Read gitonga Ezekiele 11 Bible Online

Ezekiele 11 - gitonga bible

Ezekiele 11

¹Mzimu ungundinyamuliya pachanya, ungunditore ku likomo la kuvuma la nyumba ya Ambuya, lo lilereska kuvuma. Ndipo wonani, pa likomo lapa khomo penga ŵanthu machumi ghaŵi ndi ŵankhonde; mukati mwawo ndinguwona Yazaniya mwana waku Azuru, ndi Pelatiya mwana waku Benaya, mafumu gha ŵanthu.

²Ndipo wangunena nane, “Mwana wa munthu, yaŵa mbanthu wo ŵaghanaghana utimbanizi ndi kupereka fundu ziheni mu msumba uwu;

³wo ŵatiti, ‘Nyengo kuti yaŵandika cha yakuzenge zinyumba; msumba uwu nchiŵiya, ndipo ifwe te nyama.’

⁴Mu chifukwa cho uŵachimiye iwo, chima A! Mwana wa munthu.”

⁵Ndipo Mzimu wa Ambuya unguza paku ine, ungunena nane, “Kamba, Viyo atiti Ambuya: ndimo mughanaghaniya, owe nyumba yaku Yisraele; pakuti ndiziŵa vinthu vyo vituza mu mtima winu.

⁶Imwe mwandaniska ŵakubayika ŵinu mu msumba uwu, ndipo mu ŵagurwi mwazaza ndi ŵakubayika.

⁷Chifukwa cho Ambuya Chiuta, atiti; Ŵakubayika ŵinu wo mwagoneka Mukati mwake, ndiwo nyama, msumba uwu nchiŵiya; kweni imwe mukatuzgikanga mukati mwake.

⁸Mwawopa lipanga; ine ndikatoriyanga lipanga paku imwe, atiti Ambuya chiuta.

⁹Ndipo ndikakutuzganinga mukati mwake, ndi kukuperekani mu manja gha ŵalendo, nderuzgenge paku imwe.

¹⁰Mukawanga ndi lipanga; ndikweruzgeninga mu mphaka ya Yisraele; ndipo mukaziŵanga kuti ine ndine Ambuya.

¹¹Msumba uwu kuti ukaŵanga chiŵiya chinu cha, nanga ndimwe kuti mukaŵanga nyama mukati mwake cha; ndikweruzgeninga mu mphaka ya Yisraele;

¹²ndipo mukaziŵanga kuti Ine ndine Ambuya; Chifukwa kuti mwenda mu virunguchizgu vyangu, nanga nkhuchita malangulu ghangu cha, kweni mwachita kwakiyana ndi malangulu gha mitundu yo yamuzingirizgani.”

¹³Ndipo kunguŵa kuti, po ndachimanga, kuti Peletiya mwana waku Benaya wakufwa. Ndinguwa kavunama, ndinguliya kwakubangula, kuti, “Owe Ambuya Chiuta! Kumbi mukamaliyanga limu tetete ŵakujapo ŵa ŵaYisraele?”

¹⁴Mazu gha Ambuya ghanguza kwaku ine:

¹⁵“Mwana wa munthu, ŵana ŵanyako, inya ŵana ŵanyako, ŵamikoli ŵanyako, nyumba yose yaku Yisraele, inya wose, ndiwo pakuŵeniwo ŵakuja mu Yerusalemu ŵakamba kuti, ‘Wakuruta kutali kutuwako ku Ambuya; charu ichi chapaskika kwaku ifwe kuŵa chihara.’

¹⁶Chifukwa cho unene kuti, ‘Viyo atiti Ambuya Chiuta: Nanga ndikuŵadikiskiya kutali mukati mu mitundu, nanga ndikuŵambiniska mukati mu vyaru, kweni ndipuuli kwaku iwo ndaŵa malo ghakupaturika kwa nyengo yimanavi mu vyaru mo ŵakuya.’

¹⁷Chifukwa ichi unene kuti, ‘Viyo atiti Ambuya Chiuta: Ndikawunjikanga imwe kutuwa mu ŵanthu, ndi kuwungang'iska imwe kutuwa mu vyaru vyo mungumbininikyamo, ndipo ndikakupaskaninga charu cha Yisraele.’

¹⁸Ndipo ŵatakuti ŵaza muwa ŵakatuzgangamo ukazuzi wake wose ndi maunyakazi ghake.

¹⁹Ndiŵapaskenge mtima umoza, mukati mwawo ndiŵikenge mzimu ufya; ndituzgengemo mtima wa mwa mu liŵavu lawo ndi kuŵapaska mtima wa munofu,

²⁰mwakuti ŵendenge mu virunguchizgu vyangu, kusunga ndi kuvwiya malangulu ghangu; ŵakaŵanga ŵanthu ŵangu, ndipo ine ndikaŵanga Chiuta wawo.

²¹Kweni kwaku ŵeniwo mitima yawo yitunthwiya mu maukazuzi ndi maunyakazi ghawo, ndiwezgiyenge nchitu zawo pa mitu ya ŵeneko, atiti Ambuya Chiuta.”

²²Sono makerubi ghangusoska mapapa ghawo, ndi mikombelo pamoza nagho; ndipo unkhankhu waku Chiuta waku Yisraele wenga pachanya pawo.

²³Unkhankhu wa Ambuya unguruta kutuwa mukati mu msumba, unguma pachanya pa phiri lo le kuchiri kuvuma kwa msumba.

²⁴Mzimu ungundisoska unguditore mu chiwona ndi Mzimu waku Chiuta ku Kaldiya, ku ŵamikoli. Ndipo chiwona cho ndinguwona chingukwera kutuwako kwangu.

²⁵Ŵamikoli ndinguŵakonkhome vinthu vyose vyo Ambuya angundirongo.