Read gitonga Ezekiele 10 Bible Online

Ezekiele 10 - gitonga bible

Ezekiele 10

¹Ndingulereska, ndipo ehe, pa mtambo uwa wenga pachanya pa mitu ya makerubi panguwoneka pachanya pawo chakukozgana ulaka ndi mwa wa satire, mu kaŵiro ka chitengo cha ufumu.

²Wangukamba ndi munthu wakuvwara bafuta yo, wanguti, “Ruta, sere pakati pa mikombelo yo ye pasi pa makerubi; zaza manja ghako ndi maka gha moto gho ghe pakati pa makerubi, ughaparghang'iye pachanya pa msumba.” Ndingumuwona wachiseremo.

³Sono makerubi ghanguma kuchiri ku malaŵi kwa nyumba po munthu waserengamo, mtambo unguzaza luluwa lamukati.

⁴Ndipo unkhankhu wa Ambuya ungukwera kutuwa pa makerubi kuza pa chiwundu cha nyumba; mtambo unguzaza nyumba, sono luluwa linguzazika ndi kugadima kwa unkhankhu wa Ambuya.

⁵Kugunda kwa mapapa gha makerubi kunguvwika mpaka ku luluwa la kubwaro, ulaka ndi mazu ghaku Chiuta Wanthazizose pa warongoro.

⁶Ndipo po wanguti walanguliya munthu wakuvwara bafuta yuwa kuti, “To moto pakati pa mikombelo, pakati pa makerubi,” wangusere ndi kuma pafupi ndi mkombelo.

⁷Kerubi pakati pa makerubi, wangunyoroske janja lake ku moto wo wenga pakati pa makerubi, wangutopo unyake wanguŵika mu manja gha munthu wakuvwara bafuta, wanguti waronde wangutuwa.

⁸Makerubi ghanguwoneka kuŵa ndi kawonekero ka janja la munthu kusi ku mapapa ghawo.

⁹Ndingulereska, ehe, pafupi ndi makerubi penga mikombelo yinayi, umoza pa kerubi we yose; kawonekero ka mikombelo kenga ulaka ndi mwa wa Krisolite wa kujeduka.

¹⁰Mukawonekero kawo, yose yinayi yenga yakuyana, ulaka nge mkombelo wenga mukati mu mkombelo.

¹¹Yichiruta, yingwende mu vigaŵa vyawo vyose vinayi, kwambura kung'anamuka pakwenda, kweni kose ko mkombelo wa paurongo ungurazga yose yingurazga kweniko, kwambura kung'anamuka pakwenda.

¹²Ndipo vizinga vyawo, ndi tuvisulu twawo tumana tumana twakukhozge, ndi mikombelo viyo yenga yakuzaza maso zingirizgi mikombelo yo ŵanayi wo ŵenga nayo.

¹³Mikombelo yo, mukuvwa kwangu, yingudanika mikombelo yakugadabuwa.

¹⁴Ndipo we wose wenga ndi visku vinayi: chisku cha kudanga chenga chisku cha kerubi, chisku cha chiŵi chenga chisku cha munthu, chisku cha chitatu chenga cha nkharamu, ndipo chisku cha chinayi chenga cha nombo.

¹⁵Makerubi ghangukwera. Ivi vyenga vyamoyo vyo ndinguwona ku msinji wa Kebara.

¹⁶Ndipo po makerubi gharutanga, mikombelo yingwenda pamoza nagho; po makerubi ghangusoska mapapa ghawo kuti ghaphururuke kutuwa kucharu, mikombelo kuti yingutuwako cha.

¹⁷Po makerubi ghangume chisisi, iyi nayo yinguma chisisi, po ghangukwera, iyi nayo yingukwera pamoza nagho; pakuti mzimu wa vyamoyo vyo wenga mwaku yo.

¹⁸Sono unkhankhu wa Ambuya unguruta kutuwa pa chiwundu cha nyumba, ndi unguma pachanya pa makerubi.

¹⁹Ndipo makerubi ghangusoska mapapa ghawo kutuwa ku charu, ndingughawona ndi maso ghangu ghachiruta, ndi mikombelo pamoza nagho; ndipo ghanguma pa khomo la likomo lakuvuma la nyumba ya Ambuya; ndipo unkhankhu waku Chiuta waku Yisraele wenga pachanya pawo.

²⁰Ivi vyenga vyamoyo vyo ndinguwona pasi paku Chiuta waku Yisraele pa msinji Kebara; ndipo ndinguziŵa kuti ghenga makerubi.

²¹Yose wenga ndi visku vinayi, mapapa ghanayi, ndipo kusi ku mapapa ghawo kwenga kawonekero ka manja gha munthu.

²²Chikozgu cha visku vyawo vyenga nadi visku vyo kawonekero kake ndinguviwona pa msinji Kebara. Vyose vingwenda nyoronyoro kurazga kunthazi.