinu kungaŵa kweche chigomezgu;

³⁰wang'anamukiye dakama lake ku wakumupuma, ndi wazazike ndi kunyozeka.

³¹Pakuti Ambuya kuti akamutayiyanga limu cha;

³²chingana angapaska chitima, akaŵanga ndi lisungu, kwakuyana ndi uzari wa chifundu cha wo;

³³chifukwa kuti ankhumba kusuzga pamwenga kukalariska ŵana ŵa ŵanthu cha.

³⁴Ambuya kuti azomerezga chakukandirizga pasi rundi, ŵamagoŵa ŵa charu chapasi,

³⁵kutimbanizga cheruzgu cha munthu mu maso gha Wapachanya Limu,

³⁶kunyongolo mlando wa munthu, Ambuya kuti azomerezga cha.

³⁷Njani wakulangula ndipo chikuchitika, kwambura kuti Ambuya alangula?

³⁸Kumbi kuti nkhu mlomo wa Wapachanya Limu cha; ko kutuwa chamampha ndi chiheni?

³⁹Wadandauliyanje munthu wamoyo, pa chilangu cha mphurupuru zake?

⁴⁰Tiyeni tese ndi tiziwone nthowa zidu, ndipo tiwere ku Ambuya!

⁴¹Tiyeni tiyunuskiye mitima ndi manja ghidu kwaku Chiuta kuchanya:

⁴²“Talengeska ndi tagaruka, kweni mulivi kugowoke.

⁴³“Mwajikulunga ndi kukara ndi mwatindondoloska, mwabaya kwambura lisungu.

⁴⁴Mwajikulunga ndi mtambo, viyo kuti palivi rombu lo lingaporota.

⁴⁵Mwatisanduska viswaswa ndichoto mukati mu ŵanthu.

⁴⁶“Ŵarwani ŵidu wose ŵatitiwera,

⁴⁷mantha ndi zimbuna zakuwamo vyaza paku ifwe, phasulu ndi kwanangika;

⁴⁸maso ghangu ghapopoma masozi chifukwa chakupasuka kwa ŵanthu ŵangu.

⁴⁹“Maso ghangu ghakapopomanga, kwambura kureka,

⁵⁰mpaka Ambuya alereske pasi kutuwa kuchanya ndi awone,

⁵¹maso ghangu ghatindichitiska chitima pa soka la ŵamwali wose ŵamu msumba wangu.

⁵²“Ndaŵingika ulaka nkhayuni ndi wakupindikana nane kwambura kafukwa;

⁵³wangundipong'a mu zenje wamoyo ndipo wangundipong'a mya;

⁵⁴maji ghabizga mutu wangu, ndinguti, ‘Ndatayika.’

⁵⁵“Ndingudana pa zina linu, Ambuya, nde pasi mu zenji;

⁵⁶mwavwa kuŵeyere kwangu, ‘Mungajaranga gutu linu cha ku kukuta kwangu chifukwa cha chovyo!’

⁵⁷Mungundere kufupi zuŵa lo ndingumudaniyani, munguti, ‘Ungawopanga cha!’

⁵⁸“Mwandimiriya mlando wangu, Ambuya, mwawombo umoyo wangu.

⁵⁹Mwawona uheni wo wachitika kwaku ine, Ambuya; Yeruzgani mlando wangu.

⁶⁰Mwaziwona nduzga zawo zose, ndi kundiyukiya kwawo kose.

⁶¹“Mwavwa kuwoya kwawo, Ambuya, ndi kundiyukiya kwawo kose.

⁶²Milomo ndi maghanaghano ghakuwo ŵatindiyukiya vimikana nane zuŵa lose.

⁶³Wonani kuja kwawo ndi kuyuka kwawo; ŵatindimba mu sumu zawo.

⁶⁴“Muŵawezge iwo, Ambuya, kwakuyana ndi nchitu ya manja ghawo.

⁶⁵Muŵapaske kupusa kwamu mtima, thembo linu liŵe paku iwo.

⁶⁶Muŵarondo ndi kuŵaparghang'a ndi ukari kutuwa kuchanya kwinu, Ambuya.”