Read gitonga Ezekiele 12 Bible Online

Ezekiele 12 - gitonga bible

Ezekiele 12

¹Mazu gha Ambuya ghanguza so kwangu:

²“Mwana wa munthu, uja mukati mu nyumba ya ŵachigaruka, wo maso ŵenagho, kweni kuti ŵawona cha, makutu ŵe nagho, kweni kuti ŵatuvwa cha;

³chifukwa ndi nyumba ya chigaruka. Pa chifukwa cho, mwana wa munthu, ujirongosole katundu wapa ulendo ku umkoli, ndipo urutenge ku umkoli ndi msana pa maso ghawo; ukarutanga nge ngwamkoli kutuwa pa malo ghako kuya pa malo ghanyake pa maso ghawo. Akhumba ŵakawangamo nanga mba nyumba ya chigaruka.

⁴Utuzgi katundu wako ndi msana pa maso ghawo, nge ndi katundu wa umkoli; ndipo iwe wamwene ukarutanga ndi mazulo iwo ŵachilereska, nge ndimo ŵanthu ŵakuya ku umkoli ŵatenere kuchitiya.

⁵Kumba, utoro chimati iwo ŵachilereska, utuliya penipo.

⁶Ukanyamuliyanga katundu pa phewa lako maso ghawo ghachiwona, pinganga utuwe ndi mdima, uvwinkhe chisku chako, alinga kuti ureke kuwona charu; chifukwa ndakuchita imwe kuŵa chisimikizgu pa nyumba yaku Yisraele.”

⁷Ndipo ndinguchita ulaka ndimo ndingulangulikiya. Ndingutuzga katundu wangu ndi msana, nge ndi katundu wa umkoli, ku mazulo ndingukumba kutoro chimati ndi manja ghangu; ndingutuwa ndi mdima, ndingupinga katundu pa phewa langu, iwo ŵachiwona.

⁸Mazu gha Ambuya ghangudiziya ku mlenji:

⁹“Mwana wa munthu, Asi nyumba yaku Yisraele, yo ndi nyumba ya chigaruka, ŵangukufumba kuti, ‘Kumbi uchitanji?’

¹⁰Kamba nawo kuti, ‘Ambuya Chiuta watiti: Makani yagha ghakamba ndi fumu mu Yerusalemu ndi ŵa nyumba yose yaku Yisraele wo ŵemwenimo.’

¹¹Ukambe, ‘Ine nde chisimikizgu kwaku imwe: nge ndimo ndachitiya, ndimo so kukachitikiyanga kwaku iwo, ŵakarutanga ku umkoli, ku uŵanda.’

¹²Fumu yo ye mukati mwawo yikapinganga katundu pa phewa lake mu mdima, ndipo yikarutanga, yikakumbanga chimati ndi kuporota penipo; yibenekeriyenge chisku chake, mwakuti yireke kuwona charu ndi maso ghake.

¹³Ndikapong'anga chirepa changu paku iyo, ndipo wakawiranga mu chiŵana changu; ndizenge nayo ku Babiloni mu charu cha ŵaKaldiya, kweni kuti wakachiwonanga cha; ndipo wakafwiyanga kwenikuwa.

¹⁴Ndipo wose ŵakumuzingirizga, ŵakumovya, ndi maŵanja ghake ghose ghankhondo, ndiŵambininiskiyenge ku mphepo zose, ndipo ndikasoronga lipanga pavuli pawo.

¹⁵Ndipo ŵakaziŵanga kuti ine ndine Ambuya, asani ndaŵambininiskiya mukati mu mitundu ndi kuŵaparghang'iya mu vyaru.

¹⁶Kweni ndikapozomoskanga ŵamanavi ŵaku iwo ku lipanga, ku Chilala ndi ku chiwowota, alinga kuti ŵasumuwe maunyakazi ghawo ghose mukati mu mitundu ko ŵaruta, ndipo ŵaziŵe kuti ine ndine Ambuya.”

¹⁷Ndipo so ghangundiziya mazu gha Ambuya:

¹⁸“Mwana wa munthu, rghanga chiŵande chako ndi kumbwambwanthiya, mwanga maji ghako mu chitenthe ndi kufipa mtima;

¹⁹kamba vya ŵanthu ŵa charu, Viyo atiti Ambuya Chiuta wakuja mu Yerusalemu mu charu cha Yisraele: Ŵakarghanga chiŵande chawondi kufipa mtima, ŵakamwanga maji ndi kuzizwa chifukwa charu chawo chikapururikanga vyose vyo vilimo, pa chifukwa cha viwawa vyaku wose ŵakuja mwenimo.

²⁰Ndipo misumba yakuzaza ŵanthu, yipasuke, charu chikaŵanga phasulu; ndipo mukaziŵanga kuti ine ndine Ambuya.”

²¹Ghangundiziya mazu gha Ambuya:

²²“Mwana wa munthu, ndi nthanthi uli iyi yo wenayo yapa charu cha Yisraele, yakuti, ‘Mazuŵa gharutiliya ghata kunthazi, ndipo chiwona che chose chitondeka?’

²³Viyo uŵanene kuti, ‘Ambuya atiti: Ndirekeskenge nthanthi iyi, kuti ŵakayikambanga so cha mu Yisraele.’ Kweni ŵanene kuti, Mazuŵa ghaŵandika, ndi kufiskika kwa chiwona che chose.

²⁴Chifukwa kuti pakaŵanga so chiwona cha utesi pamwenga wula wa ŵaka cha mukati mu nyumba yaku Yisraele.

²⁵Kweni Ine Ambuya ndikambenge mazu gho ndikakambanga, ndipo ghakafiskikanga. Kuti ghakaziwulikanga cha, kweni mu mazuŵa ghinu, Owe nyumba ya chigaruka, Ndikarongoronga mazu ndi kughafiska, atiti Ambuya Chiuta.”

²⁶Mazu gha Ambuya ghangundiziya so:

²⁷“Mwana wa munthu, awona, ŵa nyumba yaku Yisraele ŵatiti, ‘Chiwona cho wawona ncha mazuŵa ghanandi gha kunthazi, wachima vya zinyengo zo ze kutali.’

²⁸Chifukwa cho uŵanene, Viyo atiti Ambuya Chiuta: Palivi ghamoza gha mazu ghangu gho ghakaziwulikanga, kweni mazu gho ndirongoro ghakafiskikanga, atiti Ambuya, Chiuta.”